Read Bawm Chin JEREMIA 15 Bible Online

JEREMIA 15 - Bawm Chin bible

JEREMIA 15

¹Churawhchun LALPA nih ka sinah, “Mosi leh Samuel men hinah dîr hen hawng ka ngiar na khawmsele, hi minung tla lakah khua ka ruat kho awt lo. Kaltir ving na le; ka mitmuh ah mi suah ving na.

²Zeiah kan kal lai ti hen a nan deih chun, keimah nih ka sim rawh mi kha simh na: A zeimaw mi chu râi lakah thi ding mi an um, chu chu an kalnâk ding mi asi. A zeimaw mi chu râltuknâk ah thi ding mi an um, chu chu an kalnâk ding mi asi! A zeimaw mi chu sungvâng hen thi ding mi an um, chu chu an kalnâk ding mi asi! A zeimaw mi chu sal ah put ding mi an um, chu chu an kalnâk ding mi asi!

³Kei, LALPA nih, thil ṭihnungkâi pali an sinah hawng tlung ding hen ka ruat rawh: tuknâk ah an thi lai le, ui nih an ruak a thiar lai le; va tla nih an ei na lai, an eibang chu ramsa tla nih an ei hep lai.

⁴Hezekiah fapa Manaseh nih Jerusalem ah Juda lal a si liauah thil a ti mi ruangah, laikulh mi zawzawng muhnâk ah duksâ sûm rê hen ka siam na awt,” a ti.

⁵LALPA nih, “Jerusalem mi tla, âu nih pawi a nan ti awt, âu na lakah a ngaihsia awt? Âu nih nang rangah na umdân deih ding hen an ngâk châwk awt?

⁶Nannih zapi tla nih nan ka duh lo hen dunglei nan hawng ka sît. Churuangah ka thinthawknâk ka sûm châwk lo le, ka bân ka phar le, ka nan veih na rawh.

⁷Ram sungah khuapi kipah fapawn hâwi hen thli lakah ka nan lawnh na. Ka mi tla, nan thilsual ti nan bâng duhlo ruangah ka nan veih na le, nan fa tla ka thah na.

⁸Tipi kapah mi risep ngâk hen nan ram ah mi numei tla an tam dauh rawh. Nan tlangvâl tla chu an ṭhat liauah ka thah na le, an nu tla ka tuartir na. Lungdawnghnâk leh ningṭihnâk hen ka vuak chawlh na.

⁹A fa pasarih nih an veitâk mi nu chu a uai tlek le, a thâw men a suah kho lo. A rangah sûn chu zân ah â chang rawh; ningzak saih hen a um le, a thinlung a fâk. Nan dam rih mi tla khawm nan mêlma tla kan thahtir na awt. Kei, LALPA nih ka sim asi,” a ti.

¹⁰Ka lawk a sawng a! Zeirangah ka nu nih laikulh ah hawng ka ring êu? Ram lakah minung hen tawh leh thu êl ding mi cho ka si rawh. Âu sin khawm tangka ka pûk hen ka lâng lo; sikhawmsele mikip nih siat an hawng ka barh.

¹¹LALPA, na rian ṭhadek ka ṭuan lo hen ka mêlma tla an lawksawng hen anna hamh mi rangah ka ngiar piak na lo mi asi chun, an siatbarh tla chu tlung ngelchel seh.

¹²(Marlei thawk hen thîr a bîk hen dâr hen chawmh mi chu âukhawm nih a khiak kho lo.)

¹³LALPA nih ka sinah, “Ram pumpi ah ka mi tla nih thilsual an ti ruangah, anmah rêpnâk ding hen an neih leh an rothil tla lâk piaktu ding hen mêlma tla ka fial awt.

¹⁴Ka thinthawknâk chu mei hâwi hen a alh kumza ruangah an theih dah lonâk ram ah mi an mêlma tla rianṭuantu ah ka siam na awt,” a ti.

¹⁵Churawhchun, kei nih, “LALPA, nangnih na theihthiam. Hawng ka theihkumza le, hawng ka ṭangpi rawh. Hawng ka nehsawhtu tlûnah lehrûl hawng ka sam piak. Thah kho ding hen an hawng ka awttu tla lakah chun a dawnh tuk lah. Nangmah ruangah zauhnawmh ka si mi hi theihkumza.

¹⁶Ka sinah thu na sim mi zawzawng chu ka ngâi ver. LALPA Zeizawng tikho, na tâ ka si, churuangah na thu nih chun ka thinlung ah lâwmnâk leh lâwptlonâk a khattir.

¹⁷Ka tik tla chu midang tla sinah nihnâk leh tik ṭha ah ka mang lo. Na thupêk lakah ê-aw ngâi tak hen ka um le, thinthawknâk hen ka khat.

¹⁸Zeirangah ka tuar kumza nget rih? Zeirangah ka mâ a dam dah lo? Zeirangah an damtir dah lo? Ṭhalpini ah tiva a kang mi hâwi hen lungdawngtir ding ma na ka awt?” a ti.

¹⁹Hi thu lakah LALPA nih a leh le, “Na hawng kîr mi asi chun, ka nan lâk nawlh lai le, ka to-aw na si nawlh lai. Thu âtkâi sim ngâk hen thuchah mang tlâk na phuang chun, ka khuavâng na si nawlh lai. Mi tla chu na sinah an hawng kîr nawlh lai le, an sinah nang va kal a herh lai lo.

²⁰An theih kho ding hen dâr kulh vâm hâwi hen ka nan siam lai. An do lai le, sikhawmsele an neh lai lo. Na sinah an vêng ding leh hum ding hen ka um lai.

²¹Misual leh veihtu lakah mi ka nan hum lai. Kei, LALPA nih ka sim asi,” a ti.