Read Bawm Chin LEVITICUS 7 Bible Online

LEVITICUS 7 - Bawm Chin bible

LEVITICUS 7

¹Hi bang hi rulhnâk thil ap dân thenhlimh tak chu asi.

²Ap mi ran chu duahphung ap mi ran thahnâk mâichâm sîr marlei kângah an thah ding asi, a thî tla chu mâichâm kî pali ah theh ding asi.

³A thâu zawzawng chu a lâk lai le, mâichâm ah a ap lai; a sungril tuamtu thâu,

⁴akal leh akal lakah mi thâu, a thin ṭha mi vial lâk hen mâichâm ah ap ding asi.

⁵Bâwlpu nih a thâu zawzawng chu eiphung thil ap ah LALPA sinah mâichâm tlûnah a duah ding asi. Chu chu rulhnâk thil ap asi.

⁶Bâwlpu dâwngsung mipa fa vial nih an ei kho lai le, sikhawmsele thungâi a thenhlimh ruangah mun thenhlimh ah ei ding asi.

⁷Sual thil ap leh rulhnâk thil ap chu â bang cho mi dân pakhat ah mang asi, sâ chu bâwlnâk aptu bâwlpu tâ asi.

⁸Duahphung thil ap mi ran vun khawm chu bâwlnâk aptu bâwlpu vo asi.

⁹Fâng ap mi bêl lakah hût mi mawh, khêng lakah timhtuah mi mawh rial mi mawh chu LALPA sinah aptu bâwlpu vo asi.

¹⁰Suang lo mi fâng ap mi; sariak hen telh mi mawh, rêu mi mawh chu Aron thlâk bâwlpu tla nih zat seng anna ṭhen ding asi.

¹¹Hi hi LALPA sinah kawmhnâk thil ap dân chu asi.

¹²Mi nih lâwmthu simnâk thil ap Pathian sinah a ap chun, ran bâwlnâk ah mi leh thilnu telh loh sang ap mi hen munkhat hen a pêk lai. Oliv sariak hen chawmh mi sang tlang a sah mi mawh, sang rêu oliv sariak telh mi mawh, em mi mawh a pêk ding asi.

¹³Chun, a dang thilnu telh lo mi sang tlang a ap ding asi.

¹⁴A chi kip a khingkhuai vima hen a bîk hen khawlh mi chu LALPA sinah a pêk lai; mâichâm ah ran thî thehtu bâwlpu vo asi.

¹⁵Chu ransa meh chu bâwlnâk pêk ni ah an ei ding asi; a thaituan tiang a leifuan siah ding asi lo.

¹⁶Mi nih a thutiam tlingtir ding hen kawmhnâk thil a ap chun mawh amah duh thu hen a ap mi asi chun, ap ni ah ei hep ding asi lêm lo, a leifuan tla chu a thaituan lei khawmah a ei kho lai.

¹⁷Sâ a lei mi ni thum tiang a um nget rih asi chun duah ding asi.

¹⁸A ni thum ni tiang a ei chun Pathian nih chu minung thil ap chu a pawm lai loh. Chu thil ap chu siar piak asi lai lo le, nâwm hen ngaih asi lai, âuzawng a ei tu chu a tuar lai.

¹⁹Chu sâ chu dân ah a thianglo mi hen telh asi chun, ei ding asi lo, duah ding asi. Âuzawng dân hawi a thenhlimh mi nih sâ chu an ei kho lai.

²⁰Sikhawmsele â thenhlimh lo mi nih a ei chun Pathian mi ah ngaih asi lai lo.

²¹Âuzawng nih dân ah thil thianglo minung mawh ran mawh a tawngh nûnah chu ap mi sâ chu a ei asi chun, Pathian minung ah ngaih asi lai lo.

²²Hi bang dân tla hi

²³Israel mi tla rangah LALPA nih Mosi sinah a pêk. Ran, dawrâ mawh kêl mawh a thâu ei ding asi lo.

²⁴Ran amah thi hen a thi mi mawh, ram sa nih a thah mi mawh a thâu ei ding asi lo, thil dang rang chun mang kho asi lai.

²⁵Mi âuzawng eiphung thil ap LALPA rangah ap mi ran thâu a ei chun, Pathian mi ah ngaih asi lai lo.

²⁶Israel fa le umnâk kipah vâ mawh ran mawh thî ei ding asi lo.

²⁷Âuzawng nih chu dân chu a buar chun Pathian mi ah ngaih asi lai lo.

²⁸LALPA nih Mosi sinah

²⁹Israel fa tla rangah hi bang dân tla hi a pêk. Âuzawng nih kawmhnâk thil ap hawng puttu nih chun thilpêk a bîk hen a khingkhuai LALPA rangah a hawng pêk ding asi.

³⁰Eiphung ap mi hawi hen amah kut ngelchel hen a hawng put ding asi. Ran thâu chu a î-âwm hen a bîk hen LALPA sinah thilpêk hâwi hen a hawng pêk ding asi.

³¹A thâu chu bâwlpu nih mâichâm tlûnah a duah lai le, a î-âwm lam chu bâwlpu vo asi lai.

³²Ran a kê, a vawrhlei kâng a kê chu

³³kawmhnâk thil ap lakah ran thâu leh thî aptu bâwlpu sinah pêk ding asi.

³⁴Ran î-âwm leh a kê chu a bîk hen bâwlpu rang dingah LALPA nih Israel mi tla thawk hen bâwlpu pêk ding hen a lâk mi asi. Hi hi zeiliau zawngah Israel tla nih bâwlpu sinah an pêk ding mi asi.

³⁵Hi hi LALPA sinah eiphung ap mi lakah Aron leh a fapa tla chu bâwlpu ah birhtir an sinâk ni thawk hen an vo chu asi.

³⁶Chu ni ah chun LALPA nih, Israel fa tla chu thil ap lakah mi chu an vo siam ding hen thu a pêk na mi asi. Hi nûnthâi mâilei zawng khawmah Israel mi nih an zûl ding mi dân chu asi.

³⁷Hi bang tla hi duahphung thil ap, fâng thil ap, sual thil ap, rulhnâk thil ap, birhtirnâk thil ap, leh kawmhnâk thil ap dân tla chu asi.

³⁸Ramkaro ah mi Sinai Tlâng ah Mosi nih Israel mi tla rangah an thil ap tla ap ding hen a simh na ni ah LALPA nih hi bang thupêk tla hi Mosi sinah a pêk mi chu asi.