Read Bawm Chin LEVITICUS 15 Bible Online

LEVITICUS 15 - Bawm Chin bible

LEVITICUS 15

¹LALPA nih Mosi leh Aron sinah

²Israel mi tla rangah hi bang dân tla hi a pêk na. Mipa nih a siaṭha lakah thil suak mi a nei chun; chu a suak mi chu thianglo ah ngaih asi.

³Chu a siaṭha lakah chun suak hen mawh, chu nih chun phih khawmsele a thianglo.

⁴Ihkhun a zâunâk leh a tonâk khawm a nâwm asi.

⁵Âuzawng a ihkhun tawnghtu mawh,

⁶zei lak tal si seh a tonâk tawnghtu nih chun a nipuan a suk hen tak â khawlh ding asi. Zânlei tiang a thianglo asi.

⁷Âuzawng nih chu minung thil a suak mi neitupa tawnghtu nih chun a nipuan a suk ding asi, zânlei tiang a thianglo asi.

⁸Thil suak mi neitupa nih âutal a thiang mi pa rangah chil a sah chun, a sah mipa nih chun nipuan suk hen tak â khawlh lai, zânlei tiang thianglo asi lai.

⁹Tangphah mawh tophah lakah thil suak neitupa a to chun a nâwm rawh asi.

¹⁰Chu minung tonâk tawnghtu zawng chu zânlei tiang an thianglo asi. Chu minungpa tonâk puttu chu a nipuan suk hen tak â khawlh lai le, zânlei tiang hen thianglo hen a um lai.

¹¹Chu thil suak neitupa nih âumawh a kut ṭâwl lo hen a tawngh chun a tawngh mi pa nih a nipuan a suk lai le, tak â khawlh lai le, zânlei tiang thianglo hen ngaih asi lai.

¹²Zei tual bêl tal a thianglo mi pa nih a tawngh mi chu khuai ding asi, thing khêng a tawngh mi chu ṭâwl ding asi.

¹³Chu thil suak neitupa chu a dam chun, ni sarih â ngâichâng lai le, a nipuan tla suk hen tî thiang lakah tak â khawlh lai le, a thiang lai rawh.

¹⁴A ni riat ni ah vaṭhu mawh lâilêng mawh bawp khat a put lai le, LALPA umnâk Puanin mâi ah a kalpi lai le, bâwlpu a pêk lai.

¹⁵Bâwlpu nih pakhat chu sual thil ap rangah a mang lai le, pakhat chu duahphung thil ap rangah a mang lai. Hi hâwi hen mi a thenhnâk dân chu a siam ding asi.

¹⁶Mipa chi pung liauah a suak chun tak a khawlh ding asi, zânlei tiang a thianglo asi.

¹⁷Nipuan mawh savun mawh chu chi buaihnâk chu ṭâwl ding asi. Zânlei tiang thianglo a ngaih asi lai.

¹⁸Mipa leh nunau anna pung chun tak anna khawlh ding asi, zânlei tiang thianglo hen ngaih asi.

¹⁹Nunau nih a nunau râitâ a nei chun ni sarih kar thianglo a ngaih asi. Chu kar lakah amah tawnghtu khawm nî tlâk tiang thianglo a ngaih asi.

²⁰A thî neih liauah a tonâk leh a zâunâk khawm thianglo a ngaih asi.

²¹Âuzawng a ihkhun mawh a tonâk tawnghtu chu a nipuan suk hen tak a khawlh ding asi, nî tlâk tiang thianglo hen ngaih asi lai.

²⁴Mipa nih a nunau râitâ a nei liauah a pung chun â thenhlimh lonâk nih a nâwmtir asi; ni sarih thianglo hen ngaih asi. A zei ihkhun tal chu mipa zâunâk khawm thianglo hen ngaih asi.

²⁵Nunau nih thî a nei hen ni dang ngâk a sâwt hen a nei chun mawh ni dangah a neih dan hâwi asi lo chun a thî neih kar zawzawng chu thianglo a ngaih asi, thla siar a thî neih liau mi hâwi hen.

²⁶A thî neih karah a itnâk ihkhun leh tonâk zawzawng chu a thianglo ah ngaih asi.

²⁷Âuzawng a tonâk tla tawnghtu chu thianglo ah ngaih asi. A nipuan suk hen tak â khawlh lai le, zânlei tiang thianglo a ngaih asi.

²⁸A thî neih a dawng nûnah ni sarih a ngâichâng ding asi, chu tikah dân hâwi hen thiang asi.

²⁹A ni riat ni ah vaṭhu bawp khat mawh lâilêng bawp khat mawh LALPA umnâk Puanin tualmâi ah bâwlpu sinah a kalpi lai.

³⁰Chun, bâwlpu nih pakhat chu sual thil ap rangah a mang lai le, a dang chu duahphung thil ap rangah a mang lai. Hi hâwi hen nunau thenhlimh tirnâk chu a siam lai.

³¹LALPA nih Mosi sinah Israel mi tla chu LALPA umnâk Puanin, an umnâk mun lâi ah mi chu nawmh lo ding hen simhkan na ding hen a simh. An nawmh asi chun thah an si ngelchel lai.

³²Hi bang hi mipa chi suak leikâng thu ah dân chu asi.

³³Nunau nih a nunau râitâ a neih kar mawh, mipa nih nunau a pung kar thianglo an sinâk dân chu asi.