Read Bawm Chin LEVITICUS 2 Bible Online

LEVITICUS 2 - Bawm Chin bible

LEVITICUS 2

¹Mi nih LALPA sinah fâng a ap chun, sangvut ah a rial masa ding asi. Oliv sariak leh rimthâw a telh lai le,

²Aron thlâk bâwlpu tla, sinah a pêk lai. Bâwlpu nih sangvut zapei khat leh rimthâw leh sariak tla chu a lâk lai le, a ektê hen LALPA sinah thil ap singsiahnâk dingah mâichâm ah a duah lai. Chu eiphung bâwlnâk rim nih chun LALPA a lawmhtir.

³Ap mi fâng a lei mi vial chu bâwlpu rang ding asi; LALPA sinah eiphung thil ap lakah mi asi ruangah a thenhlimh asi.

⁴Sangvut chu bêl ah hût mi asi chun thilnu telh ding asi lo. Oliv sariak hen chawmh mi sang tlang a sah mi mawh, oliv sariak hen sang siam mi mawh asi kho.

⁵Ap mi sang chu bêl lakah suang mi asi chun, thilnu tel lo hen oliv sariak hen chawmh mi asi ding asi.

⁶Thil ap na pêk tikah sêu le, sariak tawih.

⁷Sang ap ding mi chu khêng ah rêu mi asi chun sangvut chu oliv sariak hen siam ding asi.

⁸LALPA sinah ap ding hen put le, mâichâm ah puttu ding mi bâwlpu sinah pêk.

⁹LALPA sinah ap hep mi asi ti zauhtirnâk ah bâwlpu nih a khingkhuai a lâk lai le, mâichâm ah a duah lai. Chu eiphung duah mi rim nih LALPA a lawmhtir.

¹⁰Ap mi lakah a lei mi vial chu bâwlpu vo asi, LALPA sinah eiphung thil ap lakah mi asi ruangah a thenhlimh asi.

¹¹LALPA sinah fâng ap mi rêng chu thilnu telh ding asi lo. LALPA sinah eiphung ap mi rêng chu thilnu mawh khuaitizû mawh mang ding asi lo.

¹²Kum siar hen fa thar ât masachem mi chu LALPA sinah nan pêk ding asi, mâichâm lakah lam chun duah ding asi lo.

¹³Fâng ap mi kip lakah chite telh u, chite nih chun LALPA leh nan karah thudantuk a zauhtir ruangah. (Nan ap mi thil zawzawng lakah chite telh ver ding asi.)

¹⁴LALPA sinah fa thar nan ât masachem mi nan ap tikah, rêu mi mawh rial mi mawh nan ap ding asi.

¹⁵Oliv sariak leh rimthâw telh u.

¹⁶Bâwlpu, nih chu sariak leh buh khingkhuai chu theihkumzanâk ding hen a duah lai le, rimthâw zawzawng khawm chu LALPA sinah eiphung ap mi hawi hen a pêk ding asi.