Read Bawm Chin JEREMIA 2 Bible Online

JEREMIA 2 - Bawm Chin bible

JEREMIA 2

¹LALPA nih Jerusalem ah mi mikip sinah

²hi thuchah hi phuang ding hen hawng ka simh. “Na ngâksia liauah zumh na kâi zia tla kanna umhtîr liauah na ka dâwt zia tla; ramkaro ah vât dahlo mi ram ah na hawng ka zûl mi tla kha ka theihkumza.

³Israel, keimah tâ cho na si; keimah neih thenhlimh na si. Nangmah nganfâk an pêktu tlûn kipah tuarnâk leh siatnâk ka tlungtir. Kei, LALPA nih ka sim mi asi,” a ti.

⁴Nannih Jakob thlâk tla, nannih Israel phun tla, LALPA thuchah ngâi u.

⁵LALPA nih: “Nan thlâktu tla nih hawng ka phiar ding hen zei an ti? Zei nih ka sinah mi kâng dang leiah a hertir na? Zeikhawm silo mi milem an sawnh le, anmah khawm zeikhawm an si lo rawh.

⁶Aigupta ram ah mi ruang ka suah na hen, ramkaro mun zawzawng ah, ramkaro leh resep nâwngah, ram châr leh ṭihnungkâi âukhawm umlonâk leh kal dahlonâk ah ka rui na khawmah an ka sunhsak lo.

⁷Ram ningno, a fângzûn leh a thil ṭha dang lakah a lâwm ding hen ka kalpi na. Sikhawmsele, ka ram chu an râwk le, ka pêk na mi ram chu an nawmh.

⁸Bâwlpu tla khawm nih ‘LALPA zeiah a um, ti hen an lam lêm lo. Ka bâwlpu tla khawm nih an hawng ka theih lo. Lâirêltu tla chu ka lakah an hel le; khuavâng tla khawm nih Baal min hen thu an sim le, milem zeikhawm silo mi an sawnh.

⁹“Churuangah kei, LALPA nih ka mi tla lakah ka thunawk ka sim awt nawlh. An thlâk tla rangah ka phiar na awt.

¹⁰Thlanglei Kupra tikulh ah kal le, saklei ah mi Kedar ram ah âu mawh fial na. Hi hâwi hen a lânah thil a hawng um mi na muh rerêng lai lo.

¹¹Âu phun khawm nih a tak si lah khawmsele an pathian tla an lêt dah lo. Sikhawmsele ka mi tla nih anmah zahkâitirtu Pathian chu, an rangah zeikhawm ti piak kholotu pathian tla hen an hawng ka thleng ving.

¹²Ka lakah thilsual panih an ti: Kei tinungva thar chu an ka hertâk le, tî a tling kho lo mi tipang kuai an siam, churuang chun, vân chu chê hen duksâ sûm rê ṭihnungkâi tak a nîn ding hen thu ka pêk.

¹⁴“Israel chu sal asi lo; sal fa khawm asi lo. Chu hâwi asi chun zeirangah a mêlma tla nih an nâuneh ne?

¹⁵Chakeibaknei hâwi hen an hûk rawh; a ram chu a karo hen an siam le, a khuapi tla chu râwk hen kaltâk phin hen a um.

¹⁶Asi, Memphis leh Tahpanhes tla nih a luruh an khuai.

¹⁷Israel, nangmah tak nih hi hi na lakah na tlungtir mi asi! Lampi tluan hen ka nan rui liauah, LALPA na Pathian na ka kaltâk.

¹⁸Aigupta ram ah kal hen Nile tiva ah mi tî din hen zei dingchangnâk tawng ding hen me na ruat? Asiria leiah Eufretis tiva tî din ding hen va kal chu zei dingchangnâk tawng ding hen me na ruat?

¹⁹Nangmah sualnâk nih a nan rêp lai le, na ka kaltâk ruangah mawh hen na um lai. LALPA, na Pathian na ka kaltâk mi leh ka lakah zumhkâi hen na um lo rawh ruangah, a diklo zia leh a khât zia na theih lai. Kei, LALPA Zahkâi zeizawng tikho nih ka sim mi asi,” a ti.

