Read Bawm Chin ISAI 66 Bible Online

ISAI 66 - Bawm Chin bible

ISAI 66

¹LALPA nih, “Vân chu ka tophah asi, tual chu ka kê thângnâk asi. Chu hâwi asi chun ka umnâk ding hen zeitin mi in nan hawng ka sak piak hen mun nan hawng ka siam piak kho awt?

²Keimah nih laikulh pumpi ka siam mi asi! Nâu tak hen um mi tla leh rim hen hawng ka ṭih hen ka thu zûltu tla lakah chun ka lâwm.

³“Zapi tla chu anmah duhzia hen thil an ti. Bâwlnâk ah chaw thahtu mawh, minung thahtu mawh, bâwlnâk ah dawrâ fa thahtu mawh, ui ngâwng merhtu mawh; sangvut aptu mawh, vawk thî aptu mawh; rimthâw ap hen milem sinah thlachamtu chu anna bang hep. Fihnungkâi tak hen sawnh chu an duhzia asi.

⁴Thu ka sim mi khawm an ngâi lo, ka kawh na liau khawm pakhat khawm nih an ka sâng lo ruangah an ṭih tak mi anmah râwktu thil ka tlungtir awt. Ka thu ngâilo hen thilsual ti an duh dauh,” a ti.

⁵LALPA ṭihtu leh a thu zûltu tla, LALPA thusim ngâi u: “Nannih chu ka lakah zumh nan kâi ruangah nan lakah mi zeimaw mi nih a nan hua na le, nanmah hen zei thilti ding khawm an nei lai lo. ‘LALPA nih a rokualnâk an muhtir na hen an hum na seh, chu tikah nanna lâwm mi kan muh kho lai’ ti hen an nihsanh na. Sikhawmsele annih tla chu ningzak saih hen an um lai!

⁶Khuapi ah rihâu fâk tak, Biakin ah mi rihâu, LALPA nih a mêlma tla a rêp na mi hâu chu ngâinik u!

⁷“Ka khuapi thenhlimh chu nunau nih nganfâknâk tuar lo thlo hen fa a ring mi hâwi asi.

⁸Chu hâwi thil muhtu leh theihtu an um dah tâwn ma? Phun tla chu ni khat ko ah a suak dah tâwn ma? Phun tla a suak lân chun Zion nih sâwt tak a tuar lai lo.

⁹Ka mi tla ring ding hen ka hawng put na mi chu ring lo ding hen ruat lah u,” a ti. LALPA nih a sim mi asi.

¹⁰Nannih hi khuapi duhtu zawzawng tla, Jerusalem lakah lâwptlo ule! Amah ruangah a lâwm u! Amah ruangah lungfâktu zawzawng tla, tuah a lakah a lâwm u!

¹¹Fa a nu ṭângkâ ah mi hâwi hen a sul-le-lam tluangnâk ah nanna lâwm lai.

¹²LALPA nih, “Sul-le-lam tluangnâk sâwt tak nan lakah ka hawng tlungtir lai le; tiva a kang dah lo mi hâwi hen phun tla neihnâk chu ka hawng luangtir lai. Ngâksia a nu nih a zauhkhenh le, a bân hen a pawm le, a dâwt mi hâwi nan si lai.

¹³Nu nih a fa thla a ngamh mi hâwi hen Jerusalem ah thla kan ngamh na lai.

¹⁴Hi bang tlung mi nan muh tikah nanna lâwm lai le, chak tak leh nungdam hen an umtir na lai. Churawhchun kei, LALPA nih ka thu ngâitu chu ka ṭangpi na le, ka mêlma tla lakah ka thinthawknâk ka langh ti nan theih lai,” a ti.

¹⁵LALPA chu mei hen a hawng lai. An tlûnah a thinthawk mi tla rêp na ding hen thlipi thla tlûnah a hawng a chuan lai.

¹⁶Mei leh nâmsâu hen laikulh ah sual hen a muh na mi zawzawng chu a rêp na lai le, mi tamtak thah hen an um lai.

¹⁷LALPA nih, “Lunglotu tla sawnhnâk lakah anna thiangtir mi tla, dûm thenhlimh leiah kal hen vawksa eitu, châichîm sa leh tî-râwl fihnungkâi dang eitu tla dawnghnâk chu a nâi rawh.

¹⁸An thinlung dawn leh an thilti chu ka theih. Phun zawzawng tla lakah mi pumh ding hen ka hawng. An hawng a pûm tikah ka thiltikhonâk nih a ti kho zia an muh lai le,

¹⁹kei hi anmah rêptu ka si mi an theih lai rawh. “Sikhawmsele a zeimaw mi chu ka zuah na lai le, phun tla leh ram lât tak tla ah ka min thang zia theihlotu tla leh ka rokualnâk leh ka thiltikho zia muhlotu tla: Spain, Libia, leh Lidia, a chanhtiang kah thiam tla hen, Tubal leh Greek ram ah ka fial na lai. Hi bang phun tla nâwngah hin ka rokual zia thu an phuang lai.

²⁰Chubang phun tla thawk hen nan ram mi minung tla ka rangah thilpêk hâwi hen an hawng kîrpi lai. Ka tlâng thenhlimh Jerusalem ah rang tlûnah leh sanatung tlûnah to hen sangâwngsâu tla leh rang kari leh chawpê kari tla hen Israel tla nih fâng thil ap Biakin ah a siahnâk thenhlimh ah an hawng put mi hâwi hen an hawng put na lai.

²¹An lakah zeimaw mi chu bâwlpu tla leh Levi ah ka siam na lai.

²²“Ka thiltikhonâk hen tual thar leh vân thar ka umtir kumza mi hâwi hen na thlâk tla leh na min a um kumza lai.

²³Thla Thar Kût ni leh Dinhni kipah phun kip mi tla Jerusalem ah keimah sawnh ding hen an hawng lai,” LALPA nih a ti.

²⁴“An suak liauah ka lakah hel mi ruak tla an muh lai. Anmah eitu tholung tla a thi lai lo, anmah khanghtu mei khawm a mit lai lo. Minung mitmuh ah fihnungkâi an si lai,” a ti.