Read Bawm Chin JEREMIA 17 Bible Online

JEREMIA 17 - Bawm Chin bible

JEREMIA 17

¹LALPA nih, “Juda mi tla, nan sualnâk chu thîr kâwnglâwng fung hen rîn asi le; nan thinlung ah leh nan mâichâm ki ah lungsung zum hen ker si.

²Nan mi tla nih chun pathiannu Aserah chu tlâng tlûnah mi thing ring kipah leh mâng ah mi tlâng tlûnah an siah le, mâichâm ah an sawnh.

³Nan ram pumpi ah sual zawzawng nan ti mi ruangah nan mêlma tla chu nan neih leh nan thil-le-rî lak piaktu ah ka siam awt.

⁴Ka thinthawknâk chu mei hâwi hen a alh kumza awt ruangah ram ka nan pêk na mi chu nan dawk lai le, nan theih dah lonâk ram ah nan mêlma tla rianṭuantu ah ka nan siam na lai,” a ti.

⁵LALPA nih, “Ka lakah mi hawng ka hawitâk hen minung a thi kho mi chaknâk ah â ngauh mi chu ka mawhtir awt.

⁶Chu minung chu ramkaro ah thing bû tual châr lakah leh tual al thildang zeikhawm keuh kholonâk mun ah mi hâwi asi. Chu minung sinah chun thil ṭha zeikhawm a tlung lai lo.

⁷“Sikhawmsele keimah hawng ka zumhtu lam chu mal ka sâwm lai.

⁸Tiva kiangah thing a kho mi, tî lakah ram a thlâk mi hâwi asi lai. Ni khua khêu khawm a ṭih lo, a nah khawm a ring kumza ruangah; ruah sûr lah khawmsele a uai lêm lo; a rah a suah kumza.

⁹“Âu nih minung thinlung theih kho? Chu tluk hen perpet mang thil dang zeikhawm a um lo; damh ding hen a zual tuk rawh.

¹⁰Kei, LALPA nih, minung thinlung tla chu ka hâwl le, Ka nik rawh. An umdân leh an thilti zia hâwi vima hen ka ti na,” a ti.

¹¹Mi, zumhkâilo tak hen tangka tawngtu chu, va, amah ti silo mi awptu hâwi asi. A san lâi liauah a neih chu a vei lai le, a dawnghnâk ah zeikhawm silo hen mi â hâwi asi lai.

¹²Kan Biakin chu a tîr thawk hen laltophah rokual tak tlâng sâng tlûnah tauh mi hâwi asi.

¹³LALPA, nang chu Israel lungumnâk na si le; nang rangah an kaltâktu zawng chu ningzak saih hen an um lai. Nang, LALPA tinungva thar a nan kaltâk ruangah phildip lakah min rîn hâwi hen an vei lai.

¹⁴LALPA, hawng ka damh le, tliang ver hen ka dam lai; hawng ka hum le, him tak hen ka um lai. Ka nan sawr mi chu nang na si!

¹⁵Mi tla nih, ka sinah, “LALPA, nih hawng kan ṭhihnâk tla kha a zeiah? Tuah hawng langh seh,” an ti.

¹⁶Sikhawmsele, LALPA, an lakah siatnâk na tlungtir ding hen ka nan fawrh lo, an rangah nawknâk tik hawng tlung ding khawm ka duhpi na lo. LALPA chu chu nangmah nih na theih le, thu ka sim mi tla khawm na theih.

¹⁷Ka rangah ṭihnungkâi hen um lah le; nang chu lawksawngnâk tlung liauah ka himnâk mun na si.

¹⁸Hawng ka nehsawhtu chu ningzak saih na le, LALPA, kei lam chu hawng ka zuah rawh. Annih chu ningṭih hen khattir na le, sikhawmsele kei lam chu hawng ka lâutir lah. An lakah siatnâk tlungtir le, sâm dip na.

¹⁹LALPA nih ka sinah, “Jeremia kal le, zapi tla kulh kawtkâ Juda Lalchem tla lûtnâk leh suaknâk ah ka thuchah va sim rawh; churawhchun Jerusalem kulh kawtkâ dang khawmah va kal ver.

²⁰Lalchem tla leh Juda mi zawzawng leh Jerusalem ah um mi mikip tla leh hi kulh kawtkâ lût mi tla nih ka thusim ngâi ding hen simh na.

²¹Nung ding an duh chun Dinhni ah zei thilrit khawm an phurh ding si lo; Jerusalem kulh sungah zeikhawm an put hen an lûtpî ding asi lo,

²²an in thawk hen khawm Dinhni ah zeikhawm an suakpi ding asi lo ti simh na. Dinhni ah rian an ṭuan ding asi lo; an thlâktu tla rangah thu ka pêk na mi hâwi hen ni thenhlimh hâwi hen an ulh ding asi.

²³An thlâktu tla nih ka thu an ngâi duh lo le, zeikhawm an siarlo. Chu hâwi ding ngâk hen an lung a khung; ka thu an ngâi duh lo hen theih ding an duh lo.

²⁴“Chubang zapi tla chu ka thupêk zûl ding hen simh na. Dinhni ah hi khuapi kulh kawtkâ ah zei thilrit khawm an lûtpi ding asi lo. Dinhni chu thenhlimh tak hen an ulh ding asi, rian zeikhawm an ṭuan ding asi lo.

²⁵Chu tikah lalchem tla leh an fa tla chu Jerusalem kulh kawtkâ ah lût hen David nih a nei mi hâwi lal thiltikhonâk anna ting lai. Juda mi tla leh Jerusalem mi tla chu munkhat hen kari leh rang tla lakah anna chuan lai le, Jerusalem khuapi chu mi an khat dul kumza lai.

²⁶Mi zapi tla chu Juda khuapi tla leh Jerusalem khua kiangkam mi khuatê tla thawk hen an hawng lai le, Benjamin ram thawk hen, tlâng bul tla thawk hen, tlâng sâng thawk hen, Juda ram simlei thawk hen an hawng kal lai. Ka Biakin ah duahphung thil ap leh bâwlnâk tla, fâng thil ap leh rimthâw tla, lâwmthu simnâk thil ap tla an hawng put lai.

²⁷Sikhawmsele, ka thu an zûl hen Dinhni chu thenhlimh tak hen an ulh ding asi. Chu ni ah chun Jerusalem kulh kawtkâ ah zei thilrit khawm an lûtpi ding asi lo, an lûtpi chun Jerusalem kulh kawtkâ chu mei hen ka duah awt. Mei nih chun Jerusalem ah lal in tla a khangh lai le, âukhawm nih mih kho asi lai lo,” a ti.