Read Bawm Chin LEVITICUS 13 Bible Online

LEVITICUS 13 - Bawm Chin bible

LEVITICUS 13

¹Hi bang dân tla hi LALPA nih Mosi leh Aron rangah a pêk.

²Mi âuzawng nih a vun a mâ chun mawh, khuailumâ mawh, mei mâ mawh ṭihnungkâi asi chun Aron thlâk bâwlpu sinah an kalpi ding asi.

³Bâwlpu nih mâ chu a nik lai le, a mul chu a ngo hen mâ chu a kiangkam vun ngâk hen a thûk dauh chun vun râi ṭihnungkâi asi. Bâwlpu nih mi thianglo ti hen a phuang ding asi.

⁴Sikhawmsele a mâ chu a ngo hen, a kiangkam vun ngâk hen a thûk lo hen a mul khawm a ngo lo chun, bâwlpu nih a dang hen ni sarih sung chu a siah ding asi.

⁵Bâwlpu nih a ni sarih ni ah a nik nawlh lai le, a mâ chu a mahmuntê asi hen a lâwn lo chun ni sarih dang a siah nawlh fâwn ding asi.

⁶Bâwlpu nih a ni sarihnâk ah a nik nawlh fâwn lai le, a mâ chu a ziam lei si hen a lâwn vima lo chun dân hâwi hen a thiang ti hen a phuang ding asi, mâ salam asi ruangah. Chu minung nih chun a nipuan tla chu a suk lai le, thiang asi lai rawh.

⁷Sikhawmsele bâwlpu nih a nik hen a thiang a ti nûnah mâ chu a lâwn vima chun, bâwlpu sinah â langh nawlh ding asi.

⁸Bâwlpu nih a nik nawlh lai le, a mâ chu a lâwn vima ruangah thianglo asi ti hen a phuang ding asi; chu chu vun râi ṭihnungkâi asi.

⁹Âuzawng nih vun râi ṭihnungkâi a nei chun bâwlpu sinah a kalpi ding asi.

¹⁰Anih nih a hawng nik lai le, a mâ chu a vun ah a ngo hen a mul khawm a ngo chun, ma nâi a tuah mi asi.

¹¹Vun râi dam kho lo mi asi. Bâwlpu nih îk ding mi asi ti hen a phuang ding asi. A dangtê hen siah a herh lo, a thianglo mi a fiang ruangah.

¹²Chu a vun râi nih a lû thawk hen a kepâr tiang a tuam hep asi chun,

¹³bâwlpu nih a nik nawlh ding asi. A pum hen a khuh hep tak ti a muh chun chu minung chu dân hâwi hen a thiang ti a phuang ding asi. A vun zawzawng a hawng ngo ruang chun dân hâwi hen a thiang asi.

¹⁴Sikhawmsele a nehnûnah a hawng mâ chiam chun thianglo ah ngaih asi.

¹⁵Bâwlpu nih a nik nawlh lai le, a mâ chu a kâu thlo hen a muh chun a thianglo ti hen a phuang ding asi. A mâ a kâu ti mi chu vun râi ṭihnungkâi asi, chu minung chu a thianglo asi.

¹⁶A mâ chu a hawng dam hen, a hawng ngo nawlh chun, chu minung chu bâwlpu sinah a va kal nawlh lai le,

¹⁷anih nih a hawng nik nawlh lai. A mâ chu a ngo mi asi chun a thiang mi asi lai, bâwlpu nih a thiang ti hen a phuang ding asi.

¹⁸Âuzawng khuailumâ a vei mi chu a dam hen a nehnûnah

¹⁹a phing mi chu a ngo chun mawh a khuailumâ chu a sen dâng zâu hen a lang chun bâwlpu sinah a va kal ding asi.

²⁰Bâwlpu nih a nik lai le, chu a mâ chu a kiangkam vun ngâk hen thûk hen a lang chun a mul khawm a ngo chun a thianglo ti a phuang ding asi. Chu khuailumâ lakah vun râi ṭihnungkâi a hawng um mi asi.

²¹Sikhawmsele bâwlpu nih a nik hen a mul khawm a ngo lo, a kiangkam vun ngâk khawm hen a thûk lo ti a muh chun, a dâng dauh chun, bâwlpu nih ni sarih kar a dang hen a siah ding asi.

²²A mâ chu a lâwn vima chun bâwlpu nih a thianglo ti hen a phuang ding asi; amah chu râi a vei mi asi.

²³Sikhawmsele, â dang lo hen a lâwn lo chun, khuailumâ masî asi, bâwlpu nih a thiang ti hen a phuang ding asi.

²⁴Mi mei nih a duah mi thu ah, a kângnâk makâ a ngo hen a sen dâng asi chun,

²⁵bâwlpu nih a nik ding asi. Chu a mâ lakah mi a mul chu a ngo hen a kiangkam vun ngâk hen a thûk chun, chu mei mâ lakah vun râi ṭihnungkâi a vei mi asi, bâwlpu nih a thianglo ti hen a phuang ding asi.

²⁶Sikhawmsele, a mul chu a ngo lo hen a kiangkam vun ngâk hen a thûk lo hen, a dâng dauh chun, bâwlpu nih ni sarih kar a dang hen a siah ding asi.

