Read Bawm Chin LEVITICUS 19 Bible Online

LEVITICUS 19 - Bawm Chin bible

LEVITICUS 19

¹LALPA nih Mosi chu

²Israel mi tla sinah thusim ding hen a simh, “Kei LALPA nan Pathian ka thenhlimh ruangah nanna thenhlimh ding asi.

³Mikip nih nan nu leh nan pa nan zah ding asi; thu kan pêk na mi hâwi hen Dinhni[2] nan ulh ding asi. Kei, LALPA nan Pathian ka si.

⁴“Hawng ka kaltâk lah ule, milem sawnh lah u, thîr hen pathian siam hen sawnh lah u, Kei hi LALPA nan Pathian chu ka si.

⁵“Ran thah hen thil ap nan hawng pêk tikah dân kan pêk na mi kha zûl ule, thil ap chu ka pawm lai.

⁶Ran nan thah mi sâ chu a thah ni ah mawh a thâituan ah mawh nan ei ding asi. A lei mi ni thum tiang a um mi chu duah ding asi.

⁷Dân lakah a thianglo ruangah mi nih a ei asi chun, a thil ap ka pawm awt lo.

⁸Âuzawng nih ka sinah ap mi a rarâu a ruat hen eitu chu sual hen ngaih asi lai le, amah khawm ka mi ah ngaih asi lai lo.

⁹“Nan phâisen fâng nan ât chun, a vâu tleng khet hen ât lah u, a vûi nan relh mi khawm ât ding hen kîr nawlh lah u.

¹⁰Nan grep dûm ah a rah kawih ding nan va kal chun, nan relh mi mawh a tlâ mi mawh va sar ding hen kîr lah u; mi ngâkṭah leh ramdang mi tla rangah mâk u. Kei LALPA nan Pathian chu ka si.

¹¹“Fîr lah, perpê lah, âwkrâwl thu sim lah.

¹²Na zulh kho lo ding mi chu ka min sâl hen thu tiamh lah, chubang nih ka min a mualphoh asi. Kei, LALPA nan Pathian ka si.

¹³“Âu tâ khawm lâk hen a dingchang ding tum lah. Zân khat kar lak ko khawmah lawh pêk ding na lâk mi chu pêk lo hen um lah.

¹⁴Mi nasêt chu siatbarh lah le, mi mitchâw rangah a tlûknâk ding hen a mâilei ah thil siah lah; Kei LALPA na Pathian hi hawng ka ṭih rawh.

¹⁵“Dân lakah thu na thlûk mi lakah zumhkâi rawh. Mi pâm rang khawmah sunhsak khun lah le, minei khawm ṭih khun lêm lah.

¹⁶Mi thu lakah âwkrâwl zanh lah le, mi vânduai an tawng ni ah na ṭangpi kho ding mi chu ṭangpi rawh. Kei, LALPA ka si.

¹⁷“Âukhawm nahsuah lah, amah hen rêllonâk nan kar lakah a um chun a rem u, amah ruangah na palhrah lebang lai.

¹⁸Âukhawm lehrul sam hen hua kumza lah. Sikhawmsele nangmah na dâwt hâwi hen na zâwlbâwm dâwt rawh. Kei LALPA chu ka si.

¹⁹“Ka thupêk zûl le, ran chu chi dang thlahtir lah. Phâisen pakhat ah thlâichî chi nih chîng lah. Puan zât nih hen tah mi a aih lai.

²⁰“Mi nih a salnu midang sinah nupisûn rangah zuar ding hen thu a tiamh hen, a man a pêk lo mi asi chun, chu nunau leh a dâwngpu chu thah ding asi lo, a ihpi chun rêp ding an si. Chu nûn khawmah a sal nget lai rih.

²¹Chu minung nih chun ka umnâk Puanin tualmâi ah dawrâ chal a hawng put lai le, rulhnâk thil ap a hawng pêk lai.

²²Bâwlpu nih chu hen chun chu minung sual thiangnâk dân chu a hawng timhtuah lai le, Pathian nih a ngaihdam lai.

²³“Kanaan ram nan hawng lût tikah thingthei zeitin mi zât tal kum thum kar chu thianglo hen ngaih asi. Chu kar vial chu nan ei ding asi lo.

²⁴A kum linâk ah theirah zawzawng chu Kei LALPA sinah nanna lâwmnâk zauhtirnâk dingah nan hawng ap ding asi.

²⁵Sikhawmsele a kum nga nakah rah chu nan ei kho lai. Hi bang zawzawng hi nan ti chun nan thingthei a rah tam khun lai. Kei LALPA nan Pathian ka si.

²⁶“Sâ a thî hen ei lah u. Dâwi leikâng thil rerêng ti lah u.

²⁷Na nâ chabeng leh na khamul na mêt ding asi lo.

²⁸Mithi zûn phurh hen na tak na rawi hen na ṭialh ding asi lo. Kei LALPA ka si.

²⁹“Na fanu tla â zuar mi nunau biakin[3] ah siam hen mualphoh na lah; chu hâwi na ti chun, pathian dang leikângah ṭângṭawm mi na si lai le, ram chu hur-le-khuangnâk hen a khat lai.

³⁰Dinhni ulh le, an ka sawnhnâk mun zah rawh. Kei LALPA ka si.

³¹“Mithi thlarau kawhtu sinah thu deih ding hen kal lah. Na ti chun dân hâwi hen na nâwm lai. Kei LALPA nan Pathian ka si.

³²“Tar tla chu zah na ule, chawnglawmh na u. Kei LALPA hi hawng ka ṭih u.

³³“Ramdang mi nan sinah a um mi chu nehsawh lah u.

³⁴Nanmah Israel mi tla hâwi hen zauh na u, nanmah nanna dâwt mi hâwi hen dâwt na u. Aigupta ram ah nan um liauah ramdang mi nan si mi kha theihkumza u. Kei LALPA nan Pathian ka si.

³⁵“A dung a rit lei, a tam lei tahnâk diklo mang hen âukhawm perpet lah na u.

³⁶Khîng dik tak, rit leh tahnâk dik tak mang u. Kei LALPA nan Pathian, Aigupta ram ah mi an suakpi natu ka si.

³⁷Ka thupêk leh ka dân zawzawng zûl u. Kei LALPA ka si,” a ti.