²⁰LALPA zahkâi nih, “Israel, a lân thawk hen ka thuneihnâk na duh lo le; ka thu ngâi ding leh hawng ka sawnh ding na duh lo. Tlâng sâng tlûn kipah leh thing ring kip tangah thlâi ṭhattirtu pathian tla na sawnh.

²¹Chî ṭha chem lakah mi grep zûn sung tak hâwi hen ka nan phun. Sikhawmsele zei hâwi na si rawh, a zauh nik! Grep zûn a ngêt mi mang tlâk lo mi hâwi na si rawh.

²²Sabung a chak chem mi hen a ṭâwl khawm le, na sualnâk a kawp mi chu ka muh awt nget rih.

²³Zeitin khawm hen ka nâwmtir lo, Baal khawm ka sawnh dah lo na ti kho awt? Tivakuam ah thilsual na ti zia zauh le; na thilti tla zauh. Sangâwngsâu a phawl le, sût ding duh hen a tâl hen a suak le,

²⁴ramkaro leiah a tek mi hâwi na si. A phawl liauah âu nih a khap kho? A duhtu a mipa khawm a nawktir lo, tawng ding tik chu na tawng kumza lai.

²⁵Israel, pathian dang tla ṭhâwl hen na kê dîttir hen na dang chârtir lah. Sikhawmsele nangnih chun, ‘Silo! ka hawng kîr kho lo. Ram dang mi pathian tla ka duh, anmah ka zûl na awt ko,” na ti.

²⁶LALPA nih, “Mifîr chu an tleih le, a ning a zak mi hâwi hen, nannih Israel mi tla, nan lalchem tla leh rianṭuantu tla, nan bâwlpu tla leh khuavâng tla, nan ektê hen nan ning a zak lai.

²⁷Nannih thing rangah ka pa titu leh lungpi rangah ka nu titu tla, nan ektê hen nan ning a zak lai. Keimah leikângah hawng a her lo hen nan hawng ka hertâk ruangah hi bang tla hi a hawng tlung lai. Sikhawmsele nan lawksawng liau chun hawng kal hen ruang a nan suah na ding hen nan ka deih.

²⁸“Nan rangah nan siam mi pathian tla zeiah an um? An tikho mi asi chun, nan lawksawng liauah ruang a nan suah na seh! Juda, khuapi tamtak na nei mi hâwi hen pathian tamtak na nei.

²⁹Na chipchiarnâk zei me si? Zeirangah ka lakah na hel?

³⁰Ka nan rêp le, zeikhawm a ṭhavak lo; nun a nan simh ding khawm na ka duh lo. Chakeibaknei a râng mi hâwi hen na khuavâng tla na thah na.

³¹Israel mi tla, ka thusim zei asi ngâi u. Nan rangah ramkaro, mûi leh ṭihnungkâi hâwi ma ka si? Chu hâwi asi chun, na duhzia ti hen na sinah ka hawng kîr awt lo rawh na ti bei ne?

³²Nungâk nih a lungsung mawh umhnâk thuam mawh a philh ma? Sikhawmsele, ka mi tla nih chun, a ni sim leh rêl châwk lo rê hen an hawng ka philh.

³³Duh mi tla zûl chu zei hâwi asi, na theihthiam asi. Nunau sual chem khawm nih nangmah lakah theihthiamnâk a nei kho.

³⁴Na nipuan chu mifîr thisen silo hen mipâm leh sual neilo mi thisen â buaih. “Sikhawmsele, hi hâwi tluk mi lakah,

³⁵‘Thilsual ka nei lo; ka lakah LALPA a thinthawk lai lo rawh,’ na ti. Sikhawmsele kei, LALPA nih na sual mi na pheh ruangah ka nan rêp awt.

³⁶Phun dang pathian leiah na hawinâk nih nangmah a nan niam tir. Asiria nih na thinlung a dawnghtir mi hâwi hen Aigupta nih na thinlung a nan dawnghtir lai.

³⁷Aigupta chu na hawitâk lai le, na ningzak tukah na buk thlo lai. Kei, LALPA nih na mi zumh tla chu ka hua na mi an si; an lakah thil zeikhawm ṭhatvaknâk na tawng lai lo,” a ti.