Read Bawm Chin LEVITICUS 14 Bible Online

LEVITICUS 14 - Bawm Chin bible

LEVITICUS 14

²vun râi ṭihnungkâi mi nih a vei hen a dam nûnah hi thenhlimh tirnâk dân tla a pêk mi chu asi. A dam rawh asi ti phuang asi ni ah bâwlpu sinah kalpi ding asi.

³Bâwlpu nih riakmun lênglei ah a kalpi lai le, a nik lai. Chu râi chu a dam mi asi chun,

⁴bâwlpu sinah thenhnâk ding hen vâ panih, sidar thing ṭeng, samul lasen leh husop ṭeng hen an put ding asi.

⁵Bâwlpu nih vâ chu tî tleng mi tual khêng lakah a thah ding hen thu a pêk lai.

⁶Vâ pakhat dang khawm a lâk lai le, sidar ṭeng, samul lasen leh husop hen vâ thah mi thî lakah mun khat hen a nîm ding asi.

⁷Vun râi veitupa thiangtir ding mi tlûnah vei sarih thî chu a theh ding asi; chu tikah a thiang rawh ti hen phuang ding asi. Chun vâ a nung mi chu a suah ving ding asi.

⁸Chu minung pa nih a puan a suk hen a mul tla a mêt hen tak â khawlh lai le, chu tikah a thiang mi asi lai rawh. Riakmun ah a lût kho lai rawh, sikhawmsele, ni sarih kar chu a puanin lênglei ah a um rih ding asi.

⁹A ni sarih ni ah a lû a mêt lai le, a khamul, a mit tlâng mul, a taksa mul zawzawng a mêt hep ding asi; a puan a suk lai le, tak â khawlh lai le, a thiang lai rawh.

¹⁰A ni riat ni ah dawrâ fa a mipa panih leh a nunau pakhat kum khat fa simsâwinâk umlo mi a hawng put lai le, sangvut oliv sariak telh mi kilogramme thum leh oliv sariak litre mun thum ṭhen hen munkhat a hawng put lai.

¹¹Bâwlpu nih chu minung leh a thil ap chu LALPA umnâk puanin tualmâi ah a kalpi lai.

¹²Churawhchun, bâwlpu nih dawrâ a mipa pakhat leh sariak litre mun thum a ṭhen hen mun khat a put lai le, rulhnâk thil ap rang dingah a ap lai. LALPA sinah a bîk hen bâwlpu rang dingah a ap ding asi.

¹³Duahphung thil ap leh sual thil ap mi ran an thahnâk mun thenhlimh ah chu dawrâ fa chu a thah ding asi. Rulhnâk thil ap chu sual thil ap mi hen â bang ruangah bâwlpu vo asi vevê le, thungâi a thenhlimh asi.

¹⁴Bâwlpu nih dawrâ fa thî chu a lâk lai le, thenhlimh tir ding mi pa a vawrhlei nakhaw, a vawrhlei kutpi, a vawrhlei kepi ah a nêk lai le, a thiang lai rawh.

¹⁵Bâwlpu nih oliv sariak a lâk lai le, a kutza kehlei kângah a bungh lai le,

¹⁶a vawrhlei kutdawng a nîm lai le, LALPA umnâk chu vei sarih a theh lai.

¹⁷A kutza lakah mi sariak leh dawrâ fa thî chu a lâk lai le, a thenhlimh tir ding mi pa vawrhlei nakhaw sâr leh a vawrhlei kutpî, a vawrhlei kepî ah a buaih lai.

¹⁸A dang a kutza lakah a um mi vial sariak chu thiangtir ding mi pa lû lakah thuh hep ding asi. Hi hâwi hen thenhlimh tirnâk dân chu a siam ding asi.

¹⁹Churawhchun bâwlpu nih sual thil ap chu a ap lai le, thenhlimh tirnâk dân chu a siam ding asi. Chu nûnah ran chu duahphung thil ap rangah a thah lai le,

²⁰Fâng ap mi hen mâichâm ah a ap lai. Hi hâwi hen bâwlpu nih thenhlimh tirnâk a siam lai le, chu minung chu a thiang lai rawh.

²¹Chu minung chu a pâm hen a tlinh lo chun, dawrâ fa a mipa pakhat cho thenhlimhnâk dingah rulhnâk thil ap ah a pêk lai le, chu chu a bîk hen bâwlpu rang dingah LALPA sinah thilpêk chu asi. Fâng ap mi rang dingah oliv sariak hen telh mi sangvut kilogramme khat leh oliv sariak litre mun thum a ṭhen hen mun khat a hawng put ding asi.

²²Vaṭhu panih mawh lâilêng panih mawh duahphung thil ap rangah pakhat, sual thil ap rangah pakhat a hawng put ding asi.

²³A ni riat ni, a thenhlimhnâk ni ah Puanin tualmâi ah bâwlpu sinah a hawng put ding asi.

²⁴Bâwlpu nih sariak leh dawrâ fa leh oliv sariak chu a lâk lai le, bâwlpu rang dingah a bîk hen LALPA sinah thilpêk rangah a ap lai.

