Read Bawm Chin JEREMIA 21 Bible Online

JEREMIA 21 - Bawm Chin bible

JEREMIA 21

¹Juda lalchem Zedekiah nih Malkiah fapa Pasur leh bâwlpu Maaseiah fapa Zephaniah chu hi thu deih hen ka sinah a hawng fial na:

²“Babulon lalchem Nebukadnezar leh a kawrsen tla nih khuapi an hual ruangah zângfahtê hen LALPA sinah thu hawng kan sim piak. LALPA nih kan rangah a thilchê pakhat tal hawng kan ti piak hen Nebukadnezar chu a kîrtir lai mawh,” an ti.

³Churawhchun LALPA nih ka sinah thu a sim le, ka sinah a hawng fial na mi chu LALPA, Israel Pathian nih a sim mi thu chu Zedekiah rangah va simh ding hen ka simh na.

⁴“Zedekiah, Babulon lal leh a kawrsen tla dotu na kawrsen chu keimah nih ka neh awt. Na kawrsen tla râlthuam chu khuapi lâi ah ka pawng lai.

⁵Ka chaknâk zawzawng hen, ka thinthawknâk leh ka thinrunhnâk leh ka lungsilonâk hen ka nan do awt.

⁶Hi khuapi ah um mi zawzawng chu ka thah hep awt; minung khawm ran khawm bang cho hen râi ṭihnungkâi lakah an thi lai.

⁷Sikhawmsele, nang leh na rianṭuantu tla leh tuknâk lakah thibang tla leh pâmnâk leh râi lakah thibang tla chu lal Nebukadnezar leh nangmah thah duhtu na mêlma tla kan tleihtir hep na lai. Nebukadnezar nih a nan thah lai. Anih nih chun âukhawm an zuah na lai lo, âu tlûn khawmah khua a ruat hen pawi a ti ding asi lo. Kei, LALPA nih ka sim asi, a ti,” ti hen.

⁸Churawhchun, LALPA nih zapi sinah thu sim ding hen hawng ka simh, “Ngâi u! Kei, LALPA nih nungnâk lampi leh thihnâk lampi thîm ding ka nan pêk na.

⁹Âuzawng khuapi lakah umtu chu râltuknâk lakah mawh sungvâng leh râi lakah mawh an thi lai. Sikhawmsele âuzawng va suak hen tuah khuapi dotu Babulon mi tla sinah va a pêktu chu thah an si lai lo; a nungnâk zing zuah asi lai.

¹⁰Hi khuapi hi zuah lo ding hen ka thinlung ah ka ruat mi cho asi lo, râwk dep ding hen ka ruat mi asi. Babulon lalchem sinah pêk hen a um lai le, anih nih a duah hep lai. Kei, LALPA nih ka sim asi,” a ti.

¹¹LALPA nih Juda lal dâwngsung David thlâk sinah hi thuchah hi sim ding hen hawng ka simh: “Kei, LALPA nih ka sim mi thu hi ngâi u. Nisiar hen diknâk thilti hi zauh. Perpettu nih a perpet mi chu hum rawh. Na hum lo mi asi chun, na thilsual ti ruangah ka thinthawknâk chu mei hâwi hen a alh lai le, mih kho asi lai lo.

¹³Jerusalem, nang hi tivakuam tlûn ving ah na to le, phâi ngâk a sâng mi lungpi hâwi na si. Sikhawmsele ka nan do awt. Nangnih chun, âukhawm nih an do kho lo ding hen leh na vêng mi râwk kho lo ding hen na sim.

¹⁴Sikhawmsele thil na ti mi ruangah ka nan rêp awt. Na lal in ka duah lai le, a kiangkam mi zeizawng a kâng ver lai. Kei, LALPA nih ka sim asi,” a ti.