Read Bawm Chin JEREMIA 27 Bible Online

JEREMIA 27 - Bawm Chin bible

JEREMIA 27

¹Josiah fapa Zedekiah Juda lalchem asi nûn sâwtlotê ah LALPA nih ka sinah,

²savun ri leh thing ngul liangbat na ngâwng ah bah ding hen siam hawng ka ti.

³Churawhchun, LALPA nih ka sinah, Jerusalem ah mi lalchem Zedekiah zauh ding hen an ram ruangrûl ah um mi tla theih hen hawng mi tla Edom, Moab, Amon, Tura leh Sidon lalchem tla sinah thuchah thanh na ding hen hawng ka simh.

⁴LALPA, Zeizawng tikho, Israel Pathian nih a thusim chu an lalchem tla simh na ding hen thu pêk na hawng ka ti:

⁵“Ka thiltikhonâk rokual leh ka chaknâk hen laikulh, minung leh ramsa tual tlûnah um mi zawzawng chu ka siam na le; âutal ka thîm na mi chu ka pêk.

⁶Babulon lalchem Nebukadnezar ka to-aw thiltikhonâk tangah phun zawzawng tla siahtu chu ka si le, ramsa tla tiang amah rianṭuantu ah ka siam.

⁷A phun tlûknâk tik a tlung lân lo chu phun zawzawng tla nih amah leh a fapa leh a tupa rian an ṭuan lai. Churawhchun a phun nih phun thiltikho tak leh lalchem rokual tak tla rian an ṭuan lai.

⁸“Sikhawmsele zei phun tal mawh zei lalram tal nih a dân a zûl lo chun, Nebukadnezar ka râwk dep lân lo chu, chu phun chu râltuknâk, pâmnâk leh râi hen ka rêp na awt.

⁹Nan khuavâng tla mawh, mâilei ding mi thusimtu âuzawng, mang manhtu leh mithi thlarau kawhtu leh mitleh dâwithiam tla thu ngâi lah u. Chubang zawng tla nih chun Babulon lalchem sinah a pêk lo ding hen an simh na.

¹⁰Nan ram thawk hen ram lât takah kalpi ving nan si ding hen an perpet na mi asi. Ka nan suah ving na lai le, nan vei dep lai.

¹¹Sikhawmsele, zei phun tal Babulon lalchem sinah a pêk hen a rianṭuan piaktu chu, chu ram ah chun ka umtir lai le, phâisen a nâwn lai le, chunah khua a sâ lai. Kei, LALPA nih ka sim asi,” a ti.

¹²Juda lalchem Zedekiah sin khawmah chu hâwi thu chu ka sim, “Babulon lalchem sinah a pêk le, amah leh a mi le rianṭuan le, na nung lai.

¹³Zeirangah nang leh na mi tla chu râltuknâk leh pâmnâk mawh râi lakah nan thi êu lai? Zei phun zawng Babulon lalchem sinah a pêk lo mi chu a sinah LALPA thusim a hawng tlung lai.

¹⁴A sinah va a pêk lo ding hen an simh natu khuavâng tla thu chu ngâi lah u. An perpet na mi asi.

¹⁵LALPA nih chun amah fial mi an si lo zia leh amah min hen âwkrâwl thu nan sinah an sim mi asi a ti. Churuang chun nannih leh khuavâng chubang âwkrâwl thu an simh natu chu an nar ving na lai le, thah hen nan um lai,” a ti.

¹⁶Churawhchun, zapi minung leh bâwlpu tla chu LALPA thusim chu ka simh na: “Biakin ah mi thil-le-rî Babulon ah mi chu an hawng kîrpi tuan lai ti hen simtu khuavâng tla thu chu ngâi lah u. Nan sinah âwkrâwl thu an sim mi asi.

¹⁷An thu ngâi lah u! Babulon lalchem sinah a pêk ule, nan nung lai! Zeirangah hi khuapi hi nâwmpawng asi êu lai?

¹⁸Khuavâng tak an si hen ka thuchah simtu an si chun, Biakin ah mi leh lal in ah mi thil-le-rî Babulon ah kalpi lo ding hen kei, LALPA, Zeizawng tikho sinah hawng ka deih na seh me,” a ti.

¹⁹(Lalchem Nebukadnezar nih Juda lalchem Jehoiakim fapa Jehoiakin leh Juda leh Jerusalem ah ruitu tla a kalpi na liauah tung tla, dâr mâihûm, leh kari tla leh Biakin thil-le-rî tla chu a mâk.)

²¹“Jerusalem ah lal in ah mi leh Biakin ah mi thil-le-rî mâk mi thu, kei, LALPA Zeizawng tikho, Israel Pathian nih ka sim mi chu ngâi u.

²²Anmah ka âwva na lân lo chu Babulon ah kalpi hen an um lai le, chunah chun an um lai. Churawhchun, ka kîrpi nawlh na lai le, hi mun ah hin ka umtir nawlh na lai. Kei, LALPA nih ka sim asi,” a ti.