Read Bawm Chin JEREMIA 28 Bible Online

JEREMIA 28 - Bawm Chin bible

JEREMIA 28

¹Juda lalchem Zedekiah chu a lal kum a kum linâk kum a thla nga nakah Azur fapa khuavâng Hananiah Gibeon khua mi nih Biakin ah thu hawng ka simh.

²Bâwlpu tla leh zapi mâika ah LALPA Zeizawng tikho, Israel Pathian nih thu a sim mi hawng ka simh: “Babulon lalchem thiltikhonâk chu ka râwk rawh.

³Kum nih sungah lalchem Nebukadnezar nih Biakin ah mi thil-le-rî Babulon ah a put mi chu a ektê hen hi mun ah ka hawng kîrpi nawlh lai.

⁴Juda lalchem Jehoiakim fapa Jehoiakin khawm Juda mi zawzawng Babulon ah sal ah kal mi tla hen ka hawng kîrpi nawlh lai. Asi, Babulon lalchem thiltikhonâk chu ka râwk lai. Kei, LALPA nih ka sim asi,” a ti.

⁵Churawhchun bâwlpu leh mi zapi Biakin ah dîr mi zawzawng mâika ah Hananiah sinah thu ka sim:

⁶“A chê a! Hi hi LALPA nih a ti ding ka lungum! Babulon thawk hen Biakin ah mi thil-le-rî zawzawng leh mi zapi tla tleih hen an kalpi na lai na ti mi chu asi ngelchel lai ti ka lungum.

⁷Sikhawmsele, na sinah leh zapi minung sinah ka sim mi hi ngâi.

⁸Khuavâng tla, nangmah leh keimah lânah simtu tla khawm nih râltuknâk, pâmnâk leh râi tla chu phun tamtak leh lalram thiltikho tak tlûnah hawng tlung ding hen an simkan rawh.

⁹Sikhawmsele, khuavâng thlangamnâk thu simkantu chu a simkan mi dik tak hen a hawng tlung tik cho ah LALPA nih a fial mi khuavâng tak asi ti pawm kho asi lai,” a ti.

¹⁰Churawhchun, Hananiah nih ka ngâwng ah mi liangbat chu a lâk le, a khiak dip le,

¹¹mi zapi mâika ah: “LALPA nih chun, lalchem Nebukadnezar nih phun zawzawng ngâwng ah liangbat a bah mi chu hi hâwi hen a khiak lai; hi hi kum nih sungah a ti lai,” a ti. Churawhchun ka kaltâk rawh.

¹²Hi nûnah hin LALPA nih ka sinah,

¹³Hananiah sinah kal hen thu va sim ding hen hawng ka simh: “LALPA nih thing liangbat chu na khiak kho lai, sikhawmsele chu ruangrûl ah thîr liangbat a siah awt.

¹⁴LALPA, Zeizawng tikho, Israel Pathian nih thîr liangbat chu chubang phun zawzawng tla tlûnah ka siah lai le, Babulon lalchem Nebukadnezar rian an ṭuan lai. LALPA nih ramsa tiang khawm nih Nebukadnezar rian an ṭuan lai,” a ti.

¹⁵Churawhchun Hananiah chu hi hi ka simh le, “Hananiah, ngâinik! LALPA nih a nan fial mi asi lo, hi zapi minung rangah âwkrâwl thu na lungtir na mi asi.

¹⁶Churuangah LALPA amah ngelchel nih a nan kaltâk awt ti a sim. Zapi minung tla chu LALPA lakah hel ding hen na simh na ruangah hi kum a vei lânah na thi lai,” ti hen thu dang a simh.

¹⁷Chu kum a thla sarihnâk ah Hananiah chu a thi rawh.