Read Bawm Chin JEREMIA 13 Bible Online

JEREMIA 13 - Bawm Chin bible

JEREMIA 13

¹LALPA nih kal hen puannêm tâwi tla menh dingah keimah nih châwk ding hen hawng ka simh le, sikhawmsele tî lak lam chun siah lah hawng ka ti.

²Churawhchun ka châwk le, ka menh rawh.

³Churawhchun, LALPA nih hawng ka sawnh nawlh le,

⁴“Eufretis Tiva ah va kal le, puannêm tâwi tla chu lungpi kua ah va thuh na,” a ti.

⁵Churawhchun ka va kal le, Eufretis Tiva kiangah ka thuh na.

⁶A nehnûn dauh chun, LALPA nih Eufretis Tiva leiah va kîr le, puannêm tâwi tla va lâk nawlh hawng ka ti.

⁷Churawhchun ka kîr le, ka thuhnâk mun ah mi chu ka va muh le, â râwk hep, a ṭha rerêng lo rawh.

⁸Churawhchun, LALPA nih hawng ka sawnh nawlh.

⁹“Hi hi Juda leh Jerusalem zumhnâk rokual tak ka veih ding mi dân chu asi.

¹⁰Hi misual tla nih ka thu an ngâi lo. An lungkhung hen an sual kumza, phundang pathian tla sawnh hen a rian an ṭuan. Chu hâwi hen hi puannêm tâwi tla a ṭha lo rawh mi hâwi an si lai rawh.

¹¹Hi puannêm tâwi tla tâi ah bir tak hen menh an si hâwi hen Israel leh Juda mi chu ka lakah bir tak hen tleih thlir na ding ka tum. Churuang chun ka mi tla, keimah sawrtu leh ka min zahtu ding an si ruangah hi hi ka ti mi asi le; sikhawmsele ka thu an ngâi duh lo,” a ti.

¹²LALPA nih ka sinah, “Jeremia, Israel mi tla chu uain dûr kipah uain hâng râwn ding hen simh na. Uain dûr zawzawng uain hâng râwn ding chu kan theih ko ti hen an sâng lai.

¹³Churawhchun, kei LALPA nih hi ram minung David thlâk a mi lalchem tla, bâwlpu tla, khuavâng tla, Jerusalem mi zawzawng tla an rî lân lo chu uain ka dinh na awt.

¹⁴Churawhchun uain dûr hâwi hen anmah tla a upa a ngâksia mi bang cho hen kuai dip hen anmah leh anmah ka khâwng na lai. Ka thah na ding mi chu pawi tinâk, lungkhamnâk leh khuaruatnâk nih a hawng ka kham lai lo,” a ti.

¹⁵Israel mi tla, LALPA nih thu a sim! Nâu tak hen um ule, a thu ngâi u.

¹⁶LALPA nan Pathian nih, mûinâk a tlungtir lânah leh tlâng tlûnah nan tlû lânah, chêu nan lungum mi chu mûinâk sah chem asi lânah amah chu zah u.

¹⁷Nan ngâi lo mi asi chun, nanna zûm mi ruangah a thuptê hen ka ṭap lai le; LALPA mi tla sal ah kalpi hep an si ruangah lungfâk tak hen ka ṭap lai le, ka mitthli a luang lai.

¹⁸LALPA nih ka sinah, “Lalchem leh a nu chu an lallukhuh dawh tak an lû lakah mi a tlâ rawh ruangah an laltophah ah mi chu ṭum ding hen simh na.

¹⁹Simlei kângah mi Juda khuapi tla chu hual hen a um rawh le; âukhawm an sinah kal kho asi lo rawh. Juda mi zawzawng tla chu sal ah put hep an si rawh,” a ti.

²⁰Jerusalem, zauhnik! Na mêlma tla marlei thawk hen an hawng! Nangmah vêngtu ah na rinhsan mi tla leh na mi na putso mi tla zeiah an um rawh?

²¹Na hâwikawmh ah na ruat na mi nih an neh hen na tlûnah lâi an rêl tikah zei thu na sim awt rawh ne? Nunau faring liauah nganfâk a tuar mi hâwi na si lai.

²²Zeirangah hi bang hi ka lakah a hawng tlung--zeirangah ka nipuan tla a tlêk hen tleihrêm hen ka um na ti mi asi chun na sual a fâk tuk ruangah asi.

²³Mi dum nih a vun a dangtir kho hen keitê nih a ṭial a veih kho mazei? Chu hâwi an ti kho asi chun, nang thilsual cho lo chu zeikhawm tilotu nih thil dik ti ding na theih kho lai.

²⁴Ramkaro thli nih fapawn a ranh phin mi hâwi hen LALPA nih a nan rek phin lai.

²⁵Hi hi na thihnâk ding mi asi a ti. Amah na philh hen pathian diklo tla na zumh ruangah chu chu na lakah tlung ding hen a ruat mi asi.

²⁶LALPA amah tak nih na nipuan an lît piak lai le, ningzakkâi tak hen an umtir lai.

²⁷A hua mi thil na ti mi chu a muh rawh. Mi nih a zâwlbâwm nupi a ngarh mi hâwi leh rang phawl nih a nunau a zûl mi hâwi hen tlâng ah leh phâisen ah lunglotu pathian tla na zûl mi a nan muh. Jerusalem mi tla, nan vânduai rawh! Zeitik riamruam me na thiang awt?