Read Bawm Chin LEVITICUS 20 Bible Online

LEVITICUS 20 - Bawm Chin bible

LEVITICUS 20

¹LALPA nih Mosi rangah Israel mi tla sinah thusim ding hen a simh.

²“Nan lakah leh ramdang minung nan sinah um mi âuzawng nih Molek pathian sawnhnâk dingah a fa tla mangtu chu zapi nih lung hen thi thlo seh ding asi.

³Mi âuzawng nih a fa pakhat mawh Molek sinah pêktu chu ka Puanin nâwmtirtu leh ka min mualphohtu asi. Chu minung chu ka do lai le, ka minung asi kho lai lo.

⁴Sikhawmsele, zapi chu simh ngâilo hen chu hâwi thil titu an thah lo chun,

⁵keimah ngelchel nih amah leh a dâwngsung leh amah leikâng ṭângṭawmtu chu ka lakah zumhkâi lo hen Molek sawnhtu chu ka minung ah ka ruat awt lo.

⁶“Âuzawng mithi thlarau sawnhtu sinah thu deihtu chu ka do lai le, ka minung asi kho lai lo.

⁷Thenhlimh hen um u, Kei LALPA nan Pathian ka si ruangah.

⁸Ka dân zûl u, Kei, LALPA a nan thenhlimh natu ka si,” a ti.

⁹LALPA nih hi bang dân tla hi a pêk. A nu mawh a pa mawh hawlhsiat barhtu chu thah ding asi, mah thihnâk ding amah nih theih seh.

¹⁰Mi âuzawng mah Israel mi tla nupi hen ṭângdang pawmtu chu an panih hen thah ding asi.

¹¹Mi nih a pa nupi a ihpi chun a pa a mualphoh asi, nunau leh mipa an panih hen thah na ding asi, anmah thihnâk chu anmah mawh asi.

¹²Mi nih a monu a ihpi chun an panih hen thah ding asi. An sualnâk a leiluat le, an thihnâk chu anmah mawh asi.

¹³Mipa leh mipa anna pung chun thil nâwmtâm an ti mi asi, an panih hen thah na ding asi. An thihnâk chu anmah mawh asi.

¹⁴Mi nih nunau an nufa hen a umpi chun an pathum hen duah hep na ding asi. Thil mualpho kâi tak an ti ruangah nan lakah chu hâwi thil um ding siang lah u.

¹⁵Mi nih ran a pung chun ran leh amah chu thah na ding asi.

¹⁶Nunau nih ran â pungtir chun ran leh amah chu thah na ding asi, an thihnâk chu anmah mawh asi.

¹⁷Mi nih a farnu mawh, a pa-ei leh a nu-ei fanu mawh a umpi chun zatlâng lakah ningzak saih na hen mi zapi lak thawk hen nar ving na ding asi. A farnu ihpitu nih chu hâwi a tuar ding asi.

¹⁸Mipa nih nunau a thî neih liauah a ihpi chun zapi lakah mi nar ving na ding asi, dân lakah thil thianglo an buar ruangah.

¹⁹Mi nih a ninu a ihpi chun, chu hâwi hen thil diklo a leiluat an ti ruangah an panih hen an tuar vevê ding asi.

²⁰Mi nih a patê nupi a ihpi chun a patê a mualphoh mi asi, amah leh a nunau chu rêp ding asi, fa tla chu anna ting vevê ding asi lo.

²¹Mi nih a unaupa nupi a umpi chun fa lo hen an thi lai. Dân ah thil thianglo a ti hen a unaupa a mualphoh ruangah.

²²LALPA nih, “Ka dân tla leh ka thupêk tla zûl u, ka nan kalpi na ding mi Kanaan ram nan luah khonâk ding hen.

²³Chunah um mi tla dân chu zûl lah ule; chu ram chu nan luah khonâk ding hen lunglotu tla chu ka nar ver na lai. An thilsual ti chu ka fih asi.

²⁴Sikhawmsele, hi ram ningno leh neihnâk hi nan tâ si ding hen thu kan tiamh na, nan rangah kan pêk na awt asi. Kei LALPA nan Pathian ka si, phun dang lakah mi a dang hen kan thlei na mi nan si.

²⁵Churawhchun ran lakah leh vâ lakah dân ah a thenhlimh mi leh thenhlimh lo mi nan thliar ding asi. Ran mawh vâ mawh a thenhlimh lo mi chu ei lah u. A thenhlimh lo ka ti mi nan ei chun chu nih chun an nawmh na lai.

²⁶Nanna thenhlimh ding asi, keimah lakah cho nan um ding asi; Kei LALPA ka si, ka theihlimh ruangah. Keimah tâ lâwng nan si ding hen phundang thawk hen kan thlei na mi nan si.

²⁷“Mipa mawh nunau mawh mithi thlarau a sawnh chun lung hen thi thlo seh ding asi; zei minung zawng chu hâwi titu chu mah thihnâk chu amah mawh asi,” a ti.