Read Bawm Chin LEVITICUS 9 Bible Online

LEVITICUS 9 - Bawm Chin bible

LEVITICUS 9

¹Birhtirnâk rian a lîm nûnah Mosi nih Aron leh a fapa tla leh Israel ruitu tla a kawh na.

²Aron sinah, “Chawchal tuai leh dawrâ chal simsâwi kawp lo mi lâk le, chawchal chu sual thil ap, dawrâ chal chu duahphung thil ap ah LALPA sinah ap rawh.

³Churawhchun Israel mi tla chu sual thil ap ah kêl chal, chaw lâ kum khat mi leh dawrâ fa kum khat mi simsâwinâk umlo mi duahphung thil ap rang dingah,

⁴chawchal leh dawrâ chal chu kawmhnâk thil ap rang dingah hawng put ding hen simh na. LALPA sinah bâwlnâk chu fâng ap mi sariak hen chawmh mi an ap ding asi. Tusûn ah an sinah LALPA a hawng a langh awt ruangah hi hi an ti ding asi,” a ti.

⁵Mosi nih thu a pêk na mi hâwi hen Puanin mâiah an hawng put ver. Mi zapi zawzawng chu chunah LALPA sawnh ding hen anna pûm.

⁶Mosi nih, “LALPA nih a chêu nan sinah a hawng langh khonâk ding hen hi bang zawzawng hi ti ding hen thu an pêk na asi,” a ti.

⁷Churawhchun Aron sinah; “Mâichâm ah va kal le, na sualnâk leh zapi sualnâk thiangtir ding hen sual thil ap leh duahphung thil ap va ap rawh. LALPA nih thu an pêk mi hâwi hen mi zapi tla sual thiang ding hen hi thil ap hi va pêk rawh,” a ti.

⁸Aron chu mâichâm ah a va kal le, amah sual thil ap rang dingah chawchal a thah.

⁹A fapa tla nih thisen chu an hawng pêk le, anih nih a kutdawng a nîm le, mâichâm kî chu a chulh, a dang vial chu mâichâm bul ah a thlêt.

¹⁰LALPA nih Mosi sinah thu a pêk mi hâwi hen, a thâu, akal, a thin a ṭha mi mâichâm tlûnah a duah.

¹¹A sâ leh a vun chu riakmun lênglei ah a duah.

¹²Ran chu mah rangah duahphung thil ap rangah a thah. A fapa tla nih thisen chu an hawng put le, mâichâm kî pali lakah a theh.

¹³A lû leh ransa neknâwi tla chu an pêk le, mâichâm tlûnah a duah.

¹⁴Churawhchun, a sungril tla leh a kê tla a ṭâwl le, duahphung ap mi a lei mi tla hen mâichâm tlûnah a duah.

¹⁵Chu nehnûnah zapi tla thil ap chu a pêk. Kêl chu zapi sual rangah a lâk le, a thah le, a ap, amah sual rangah a ap mi hâwitê hen a ti.

¹⁶Ran duahphung thil ap rang dingah a hawng put mi khawm chu dân hâwitê hen a ap,

¹⁷Fâng ap mi chu a pêk le, zapei khat sangvut a lâk le, mâichâm tlûnah a duah. (Nisiar hen duahphung thil ap lakah sap mi asi.)

¹⁸Dawrâ chal leh chawchal zapi rangah kawmhnâk thil ap rangah a thah. A fapa tla nih thisen chu an hawng pêk le, mâichâm kî pali lakah a theh.

¹⁹Aron nih chawchal leh dawrâ chal thâu khingkhuai

²⁰chu ran î-âwm tlûnah a siah le, mâichâm ah a put hep. Mâichâm tlûnah a duah le,

²¹Mosi nih thu a pêk hâwi hen a î-âwm a vawrhlei kê chu bâwlpu rang dingah LALPA sinah a bîk hen a pêk.

²²Aron nih bâwlnâk zawzawng a ti thluh rawh chun, zapi tla tlûnah a kut a phar le, mal a sâwm na, churawhchun a ṭum rawh.

²³Mosi leh Aron chu LALPA umnâk Puanin ah an va lût le, an hawng suak rawh chun zapi tla mal an sâwm na. LALPA chêu chu zapi zawzawng sinah a hawng lang rawh.

²⁴Lâkkhat ko ah LALPA nih mei a hawng thlâk le, mâichâm tlûnah duahphung thil ap leh a thâu chu a kâng hep. Chu chu zapi tla nih an muh le, an ektê hen an âu le, tual leiah an buk hep.