Read Bawm Chin LEVITICUS 8 Bible Online

LEVITICUS 8 - Bawm Chin bible

LEVITICUS 8

¹LALPA nih Mosi sinah,

²“Aron leh a fapa tla chu ka umnâk Puanin tualmâi ah hawngpi na le, bâwlpu thuam, chulh ding mi sariak, chawchal tuai sual thil ap rang ding mi, dawrâ chal panih, sang thilnu telh lo bâwm hawng put.

³Mi zapi tla zawzawng chunah hawng a pûm ding hen kawh na,” a ti.

⁴Mosi nih LALPA thupêk hâwi hen a ti le, zapi tla an hawng a pûm rawh chun an sinah,

⁵“Tuah ka ti ding mi hi LALPA thupêk asi,” a ti.

⁶Mosi nih Aron leh a fapa tla a kalpi na le, dân hâwi hen tak khawlh ding hen a simh na.

⁷Aron chu kawrdawh leh kawrfual a ruktir le, tâisâwm puan hen a tâi a menh. Ephod a bah le, a tâi chu puan mangṭhia tah mi tâisâwm hen a sâwm.

⁸Ṭâng bêk a ṭângah a bêk le, Urim leh Thummim a thlaih.

⁹A lû ah upâwng â pawnh, a mâilei kângah ngûn thuamhnâk a bêk, chu chu LALPA nih thu a pêk mi hâwi hen apnâk thenhlimh singsiahnâk asi.

¹⁰Mosi nih chulh ding mi sariak chu a lâk le, LALPA umnâk Puanin leh a sungah mi thil zawzawng chu a buaih; hi hâwi hen zeizawng chu LALPA sinah a ap.

¹¹Sariak a lâk le, mâichâm leh a thuamthil, mâihûm leh a tohnâk, LALPA sinah ap hen vei sarih a theh.

¹²Aron chu a lû ah sariak thuh hen a birhtir.

¹³Churawhchun Mosi nih Aron fapa tla chu a kalpi na, le, kawrdawh a ruktir na, tâi sâwmnâk puan a menh na, lukhuh a khuh na, LALPA nih thu a pêk mi hâwitê hen.

¹⁴Mosi nih chawchal tuai sual thil ap rang ding hen a put le, Aron leh a fapa tla nih a lû ah an kut an thâng.

¹⁵Mosi nih a thah le, a thî chu a lâk le, apnâk ding hen a kutdawng hen mâichâm kî tla a chulh. A dang vial chu mâichâm bul ah a thlêt. Hi hâwi hen a ap le, a thenhlimh rawh.

¹⁶Mosi nih a sungril thâu zawzawng, a thin a ṭha mi, akal leh a thâu chu a lâk le, mâichâm tlûnah a duah.

¹⁷Mosi nih LALPA thupêk hâwi hen a leifuan zawzawng, a vun, a sâ, a riltê tla chu riakmun lênglei ah a duah.

¹⁸Churawhchun, Mosi nih duahphung thil ap rangah dawrâ chal a put le, Aron leh a fapa tla nih a lû tlûnah an kut an thâng.

¹⁹Mosi nih a thah le, mâichâm kî pali lakah a thî a theh.

²⁰LALPA nih thu a pêk mi hâwi hen a chan dip le, a sungril tla leh a kê tla chu tî hen a ṭawl, a lû leh a thâu leh a leifuan zawzawng mâichâm ah a duah. Hi duahphung thil ap hi eiphung thil ap chu asi. Chu rim nih chun LALPA a lawmhtir.

²²Mosi nih dawrâ chal panihnâk a lâk, chu chu bâwlpu birhtirnâk asi. Aron leh a fapa tla nih an kut a lû tlûnah an thâng.

²³Mosi nih a thah le, a thî chu a lâk le, Aron vawrhlei nakhaw, a vawrhlei kutpî, a vawrhlei kepî lakah a buaih.

²⁴Aron fapa tla khawm chu a kalpi na le, an vawrhlei nakhaw ah leh an vawrhlei kutpî leh an vawrhlei kepî ah thî a buaih na. A dang a lei mi thî vial chu mâichâm kî li sîrah a theh.

²⁵A mei thâu, a sungril thâu, a thin a ṭha mi, akal leh a thâu a vawrhlei kê a lâk.

²⁶LALPA sinah ap mi sang thilnu telh lo bâwm lakah mi tlang khat, sang sariak telh mi tlang khat, sang rêu tlang khat a lâk le, a thâu leh a vawrhlei kê tlûnah a siah.

²⁷Chu zawng eiphung tla chu Aron leh a fapa tla kut ah a pêk le, a bîk hen LALPA sinah thilpêk rangah an pêk.

²⁸Mosi nih anmah sin thawk ber hen a lâk le, birhtirnâk thil ap rang dingah duahphung thil ap mâichâm tlûnah a duah. Hi hi eiphung thil ap asi, chu rim nih chun LALPA a lawmhtir.

²⁹Mosi nih a î-âwm chu a lâk le, a bîk a thilpêk si ding hen LALPA sinah a pêk. Birhtirnâk ah dawrâ chal mang mi chu Mosi tingvo asi. Mosi nih LALPA thupêk hâwi hen zeizawng a ti ver.

³⁰Mosi nih sariak leh thî mâichâm tlûnah mi a lâk le, Aron leh a fapa tla leh an nipuan chu a theh. Hi hâwi hen anmah leh an nipuan tla chu LALPA sinah a ap.

³¹Mosi nih Aron leh a fapa tla sinah, “LALPA thupêk hâwi hen sâ hi LALPA umnak Puanin tualmai ah kalpi ule, chunah chun suang u, birhtirnâk thil ap bâwm lakah mi sang hen chu mun ah chun ei u.

³²Sâ mawh sang mawh a lei mi chu duah hep u.

³³Chu Puanin tualmâi chu ni sarih kar birhtir nan sinâk dân â lîm lân lo chu nan suak kho ding asi lo.

³⁴Hi nan sual thiang ding hen tusûn ni ah kan ti mi hi LALPA nih thu hawng kan pêk mi asi.

³⁵Ni sarih kar chu LALPA Puanin tualmâi ah a sûn a zân hen nan um lai le, LALPA nih thu an pêk na mi chu nan ti lai. Nan tilo chun nan thi lai. Chu chu LALPA nih thu hawng ka pêk mi asi,” a ti.

³⁶Aron leh a fapa tla nih Mosi mang hen LALPA nih thu a pêk na mi zawng chu an ti.