Read Bawm Chin LEVITICUS 22 Bible Online

LEVITICUS 22 - Bawm Chin bible

LEVITICUS 22

¹LALPA nih Mosi chu

²Aron leh a fapa tla chu thu simh na ding hen thu a pêk le, “Ka min thenhlimh nan mualphoh ding asi lo, Israel mi tla nih ka sinah thil nan ap mi zawng chu zah tak hen nan hawng ap ding asi. Kei LALPA chu ka si.

³Nan thlâk tla âuzawng dân lakah a thenhlimh lo mi Israel mi tla nih ka sinah thil ap thenhlimh an hawng ka ap liauah a kiangah hawng naihtu chu mâichâm ah rian a ṭuan kho lai lo rawh. Hi hi zeiliau zawngah a um kumza ding asi. Kei LALPA ka si.

⁴“Aron thlâk âukhawm nih vun râi ṭihnungkâi a nei mi nih mawh, chi suak nei mi nih dân hen a thenhlimh lân lo chu ap mi thenhlimh a ei kho lai lo. Bâwlpu âutal nih ruak mawh, thil thianglo mawh amah lakah chi a suak mi mawh,

⁵mi a nâwm mi leh ran thianglo a tawngh chun amah chu a thianglo asi.

⁶Bâwlpu â nawmh mi chu zânlei tiang thianglo a ngaih asi, tak â khawlh lân lo chu thil thenhlimh ap mi tla khawm a ei ding asi lo.

⁷Nî tlâk nûnah lam chun a thiang lai rawh, chu tikah ap mi thenhlimh amah tingvo tla chu a ei kho lai rawh.

⁸Ran zeital amah lung hen a thi mi leh ram sa nih a seh mi a ei ding asi lo; amah thianglo tirtu asi lai. Kei LALPA ka si.

⁹“Bâwlpu zawzawng nih dân ka pêk mi tla chu an zûl ding asi. An zûl lo chun sual hen an thi lai, dân thenhlimh chu an zûl lo ruangah. Kei LALPA anmah thenhlimh tirtu chu ka si.

¹⁰“Bâwlpu dâwngsungkhur cho nih thil ap thenhlimh chu an ei kho lai; âukhawm nih an ei kho lai lo. Bâwlpu sinah a um mi mawh amah sinah lawh hen a siah mi khawm nih a ei kho lai lo.

¹¹Sikhawmsele, bâwlpu sal tangka hen a châwk mi mawh a in sungkhur ah a suak mi mawh tla nih a bâwlpu tingvo an ei kho lai;

¹²Bâwlpu fanu nih bâwlpu silo mi âu hen mawh anna umh chun thil ap thenhlimh a ei kho lai lo.

¹³Sikhawmsele numei mawh a fanu mi nih an mâk mi fa nei lo, a pa in sungkhur ah hawng kîr mi nih a pa bâwlpu tingvo chu a ei kho lai. Bâwlpu dâwngsung tla zawzawng nih chu lakah mi chu an ei kho lai.

¹⁴“Mi âuzawng bâwlpu dâwngsungkhur silo mi nih thil ap thenhlimh a ei palh chun a hêu zat a rulh nûnah a lei zâ lû ah kul a pêk ding asi.

¹⁵Bâwlpu tla nih thil ap thenhlimh chu

¹⁶a ei kho lo ding mi minung tla eitir hen an nawmh ding asi lo; hi nih hin sualnâk leh rêpnâk chubang minung tlûnah a tlungtir lai. Kei LALPA nih thil ap chu ka thenhlimh tir mi asi,” a ti.

¹⁷LALPA nih Mosi sinah

¹⁸Aron leh a fapa tla leh Israel mi zawzawng tla rangah hi dân tla pêk ding hen thu a pêk. Israel mi tla mawh an sinah ramdang mi um tla nih mawh, duahphung thil ap, thutiam rangtlingnâk mawh mah duh thu hen ap mi mawh an pêk chun ran simsâwinâk umlo mi asi ding asi.

¹⁹Sâwinâk umlo mi a mipa pawm asi lai.

²⁰Sâwinâk um mi ran nan ap chun LALPA nih a pawm awt lo.

²¹Mi nih kawmhnâk thil ap LALPA sinah a pêk chun thutiam rangtlingnâk mawh mah duh thu ah ap mawh chu ran simsâwinâk umlo mi pawm tlâk asi ding asi.

²²LALPA sinah ran a mitchâw mi, a kê khêng mi, a kut kê bul mi, mâ a vei mi, a vun phâr mi, râisê a vei mi ap lah u. Chubang hâwi mi chu eiphung thil ap ah nan ap ding asi lo.

²³Mah duh thu ah ap mi lakah a râwm fêk mi a tling lo mi khawm ap kho asi lai; thutiam rangtlingnâk rangah lam chun pawm asi lai lo.

²⁴LALPA sinah ran til rial mi, khei mi duktir mi, rawi mi nan ap ding asi lo. Chu chu nan ram sungah siang asi lo.

²⁵Ramdang thawk hen nan tawng mi ran chu eiphung thil ap ah nan mang ding asi lo. Chubang ran tla chu sâwinâk um leh pawm tlâk lo hen ngaih asi.

²⁶Chawfa mawh, dawrâ fa mawh, kêl fa mawh a ring chun ni sarih kar chu a pinu sinah mi lâk ding asi lo, chu nûnah lam chun eiphung thil ap ah pawm asi lai.

²⁸Ni khat lakah chawpê leh a fa mawh dawrâ leh a fa mawh, kêl leh a fa mawh bâwlnâk ah na mang ding asi lo.

²⁹LALPA sinah lâwmthu simnâk bâwlnâk na ap chun, a dân hâwitê hen ti le, pawm piak na si lai.

³⁰Chu ni ah chun ei, thâizing tiang siah lah.

³¹LALPA nih, “Kei LALPA ka si, ka thupêk zûl u.

³²Ka min thenhlimh mualphoh lah u, Israel mi tla nih ka min thenhlimh zia nan theihtir ding asi. Kei LALPA a nan thenhlimh tir natu chu ka si;

³³nan Pathian si ding hen Aigupta ram ah mi kan suakpi na asi. Kei LALPA ka si,” a ti.