²⁷Bâwlpu nih a ni sarih ah a nik nawlh lai le, a lâwn chun vun râi ṭihnungkâi asi lai. Bâwlpu nih a thianglo ti a phuang ding asi.

²⁸Sikhawmsele a makâ a mahmun nget a um hen a lâwn lo hen a dâng dauh chun, vun râi ṭihnungkâi asi lo. Bâwlpu nih a thiang ti a phuang ding asi, mei mâ salam ko asi ruangah.

²⁹Nunau mawh mipa mawh nih a lû ah mawh a khâ lakah mawh mâ a nei chun,

³⁰bâwlpu nih a nik ding asi. A kiangkam mi vun ngâk hen thûk dauh hen a mul eng zâu hen a ṭhia dîk chun vun râi lakah ṭihnungkâi asi, chu minung chu thianglo ti hen phuang ding asi.

³¹Bâwlpu nih a mâ a nik hen, a kiangkam mi vun ngâk hen a thûk lo chun, a mul khawm a ṭha lo rih asi chun, ni sarih a dang ê hen a siah rih ding asi.

³²Bâwlpu nih a mâ chu ni sarih ni ah a nik nawlh lai le, mâ chu a lâwn lo hen a mul khawm a eng lo hen a kiangkam vun ngâk hen a thûk lo chun,

³³Chu minung nih a mâ kiangkam tla a mêt ding asi. Bâwlpu nih ni sarih a dang hen a siah ding asi.

³⁴A ni sarih ni ah bâwlpu nih a mâ chu a nik fâwn ding asi, lâwn lo hen a mâ chu a kiangkam vun ngâk hen a thûk lo chun, a thiang ti hen phuang ding asi. Chu minung nih chun a nipuan a suk lai le, a thiang lai rawh.

³⁵Sikhawmsele, chu mâ chu a thiang ti hen phuang asi nûnah a lâwn chun

³⁶bâwlpu nih a nik nawlh lai. A mâ chu a lâwn vima chun, a mul a eng mawh ti zauh a herh lo rawh, chu minung chu a thianglo hen ngaih asi rawh.

³⁷Sikhawmsele, bâwlpu nih amah ruat dân ah lâwn lo hen a mul khawm a ṭha hen, a mâ khawm dam hen a ruat chun, bâwlpu nih a thiang ti hen a phuang ding asi.

³⁸Nunau mawh mipa mawh a vun lakah a ngo mi a um chun

³⁹bâwlpu nih chu minung chu a nik ding asi. A mâ chu a dâng zâu chun vun lakah a tuah salam mi asi; chu minung chu a thiang asi.

⁴⁰Mi a lubik mawh a chal mawh a sam a kawlh chun a thenhlimh lo tir lêm lo.

⁴¹

⁴²A kawlhnâk ah mâ a sen dâng zâu hen a lang chun vun râi ṭihnungkâi dauh asi.

⁴³Bâwlpu nih a nik lai le, a mâ sen dauh zâu hen a um chun, chu a chal lakah mi vun mâ ṭihnungkâi ruang chun

⁴⁴bâwlpu nih a thianglo ti a phuang ding asi.

⁴⁵Mi vun râi ṭihnungkâi nei mi nih puansia nâwi â aih ding asi, a sam khawm riat ding asi lo, a mêl khingkhuai a tanglei chu a khuh ding asi, “Thianglo, thianglo!” ti hen a âu ding asi.

⁴⁶A mâ a dam lân lo chu thianglo kumza hen a um ding asi, khua lênglei ah a um ding asi.

⁴⁷Nipuan mawh, samul mawh, puan nêm mawh,

⁴⁸samul puan mawh, zei thil tal savun hen siam mi,

⁴⁹a ring mi mawh, a sen mi mawh buar râi a kâi chun bâwlpu a zauhtir ding asi.

⁵⁰Bâwlpu nih a nik lai le, chu nipuan chu a dang hen ni sarih kar a siah lai.

⁵¹A ni sarih ni ah a zauh dik lai le, a buar mi râi chu a zan chun a thianglo mi asi.

⁵²Râi a zan mi zât asi ruangah bâwlpu nih mei lakah a duah ding asi.

⁵³Bâwlpu nih a nik liauah chu buar râi[1] chu zan lo hen a muh chun,

⁵⁴suk ding hen thu a pêk lai le, ni sarih kar a dangah a siah fâwn lai.

⁵⁵Churawhchun a nik lai le, chu buar râi chu amah mun nget asi chun zan lâh menza khawmsele thianglo hen nget ngaih asi lai; a mâ chu dunglei khawm si seh, mâilei khawm si seh na duah ding asi.

⁵⁶Sikhawmsele, bâwlpu nih a nik nawlh hen chu buar râi chu â zûk leikâng asi chun puan mawh savun mawh khawm si sele a thlêk ding asi.

⁵⁷Churawhchun chu buar râi chu a hawng lang nawlh hen a zan vima chun a nipuan neitupa nih a duah hep ding asi.

⁵⁸Chun a suk hen a lang lo thlo asi chun a suk nawlh lai le, a thiang lai rawh.

⁵⁹Hi hâwi hen, buar râi leikângah nipuan lakah a kâi mi chu puan nêm khawm si seh samul puan khawm savun tah mi khawm a dân chu asi.