Read Bawm Chin ISAI 65 Bible Online

ISAI 65 - Bawm Chin bible

ISAI 65

¹LALPA nih, “Ka mi tla thlachamnâk sâng ding ka râlring kumza le, sikhawmsele thla an cham lo. Anmah rangah an hawng ka muh ding hen ka râlring kumza, sikhawmsele an tum lo. ‘Hinah ka um ka nan ṭangpi na lai,’ ti hen sâng ding ka râlring khawmah phun tla nih ka sinah thla an cham lo.

²Ka mi tla, lungkhung tak hen thil diklo ti hen anmah duh dân hen umtu tla chu lâwmh na ding ka râlring kumza.

³Ningzak theih lo tak hen ka thin an ka runhtir kumza. Dûm thenhlimh ah lunglo tla bâwlnâk an ap le, lunglo tla mâichâm ah rimthâw tla an duah.

⁴Zân ah thlân leh pûk tla ah mithi thlarau sinah thu deih ding hen an kal. Vawksa tla an ei le, lunglotu tla bâwlnâk ah ap mi meh an suang mi hâng an din.

⁵Churawhchun midang tla sinah, ‘Kan sinah mi a kiang u, nannih tawngh ding hen kanna thenhlimh tuk! Chubang mi tla hâwi hen ka dîr kho lo, an lakah ka thinthawknâk chu mei mit kho lo mi hâwi asi.

⁶“Rêp an si ding mi chu ka thlûk zet le, rêp an tuar ding mi khawm rîn asi rawh. Thil an ti mi chu ka relh awt lo,

⁷sikhawmsele anmah leh an thlâktu tla sual man ka pêk na awt. Lunglotu tla mi thenhlimh thlân tlâng ah rimthâw tla an duah le, an ka sâwi. Churuangah a lânah an thilti lakah a dêng tâwk hâwi hen ka rêp na awt,” a ti.

⁸LALPA nih, “Pakhat khawm nih grep ṭha tla an râwk lo, chu ngâk hen chu hen chun uain an siam. Ka mi tla chu ka veih hep na lai lo le, ka nâwl zulhtu tla chu ka hum na lai.

⁹Juda phun lakah mi Israel tla chu mal ka sâwm na lai le, an thlâk tla nih ka ram lakah mi tlâng tla anna ting lai. Ka mi, keimah nâwl zulhtu ka mi thîm tla chu chunah an um lai.

¹⁰An hawng ka sawnh lai le, an dawrâ leh ranrual tla chu thlanglei ah mi Saron Phâi leh saklei ah mi “Akon” (Nawknâk Vakuam) ah an kalpi lai le, an tlawngtir lai.

¹¹“Sikhawmsele, keimah hawng ka kaltâktu, Zion siarlotu, ka tlâng thenhlimh siarlotu, vân ṭhat leh thihnâk pathian tla, Gad leh Meni sawnhtu tla chu nannih rang chun anna dang ving lai.

¹²Ka nan kawh na liauah nan ka sâng duh lo ruangah leh thu ka sim liauah nan ngâi duh lo ruangah siat leh râwk hen thihnâk chu nan tâ asi lai. Ka lakah ê-aw ngâilo ding leh sual thilti ding nan thîm.

¹³Churuang chun hawng ka sawnhtu leh ka thu ngâitu tla nih chun ei ding tamtak an tawng lai le, sikhawmsele nannih lam chu sungvâng leh tîhâl hen nan um lai ti ka nan simh na. Annih chu anna lâwm lai le, sikhawmsele nannih lam chu nan ning a zak lai.

¹⁴Annih chu lâwm ruangah la an sak lai le, sikhawmsele nannih chu thinlung fâk tak hen nan ṭap lai.

¹⁵Ka mi thîm tla nih nan min ah hawlh siatbarh tla an ti na lai. Kei, LALPA Zahkâi nih ka nan thah na awt. Sikhawmsele ka thu ngâitu tla chu min thar ka pêk na lai.

¹⁶Âuzawng nih ram lakah malsâwmnâk deihtu nih chun Pathian Zumhkâi nih mal a sâwm ding hen a deih lai. Âuzawng siat tleihtu chu Pathian zumhkâi min hen a tiam ding asi. A lânah nawknâk tla chu a lan rawh le, philh asi lai rawh,” a ti.

¹⁷LALPA nih, “Tual thar leh vân thar ka siam. A lânah mi thil um tla chu philh hep asi lai rawh.

¹⁸Ka thilsiam lakah a lâwm ule, lâwptlo u. Jerusalem ka siam mi chu lâwmnâk hen a khat lai le, a mi tla khawm anna lâwm lai.

¹⁹Keimah ngelchel khawm Jerusalem leh a mi tla ruangah ka lâwm lai. Chunah chun ṭapnâk khawm a um lai lo, ṭangpi ding sâwmtu khawm a um lai lo.

²⁰Fasêm thih khawm a um lai lo rawh le, minung san khawm sâutir asi lai. Kum zâ cho a dam mi chu seinotê ah ruat asi lai. Chu lânah a thi mi chu ka rêp na mi singsiahnâk asi lai.

²¹Mi nih in a sak mi chu anmah ber nih an luah lai le, midang nih an luah lai lo. Grep dûm an tuah lai le, uain lakah anna lâwm lai, midang nih an din piak lai lo. Thing hâwi hen ka mi tla chu sâwt tak an dam lai. An rianṭuan thil tla lakah anna lâwm lai.

²³An rianṭuan ah anna dingchang lai le, an fa le nih siat leh râwknâk an tawng lai lo. Tik a hawng um ding mi zawzawng lakah anmah leh an thlâk tla mal ka sâwm na lai.

²⁴Ka sinah thla an cham mi anna lîm lânah ka sâng sawm na lai.

²⁵Chingngia leh dawrâ fa tla munkhat hen râwl an ei lai. Chakeibaknei tla nih ran hâwi hen fapawn an ei lai le, rûl tla khawm ṭihnung an kâi lai lo rawh. Ka tlâng thenhlimh Zion ah nganfâk leh sualnâk zeikhawm a um lai lo rawh,” a ti.