Read Bawm Chin JEREMIA 18 Bible Online

JEREMIA 18 - Bawm Chin bible

JEREMIA 18

¹LALPA nih ka sinah,

²“Thu ka nan simhnâk ding mun bêlhêmtu in ah va kal,” hawng ka ti.

³Churawhchun, chunah ka va kal le, bêlhêmtu nih bêl a hêm liau ka muh.

⁴Zeiliau zawngah hêm ding valei chu a ṭha tâwk lo chun thil dangah a valei chu a siam ving.

⁵Churawhchun, LALPA nih ka sinah,

⁶“Israel mi tla, bêlhêmtu nih valei a duh duh hen a ti hâwi hen an ti na ding hen thu ka nei lo mazei? Bêlhêmtu kut ah valei a um mi hâwi hen ka kut ah um mi nan si.

⁷Zeiliau zawngah ka phâwi awt, ka râwk awt, lalram leh phun tla khawm ka râwk awt ti rawh menza khawmsele,

⁸chu phun tla nih an thilsual ti an bâng chun, ti ding ka ti lai ka ti mi chu ka ti awt lo.

⁹Chu lo khawmah phun tla leh lalram tla chu ka phun hen ka dirh lai ti menza khawmsele,

¹⁰chu phun tla nih chun ka thu ngâilo hen thilsual an ti chun, ti ding hen ka sim mi chu ka ti awt lo.

¹¹Tuah Juda mi leh Jerusalem mi tla chu anmah rêp na ding hen ka tum mi chu ka timhtuah zet rawh ti simh na. An umdân sual tla bâng hen an thilti tla lêt ding hen simh na.

¹²Annih nih an sâng lai le, ‘Bâng rîlmâl lah, zeirangah kan bâng êu lai? Kan duh zia zia hen ê-aw ngâilo tak hen thilsual kan ti awt,’” an, ti lai.

¹³LALPA nih, “A lânah chubang hâwi thil a hawng um mi kip tla chu phun kip rangah deih na. Israel mi tla nih thil ṭihnungkâi tak an ti!

¹⁴Lebanon tlâng sâng lungruk mun chu vûr tlâ lo hen a um dah tâwn ma? A tlâng sâng kîk tak ah mi tiva chu a kang dah tâwn ma?

¹⁵Sikhawmsele ka mi tla nih an ka philh le; milem tla sinah rimthâw an duah. An kalnâk ding mi lampi ah an tlû le, lampi li tla ah kal lo rawh hen singsiahnâk umlo mi lampi ah an kal rawh.

¹⁶Hi ram hi ṭihnungkâi leh zauhnawmh kumza ding hen an siam. A paltu zawng nih an muh hen an lâu khit lai le; chê ti hen an lû an lei lai.

¹⁷Ka mi tla chu an mêlma mâika ah Saklei thli nih valeidip a sêm mi hâwi hen ka rektir phin na lai. Dunglei ka sît na lai le; siatnâk a hawng tlung tikah ka ṭangpi na awt lo,” a ti.

¹⁸Churawhchun, mi tla nih, “Jeremia thu ah hin zei thil mawh kan ti lai! Bâwlpu tla nih hawng kan sîntir kumza lai le, mifing tla nih ti dân hawng kan simh lai, khuavâng tla nih Pathian thuchah an sim lai. Amah rang ah hêk hen a thusim kan ngâi piak lai lo rawh,” an ti.

¹⁹Churawhchun, thla ka cham le, “LALPA, thu ka sim mi hi ngâi le, ka mêlma tla nih ka thu an sim mi chu ngâi rawh.

²⁰Thil ṭha hi thilsual hen leh ding ma asi? Sikhawmsele, ka tlâknâk ding hen khur an chawh. Na thinthawk hen an tlûnah thil na ti lonâk ding hen, na sinah hawng hen anmah ruangah thu ka sim mi tla theihkumza rawh.

²¹Sikhawmsele, tu lam chu LALPA, an fa tla chu sungvâng hen thitir na le; annih tla lam chu râltuknâk ah thah na. Nunau tla chu an pasal leh an fa tla nih tlâu tâk na seh; mipa tla chu râi lakah thi tir na le, tlangvâl tla chu râltuknâk ah thah hen um na seh.

²²Theihthiamnâk umlo thlo hen, an in rawktu ding mi zapi fial khup na le; lâu hen ṭaptir na. Ka tlâknâk ding hen khur an chawh le, hawng ka awh ding hen thang an tunh.

²³Sikhawmsele, LALPA, thah ding hen an ka tum mi tla na theih asi. An thilsual ti chu ngaihdam lah na le, an sualnâk tla khawm ngaihdam lah na. Neh ding hen siam na le, na thinthawk liauah do na rawh,” ka ti.