²⁵Dawrâ fa chu a thah lai le, a thî a lâk lai le, chu minungpa vawrhlei nakhaw, a vawrhlei kutpî, a vawrhlei kepî ah a buaih lai.

²⁶Bâwlpu nih sariak chu a kehlei kutza ah a bungh lai le,

²⁷a vawrhlei kutdawng hen LALPA umnâk chu vei sarih a theh lai.

²⁸Sariak khawm chu a lâk lai le, chu minungpa rangah thî a buaihnâk mun kip a vawrhlei nakhaw, a vawrhlei kutpî, leh a vawrhlei kepî tla ah a buaih nawlh lai.

²⁹A kut ah mi sariak chu, chu minungpa lû ah a thuh lai, chu hâwi hen thenhlimhnâk dân chu siam ding asi.

³⁰Chun, vaṭhu pakhat mawh lâilêng pakhat mawh a lâk lai le, pakhat chu sual thil ap rang dingah, a dang pakhat chu

³¹duahphung thil ap rang ding leh fâng ap mi rangah pêk ding asi. Hi hâwi hen thenhlimh tirnâk dân chu bâwlpu nih a siam ding asi.

³²Hi hi mi nih vun râi ṭihnungkâi lakah â thenhlimh tir ding hen a tlinhlo mi rangah a ti ding mi dân chu asi.

³³Hi bang tla hi in sung khur lakah buar a kâi mi thawk hen râi a vei mi thu ah

³⁴LALPA nih Mosi leh Aron rangah dân a pêk mi tla chu asi. (LALPA nih anmah ram rang dingah a pêk na mi Kanaan ram ah an lût tikah Israel fa tla nih an mang ding mi chu asi.)

³⁵Mi âuzawng nih a in lakah a buar mi thawk hen râi a vei mi a um chun bâwlpu rangah an simh sawm ding asi.

³⁶Bâwlpu nih buar râi nik ding hen a va kal lânah in sungkhur ah mi thil zawzawng chu suah hep ding hen thu a pêk ding asi. Chu lo chun in sungah mi thil chu thianglo hen phuang asi awt ruangah.

³⁷Chu tikah in sungah a va lût lai le, buar râi chu a nik lai; ei ding mi mawh vâm lakah mawh a sen mi leh a ring mi a um chun,

³⁸Chu in chu a mâk lai le, ni sarih kar chu renh pang ding asi.

³⁹A ni sarih ni ah a hawng lai le, a nik nawlh lai. Chu buar râi chu a zan chun,

⁴⁰chu buar râi langhnâk lung chu khuapi lênglei mun nâwmtâm lakah lawnh ding asi.

⁴¹Chu nûnah chun a in sungah mi vâm tla leh â bêk mi tla chu mun nâwmtâm khuapi lênglei ah lawnh ding asi.

⁴²A lânah an siatnâk mun ah lung dang hen an sak hen, a vâm dang an bêk nawlh ding asi.

⁴³In tla sak nawlh hen a vâm tla sawng asi nûnah buar râi a hawng lêng nawlh chun

⁴⁴bâwlpu a va kal hen a zauh ding asi. A lêng tak mi asi chun in chu a nâwm mi asi.

⁴⁵In tla siat hen, a lung tla, a thing tla leh a vâm zawzawng mun nâwmtâm khuapi lênglei ah thiar ver ding asi.

⁴⁶Âuzawng chu in chu renh asi liauah va lûttu chu zânlei tiang thianglo hen ngaih asi lai.

⁴⁷Âuzawng chu in ah a zâu hen eitu leh dintu chu a nipuan a suk ding asi.

⁴⁸Bâwlpunih in sak thar mi zauh ding a hawng hen buar râi a lang lo asi chun, chu in chu a thiang asi ti hen a phuang lai, chu râi chu a thiang ver rawh ruangah.

⁴⁹Chu in chu thenh ding hen vâ panih, sidar thing, samul lasen, husop ṭeng a lâk ding asi.

⁵⁰Tî siahnâk valei khêng tlûnah vâ chu a thah ding asi.

⁵¹Churawhchun, sidar thing, husop, samul lasen, vâ a nung mi chu a lâk lai le, vâ an thah mi thî an thlawrhnâk khêng ah mi tî lakah a nîm lai. In chu vei sarih a theh lai.

⁵²Hi hâwi hen in chu sidar thing, husop, samul lasen, vâ thî, tî thiang, vâ a nung mi hen a thenh ding asi.

⁵³Vâ a nung mi chu khuapi lênglei ah phâisen ah a thlah ding asi. Hi hâwi hen in chu dân hâwi hen thenhlimhnâk siam ding asi, churawhchun a thiang lai rawh.

⁵⁴Hi hi vun râi ṭihnungkâi lakah mi dân tla chu asi;

⁵⁵mâ-le-rung, khuailumâ, meikâng mâ; buar mâ, nipuan ah mi mawh in lakah mi mawh ti ding dân chu.

⁵⁶

⁵⁷Hi dân hi â thenhlimh mi thu ah leh thenhlimh lo mi thu ah mang ding dân chu asi.