Read Bawm Chin JEREMIA 33 Bible Online

JEREMIA 33 - Bawm Chin bible

JEREMIA 33

¹Kulh sungah ka tâng liauah LALPA thuchah ka sinah a hawng tlung nawlh.

²LALPA, tual siamtu; tuahtu leh a mun ah siahtu nih ka sinah thu a sim. A min LALPA si mi nih chun,

³“Hawng ka auh ule, ka nan sâng na lai, nan theih dah lo mi thilchê tak ka nan simh na lai.

⁴Kei, LALPA, Israel Pathian nih Jerusalem mi in tla leh Juda lal in chu siat asi lai ti ka sim asi. Babulon mi tla nih kulh hual hen tualpawng an siam mi chu suak hen va do na ding chu zeikhawm a ṭhatvaknâk a um lo. Ka thinthawknâk leh ka hehhârnâk hen ka thah na ding mi ruak hen khuapi chu a khat lai. A sungah minung tla nih thilsual an ti ruangah hi khuapi hi ka hertâk asi.

⁶Sikhawmsele hi khuapi leh a mi tla hi ka damh na lai le, nung dam hen ka umtir nawlh na lai. Thlangamnâk leh himnâk tamtak ka muhtir na lai.

⁷Juda leh Israel tla chu sul-le-lam tluang tak hen ka siam na lai le, a lânah mi hâwitê hen ka dirh nawlh na lai.

⁸Ka lakah sualnâk an ti mi chu ka thiangtir na lai le, an sualnâk leh an helnâk chu ka ngaihdam na lai.

⁹Jerusalem chu lâwmnâk, zahnâk, ka rangah putso ding mi bul asi lai, Jerusalem mi tla rangah thil ṭha ka ti mi tla leh khuapi lakah sul-le-lam tluangnâk ka tlungtir mi an theih tikah laikulh phun kip tla lâu hen an thir lai rawh,” a ti.

¹⁰LALPA nih, “Mi nih hi mun hi ramkaro hâwi asi, a sungah minung leh ramsa khawm a um lo an ti. A dik ngâk, Juda khuapi leh Jerusalem khualâi tla chu a karo hen a um; ran leh minung khawm an um lo. Sikhawmsele chu mun ah chun lâwmnâk leh lâwptlonâk hâu, nupi umhnâk puai tuah hâu tla theih asi nawlh lai.

¹¹Mi nih ka Biakin ah lâwmnâk thil ap an hawng put liauah la an sak mi nan theih lai. ‘A ṭhatnâk leh dâwtnâk dawng lo ruangah LALPA Zeizawng tikho sinah lâwmthu sim u, an ti lai. Hi ram hi a lânah mi hâwitê hen sul-le-lam tluang tak hen ka siam lai. Kei, LALPA nih ka sim asi,” a ti.

¹²LALPA, Zeizawng tikho nih, “Hi ram minung leh ran umlonâk ramkaro hâwi mi lakah hin, dawrâpu tla nih an dawrâ tla râwlno an tlâttir nawlh lai.

¹³Tlângram a mi khuapi tla ah, tlângbul ah leh Juda ram simlei tla, Benjamin ram tla ah, Jerusalem kiangkam mi khua tla ah, Juda khuapi tla ah dawrâpu nih an dawrâ an rêl nawlh lai. Kei, LALPA nih ka sim asi,” a ti.

¹⁴LALPA nih, “Israel leh Juda mi tla sinah thutiamnâk ka siam mi rangtlingtir ding tik chu a tlung rawh.

¹⁵Chu tik chun David thlâk rep tak chu lalchem ah ka thîm lai. Chu lal nih chun ram pumpi ah thil dik leh rep tak a ti lai.

¹⁶Juda mi tla leh Jerusalem mi tla chu ruangsuah hen an um lai le, him tak hen an um lai. Khuapi chu ‘LALPA kan ruangsuaknâk’ an ti lai.

¹⁷Kei, LALPA nih, David thlâk chu Israel lalchem si kumza ding leh

¹⁸bâwlpu ah ka rianṭuan ding leh duahphung thil ap, fâng thil ap leh bâwlnâk thil ap aptu ding mi chu Levi phun lakah mi si kumza ding hen ka tiamh asi,” a ti.

¹⁹LALPA nih ka sinah,

²⁰“Sûn leh zân lakah a tiktê um vima ding leh chu thudântuk chu a râwk lonâk ding hen thudântuk ka siam.

²¹Chu hâwi ber hen ka to-aw David sinah thudântuk ka siam le, a thlâk tla lakah lalchem si ding mi um kumza ding hen leh Levi phun lakah mi bâwlpu tla sin khawmah keimah rianṭuan kumza ding leh chubang thutiam chu râwk lo rawh ding hen thudântuk ka siam.

²²Ka to-aw David thlâk tla leh Levi phun lakah mi bâwlpu tla chu vân ah ârfi rêl châwk lo leh tipi kapah sep rêl châwk lo hâwi hen ka pungtir na lai,” a ti.

²³LALPA nih ka sinah,

²⁴“Israel leh Juda dâwngsungkhur panih ka thîm na mi ka nawng ti hen mi nih an sim mi na theih ma? Churuang chun mi nih ka mi tla chu an zauhnawmh hen phun khawmah an rêl na lo.

²⁵Sikhawmsele kei, LALPA nih sûn leh zân lakah thudân ka tuk le, ka dân siam nih tual leh vân lâi a rêl.

²⁶Hi ka ti mi hâwi hen ka to-aw Jakob leh David thlâk tla chu ka kilkâwi na awt. David thlâk lakah mi pakhat, Abraham, Isak leh Jakob thlâk tla tlûnah lâirêltu ding mi ka thîm awt. Ka mi tla tlûnah khua ka ruat lai le, an sul-le-lam ka tluangtir nawlh na lai,” a ti.