Read Bawm Chin JEREMIA 30 Bible Online

JEREMIA 30 - Bawm Chin bible

JEREMIA 30

¹LALPA, Israel Pathian nih ka sinah,

²“Ka mi Israel leh Juda tla ka dirh nawlh na ding mi tik chu a tlung rawh ruangah,

³thu ka nan simh mi zawzawng lasuibu ah rîn rawh. An thlâktu tla sinah ka pêk na mi ram ah ka kîrpi nawlh na lai le, chu mun chu anna ting nawlh lai. Kei, LALPA nih ka sim asi,” a ti.

⁴LALPA nih Israel leh Juda mi tla sinah thu a sim:

⁵“Ningṭih âu hâu leh lâu hâu, thlangamnâk silo mi ka theih.

⁶Tuah dawn le ruat nik! Mipa nih fa a ring kho ma? Chu hâwi asi mi chu zeirangah mipa kip nih nunau nganfâk mi hâwi hen an paw an kut hen an dawmh mi ka muh ne? Zeirangah mikip an dâng rê?

⁷Ni ṭihnungkâi tak; ni dang hen tahkhiat kho lo rê mi ka mi le tla rangah hamhnâk tik a hawng tlung rawh, sikhawmsele, a thibang chu an um lai,” a ti.

⁸LALPA, Zeizawng tikho nih: “Chu ni a hawng tlung tik chun, an ngâwng ah mi liangbat chu ka khiak lai le, an rêngkhimh ka sût piak na lai le, ramdang mi sal an si lai lo rawh.

⁹LALPA, an Pathian keimah rianṭuan hen David thlâk lal ah ka siam mi rian an ṭuan dauh lai rawh.

¹⁰“Ka mi tla ṭih lah u; Israel mi tla, lâu lah u. Ram lât tak sal ah nan tângnâk ram ah mi chu ruang ka nan suah na awt. In leiah hawng kîr hen thlangam tak hen nan um lai le; him tak hen kan umtir na lai le; âukhawm nih an lâutir na lai lo rawh.

¹¹Nan sinah ka hawng lai le, ruang ka nan suah na lai. Ka nan rekrâwitir na mi ram ah phun zawzawng tla ka veih na lai le, sikhawmsele nannih lam chu ka nan veih na lai lo. Rêp lo hen ka nan suah na ding asi lo. sikhawmsele ka nan rêp na tik chun, ṭhat ka lawh lai. Kei, LALPA nih ka sim asi,” a ti.

¹²LALPA nih a mi tla sinah, “Nan liam mâ tla chu damh kho asi lo, Nan mâ tla khawm damh kho asi lo.

¹³Nannih zauhkhenhtu ding pakhat khawm an um lo, nan mâ tla damhnâk ding zeikhawm a um lo, nan rangah dam ding hen lungumnâk a um lo.

¹⁴A nan dâwt natu zawzawng nih a nan philh na rawh; nannih rerêng an sunhsak na lo rawh. Mêlma hâwi hen ka nan do na; nan sualnâk a tam tuk ruangah leh nan ṭhatlonâk a fâk tuk ruangah nan rêpnâk khawm a fâk khun.

¹⁵Nan mâ ruangah vûirâm lah rawh u, nan rangah damhnâk a um lêm lo. Nan sualnâk a tam hen nan ṭhatlonâk a fâk tuk ruangah hi hâwi hen kan rêp na mi asi.

¹⁶Sikhawmsele, tuah a nan veih natu tla chu veih hen an um lai le, nan mêlma tla zawzawng chu sal ah put hen an um lai. A nan nehsawh natu zawzawng chu nehsawh hen an um lai le, a nan rûn natu chu rûn hen an um lai.

¹⁷Nan mêlma tla nih ‘Zion chu lawnh asi rawh; âukhawm zauhkhenhtu an um lo rawh, ti menza na khawmsele; kan damh nawlh na lai le; nan liam mâ tla ka damh lai. Kei, LALPA nih ka sim asi,” a ti.

¹⁸LALPA nih, “Ka mi le tla chu an ram ah ka umtir nawlh na lai le, dâwngsung khur kip tlûnah khua ka ruat lai le; Jerusalem leh a lal in tla ka dirh nawlh lai.

¹⁹Chunah mi zapi um mi nih chun, sawrnâk la an sak lai le; lâwm hen an âu lai. Ka malsâwmnâk hen ka pungtir na lai le, ka malsâwmnâk hen zahkâi tak hen ka siam na lai.

²⁰A lânah mi phun thiltikhonâk ka pêk na hen bir tak hen ka siam nawlh na lai le; anmah nehsawhtu tla zawzawng chu ka rêp na lai.

²¹An lâirêltu chu anmah phun thawk hen an hawng lai le, an lal tla khawm anmah minung thawk hen an hawng lai. Ka sâwm tikah ka sinah a hawng lai, sâwm silo mi tla chu an hawng ngam awt mazei? Annih chu ka mi tla an si lai le, kei chu an Pathian ka si lai. Kei, LALPA nih ka sim asi,” a ti.

²³LALPA thinthawknâk chu thlipi, thli chawp tak misual tla lû tlûnah râng ding mi chu asi. Ti ding hen a tum mi a lîm lân lo chu a dawng lai lo. Ni a hawng tlung ding mi lakah, a mi tla nih chu chu fiang tak hen an theih lai rawh.