Read Bawm Chin JEREMIA 29 Bible Online

JEREMIA 29 - Bawm Chin bible

JEREMIA 29

¹Bâwlpu tla, khuavâng tla, zapi ruitu tla leh Nebukadnezar nih Jerusalem ah mi Babulon ah sal ah a put na mi tla zawzawng sinah lasuikuat ka rîn.

²Lalchem Jehoiakin, a nu, lal in ah rianṭuantu tla, Juda leh Jerusalem ah mi ruitu tla, rianṭuan thiam leh zungthiam tla, sal ah an put na nûnah ka rîn mi asi.

³Chu lasuikuat chu Saphan fapa Elasah leh Hilkiah fapa Gemariah, Juda lalchem Zedekiah nih Babulon lalchem Nebukadnezar sinah a fial na mi sinah ka pêk na. Hi hâwi hen a sim:

⁴“LALPA, Zeizawng tikho, Israel Pathian nih Jerusalem ah mi Nebukadnezar nih Babulon ah put na ding hen a siang na mi zawzawng sinah thu a sim:

⁵‘In tla sak ule, um u. Dûm tuah ule, chunah nan chîng mi chu ei u.

⁶Nupi pasal a umh ule, fa tla nei u. Churawhchun fa tla an nei kho bâk ding hen nan fa tla khawm umhtir na u. Zûk leikâng silo hen nan pung ding asi.

⁷Sal tâng ding hen ka nan kaltir na mi khuapi ṭhatnâk ding hen ṭuan u. Anmah ruangrûl ah ka sinah thlacham u, an sul-le-lam a tluang ruangah nannih khawm nan sul-le-lam a tluang lai.

⁸Kei, LALPA, Israel Pathian nih khuavâng nan lakah um mi mawh midang âutal mâilei thu ka sim kho titu perpet hen nan um lo ding hen ka nan simhkan na asi. An mang tla khawm ngâi piak lah na u.

⁹Ka min hen âwkrâwl thu a nan simh na mi asi. Kei nih ka fial na mi asi lo. Kei, LALPA nih ka sim asi, a ti.

¹⁰“LALPA nih, ‘Babulon ah tângnâk kum sâwmsarih a tling rawh chun, ka nan ruat na mi ka langh lai le, in leiah an kîrpi na ding hen thu ka tiam mi ka theihkumza lai.

¹¹Nan rangah ka thiltum tla siat leh râwknâk um lo hen sul-le-lam tluang tak hen kalpi kan tum na mi leh mâilei ah nan lungum mi thu lakah an kalpi na ding ka tum mi thu chu keimah cho nih ka theih.

¹²Churawhchun nan hawng ka auh lai rawh. Nan hawng hen ka sinah thla nan cham lai le, kei nih kan sâng na lai.

¹³Nan thinlung zawzawng hen nan hawng ka hâwl ruangah nan ka hâwl tik chun nan ka tawng lai.

¹⁴Asi, nan ka tawng lai le, nan ram ah ka nan umtir nawlh na lai. Ka nan rekrâwitir na nâk ram leh munkip thawk hen ka nan pumh na lai le, sal ah kan kal tâktir na mi ram ah kan kîrpi nawlh na lai. Kei, LALPA nih ka sim asi,’ a ti.

¹⁵“Babulon ah LALPA nih khuavâng tla hawng kan pêk nan ti.

¹⁶David nih lâi a rêlnâk lalram ah lâirêltu lalchem leh chu khuapi ah mi minung tla, nan unau tla nan sinah sal ah put hen um lo mi thu LALPA nih a sim mi chu ngâi u.

¹⁷LALPA, Zeizawng tikho nih, ‘Râltuknâk, pâmnâk leh râi ka tlungtir le, theipi ei ding tlâk lo a ngêt mi hâwi hen ka siam awt.

¹⁸Râltuknâk, pâmnâk leh râi hen ka ṭhâwl na lai le, laikulh phun zawzawng tla nih chu chu an muh lai le, an lâu lai. Ka rekrâwitir na mi mun kipah chubang hâwi hen an lakah thil a hawng tlung mi ruangah an lâu lai. Mi nih an zauhnawmh lai le, an min ah siatbarh mi tla an ti lai.

¹⁹Ka to-aw khuavâng mang hen thu ka chah na mi an zûl duh lo ruangah chu chu an lakah a tlung lai. A ngâi ding an duh loh.

²⁰Babulon ah sal ah kan kaltir na mi zawzawng tla, kei, LALPA nih thu ka sim mi hi ngâi u,’ a ti.

²¹“LALPA, Zeizawng tikho Israel Pathian nih Kolaiah fapa Ahab leh Maaseiah fapa Zedekiah a min hen âwkrâwl thu an simh natu thâwngthâng a sim. Anih nih chun Babulon lalchem Nebukadnezar thiltikho tak, nan mitmuh ah thah natu ding mi kutah a pêk na ding mi thu a sim.

²²Jerusalem a mi Babulon leiah sal ah put hen um mi tla nih âu tlûnah mawh siatbarh an duh lai le, ‘Babulon lal nih a nung hen a rawh na mi Zedekiah leh Ahab hâwi hen LALPA nih an ti na seh an ti lai!’

²³LALPA min hen âwkrâwl thu an sim le, LALPA min hen sual ṭihnungkâi ti hen ṭângdang an pawmtâk ruangah, hi hi an thihnâk ding chu asi. Hi hi LALPA duhlo kâng asi; thil an ti mi a theih na hen anmah lakah anih chu theihtu asi. LALPA nih a sim,” a ti.

²⁴Nehelam ah mi Semaiah nih amah min hen Jerusalem ah um mi zawzawng leh Maaseiah fapa bâwlpu Zephaniah sinah leh bâwlpu dang tla zawzawng sinah lasui kuattu rangah LALPA zeizawng tikho Israel Pathian nih thuchah hawng ka pêk. Hi lasuikuat lakah hin Zephaniah sinah Semaiah nih hi hâwi hen a rîn:

²⁶“LALPA nih Jehoiada ruangrûl ah bâwlpu ah a nan siam le, tu chun nang chu Biakin ah hotu chem na si rawh. Mi â tla, khuavâng telê â siam mi thîr chikchîn hen a ngâwng ah khih mi tla zauhkhenh chu na rianṭuan asi.

²⁷Zeirangah Anathoth mi Jeremia khuavâng hâwi hen mi zapi sinah thu simtu sinah na ti lo zia?

²⁸Babulon ah sal ah tâng mi tla sinah hun sâwt tak nan tâng lai le, in tla nan sak lai le, nan um lai le, dûm tla nan tuah lai le, nan chîng mi chu nan ei lai ti hen a simh na ruangah a bâng ding asi,” a ti.

²⁹Zephaniah nih ka sinah lasuikuat chu a rêl le,

³⁰churawhchun LALPA nih ka sinah,

³¹Semaiah thâwngthâng chu Babulon ah sal tâng mi zawzawng sinah kuat ding hen hawng ka simh: “Kei, LALPA nih, Semaiah leh a thlâk tla chu ka rêp na awt. Keimah nih fial lo hen khuavâng hâwi hen thu a sim ruangah leh âwkrâwl thu a nan lungtir na ruangah. Nan lakah thlâk a nei lai lo. Ka lakah hel ding hen mi tla a simh na ruangah ka mi le tla rangah thil ṭha ka ti ding mi chu muh ding hen a dam lai lo. Kei, LALPA nih ka sim asi,” a ti.