Read Bawm Chin JEREMIA 19 Bible Online

JEREMIA 19 - Bawm Chin bible

JEREMIA 19

¹LALPA nih tual bêl châwk ding hen va kal hawng ka ti. Zapi lakah upa zeimaw mi tla, leh bâwlpu upa dauh zeimaw mi tla,

²put na hen bêl kuai kawtkâ pal hen Hinom Vakuam ah kalpi na ding hen hawng ka simh. Chunah thu hawng ka simh ding mi chu kei nih phuang ding hen.

³LALPA nih sim ding hen thu hawng ka simh le, “Nannih Juda lalchem tla leh Jerusalem khua mi tla, kei LALPA Zeizawng tikho, Israel Pathian, nih thu ka sim ding mi hi ngâi u. Hi mun ah hin siatnâk ka tlungtir awt, âuzawng chu thu theihtu chu a â thlo lai.

⁴Mi nih hawng ka kaltâk hen pathian dang tla, an thlâktu tla leh Juda lalchem tla khawm nih an theih lo thlo mi pathian tla sinah bâwlnâk ap hen hi mun hi an nawmh ruangah hi hi ka ti awt mi asi. Hi mun hi sual neilo mi minung thisen hen an khattir le,

⁵an fa tla chu bâwlnâk ah mei ah duah ding hen Baal rangah mâichâm an siam. Chubang ti ding hen kei nih thu ka pêk na dah lo; ka thinlung khawmah a um dah lo.

⁶Churuangah hi mun hi Tophet mawh Hinom Vakuam mawh ti lo rawh nâk ding tik a hawng tlung awt. Chu hâwi ti ngâk hen Thahnâk Vakuam ti hen theih asi lai.

⁷Hi mun ah hin Juda mi tla leh Jerusalem thiltum zawzawng chu ka tlawlhtir na lai. An mêlma nih neh hen ka siam na lai le, râltuknâk ah an thah na lai. An ruak tla chu va leh ramsa tla râwl ah ka pêk lai.

⁸Chubang hâwi siatnâk ṭihnungkâi chu hi khuapi tlûnah ka tlungtir lai le, a paltu zawng an thinlung a purh hen chê an ti lai.

⁹Mêlma nih khuapi chu an kulh lai le, a mi tla thah ding an tum lai. Chu khua an hual mi chu ṭihnung a kâi tukah khuapi sungah mi tla chu anmah leh anmah anna ei lai le, an fa tla tiang an ei lai,” a ti.

¹⁰Churawhchun LALPA nih, ka sinah, tual bêl chu na sinah an hawng mi tla mâika ah khuai phet le, LALPA Zeizawng tikho nih simh na ding hen hawng ka simh le,

¹¹“Hi khuapi leh minung tla hi ka râwk awt, hi tual bêl a kuai le, remh kho asi lo rawh mi hâwi hen a um lai. Hi mun leh mun dangah anmah vûinâk a um awt lo ruangah an ruak tla chu Tophet mun ah khawm an vûi na lai.

¹²Hi khuapi leh a sungah luahtu tla chu Tophet hâwi hen siam na ding hen thu ka tiamh.

¹³Jerusalem a mi in tla, Juda lalchem in tla, ârfi sawnhnâk ding hen a in tlûnah rimthâw duahtu tla zawzawng leh pathian dang tla sinah ap hen uain tawihtu tla zawzawng chu Tophet hâwi hen an nâwm ver lai,” a ti.

¹⁴Hi thuchah sim ding hen LALPA nih hawng ka fialnâk Tophet chu ka kaltâk rawh. Ka kal le, Biakin kulh sungah ka va dîr le,

¹⁵LALPA Zeizawng tikho, Israel Pathian nih hawng ka simh mi thu zapi minung zawzawng ka simh na, “Ka thusim ngâi duhlo hen nan lung a khung ruangah, hi khuapi leh a kiangkam mi khua tênâu lakah rêpnâk zawzawng ka tlungtir lai ka ti mi chu ka hawng tlungtir awt, a ti,” ti hen.