Read Bawm Chin LEVITICUS 24 Bible Online

LEVITICUS 24 - Bawm Chin bible

LEVITICUS 24

¹LALPA nih Mosi chu

²Israel tla rangah hi bang hâwi thupêk tla pêk ding hen a simh. Oliv sariak a ṭha chem mi Puanin ah mi meichêu rangah hawng put u; zeiliau zawng phân zên chêu kumza ding hen.

³Mun Thenhlimh Chem ah mi LALPA umnâk Thudântuk Bâwm mâika ah mi puanzâr lênglei ah Aron nih zânlei kip hen meichêu a kaih lai le, zînglei tiang alh kumza ding hen a kilkâwi lai. Hi dân hi zeiliau zawngah mang kumza ding mi asi.

⁴Aron nih LALPA mâika ah mi ngûn meichêu lakah mi meichêu chu a alh kumza ma ti a zauh ding asi.

⁵Sangvut kilogramme leinih lâk hen sang tlang em mi leinih siam.

⁶LALPA mâika ah mi dawhkân ngûn hen an luanh mi tlûnah paruk paruk hen tlar nih hen siah.

⁷Tlar kipah rimthâw telh le, LALPA sinah eiphung thil ap sang ruangrûl ah si ding hen.

⁸Dinhni kipah zeiliau zawngah sang chu LALPA umnâk ah siah ding asi. Hi hi Israel rianṭuan si kumza ding asi.

⁹Sang chu Aron leh a thlâk tla tingvo asi. Hi hi bâwlpu rang dingah LALPA sinah eiphung ap mi asi ruangah mun thenhlimh ah an ei ding asi.

¹⁰Minung pakhat a pa chu Aigupta mi, a nu chu Israel lakah mi, a min chu Selomit, Dan phun lakah mi Dibri fanu asi. Chu chu minungpa chu Israel mi hen riakmun ah thu anna êl. Thu anna êl liauah chu pa nih chun Pathian rangah siat a barh le, churuangah Mosi sinah an kalpi,

¹²an rêng le LALPA thupêk zei hâwi asi lai ti an ngâk.

¹³LALPA nih Mosi sinah,

¹⁴“Kha minung kha riaknâk mun ah mi lêng ah suah ving u. Siatbarh liau theihtu zawng nih a lû tlûnah an kut thâng na seh, a sual ti theihnâk ding hen, churawhchun zapi nih thi thlo hen lung hen seh na seh.

¹⁵Churawhchun Israel mi tla chu Pathian rangah siatbarhtu zawzawng chu hâwi hen an tuar lai le,

¹⁶thah an si lai ti hen simh na. Israel mi mawh ramdang mi an sinah um mi minung âutal nih LALPA rangah siat a barh chun zapi minung nih lung hen thi thlo an seh ding asi.

¹⁷“Minung thahtu chu âuzawng thah ding asi.

¹⁸Âuzawng mi ran thahtu chu a rulhnawlh ding asi. Thahtu chu thah bâk ding ti hi thupi asi.

¹⁹“Mi nih a hâwipa a liamh chun anih khawm liamh bâk ding asi.

²⁰A ruh a khiak chun khiak bâk ding asi; a mit a châwtir chun a châwtirtu mit châwtir bâk ding asi; ha khiaktu chu anih khawm khiak piak bâk ding asi. Zei nganfâk tal mi nih midang rangah a pêk chun lehrûl sam vima ding asi.

²¹Âuzawng ran thahtu chu a rûlah a pêk ding asi. Sikhawmsele, minung thahtu chu amah khawm thah bâk ding asi.

²²Hi dân hi nan lakah Israel mi khawm ramdang minung nan sinah um mi khawm nih a mang ding asi, Kei LALPA nan Pathian ka si ruangah,” a ti.

²³Mosi nih chu thu chu a sim thluh rawh chun, chu minung chu lênglei ah an suah le, thi thlo hen lung hen an seh. LALPA nih Mosi rangah thu a pêk mi hâwi hen Israel mi tla nih an ti rawh.