Read Bawm Chin LEVITICUS 6 Bible Online

LEVITICUS 6 - Bawm Chin bible

LEVITICUS 6

¹LALPA nih Mosi sinah hi bang dân tla hi a pêk:

²Âuzawng nih mah Israel mi tla lakah thil siah mi khirh thu ah, a fîr piak hen mawh a perpet hen mawh,

³thil thlâu tawng ko hen tawng lo ti hen siat â barh chun LALPA lakah a sual asi, thil ap a pêk ding asi.

⁴Mi âuzawng nih hi bang hâwi hen a sual chun, zumh a kai lo mi ruangah a neih zei tal hen a rulh ding asi. A sualnâk theih asi ni ah tling khap hen a dâwngpu sinah a rulh ding asi, chun nûnah a lei zâ lû ah kul a dân hâwi hen a pêk ding asi.

⁶Rulhnâk ding hen LALPA sinah thil ap pêk ding mi chu bâwlpu sinah a kalpi lai le, chu chu dawrâ mawh kêl mawh a mipa sâwinâk umlo mi asi ding asi. A man chu a dân hâwi hen ruat mi zat asi ding asi.

⁷Bâwlpu nih chu minung sualnâk rang dingah bâwlnâk a ap lai le, ngaihdam asi lai rawh.

⁸LALPA nih Mosi sinah

⁹Aron leh a fapa tla sinah hi bang duahphung ap mi dân tla chu pêk ding hen thu a pêk. Duahphung ap mi chu zân khuadei ver hen mâichâm ah siah ding asi, mei khawm alh kumza ding asi.

¹⁰Churawhchun bâwlpu nih puan mangṭhia â aih mi leh kekawr â ruk lai le, mâichâm tlûnah mi vachâm tla chu maichâm sîrah a siah ding asi.

¹¹Churawhchun a nipuan a thleng lai le, vachâm chu riakmun lenglei, mun thenhlimh ah a va siah ding asi.

¹²Mâichâm tlûnah mi mei chu mittir ding asi lo, alh kumza ding asi. Zing siar hen bâwlpu nih thing a tih lai le, a tlûnah duahphung thil ap a timhtuah lai le, kawmhnâk thil ap thâu chu a duah lai.

¹³Mâichâm tlûnah mei chu zeiliau zawngah a alh kumza ding asi, mittir ding asi lo.

¹⁴Hi bang hi fâng apnâk dân chu asi. Aron thlâk bâwlpu tla nih mâichâm mâika ah LALPA sinah fâng ap mi an pêk lai.

¹⁵Sangvut zapei khat leh sariak rimthâw a lâk lai le, LALPA sinah ap ver mi ti theihnak ding hen mâichâm tlûnah a duah lai. Chu thil ap rim nih chun LALPA a lawmhtir asi.

¹⁶A lei mi vial bâwlpu tla nih an ei lai. Thilnu telh lo hen sang an siam lai le, LALPA umnâk Puanin tualmâi mun thenhlimh ah an ei ding asi. LALPA nih bâwlpu tla rangah eiphung ap mi anmah vo rangah a ruat mi chu asi. Sual ruangah ap mi leh rulh mi thil ap hâwi hen a thenhlimh asi.

¹⁸Zeiliau zawngah Aron thlâk mipa tla nih chun LALPA sinah eiphung ap mi thil chu an vo si kumza hen an ei kho lai. Chu eiphung ap mi chu mi nih an tawngh chun a thenhlimhnâk thiltikhonâk nih nganfâk a pêk lai.

¹⁹LALPA nih Mosi rangah Aron thlâk bâwlpu tla rangah hi bang

²⁰birhtirnâk dân tla hi a pêk. Birhtir hen an um ni ah LALPA sinah thil ap sangvut kilogramme khat, (nisiar fâng ap chu a tam lei zat seng hen) a khing zînglei ah a khing zânlei ah an ap ding asi.

²¹Sariak chawmh hen a hûtnâk bêl ah hût ding, churawhchun phel hen fâng ap thil ap pêk ding asi, chu rim nih chun LALPA a lawmhtir asi.

²²Zeiliau zawngah Aron thlâk Bâwlpu Lalchem rianṭuantu nih hi thil ap hi a pêk kumza ding asi. LALPA sinah duah hep mi bâwlnâk asi ding asi.

²³Bâwlpu si mi nih chu fâng ap mi chu an ei ding asi lo; an duah hep ding asi.

²⁴Sual bâwlnâk dân thu ah

²⁵Aron leh a fapa chu simh na ding hen LALPA nih Mosi rangah thu a pêk. Sual thil ap rang ding mi ran chu mâichâm marlei sîrah duahphung thil ap ah ran an thahnâk mun ah thah ding asi. Chu chu thil ap thenhlimh asi.

²⁶Bâwlpu bâwlnâk ran aptu nih LALPA umnâk Puanin kulh sung mun thenhlimh ah a ei lai.

²⁷Âutal nih mawh zeital nih chu ransa chu a tawngh chun a thenhlimhnâk thiltikhonâk nih nganfâk a pêk lai. Zei nipuan tal ran thî â buaih mi chu mun thenhlimh ah suk ding asi.

²⁸Zei tualbêl tal meh suangnâk chu khuai ding asi, thîr bêl asi chun nâwt vik hen tî hen ṭawl ding asi.

²⁹Bâwlpu dâwngsung mipa vial nih chun hi thil ap hi an ei kho lai, thungâi a thenhlimh asi.

³⁰Sikhawmsele zei thî tal Puanin sungah lûtpi mi sual thiangnâk dingah mang mi chu, chu ran chu an ei ding asi lo; duah ding asi.