Read Bawm Chin JEREMIA 35 Bible Online

JEREMIA 35 - Bawm Chin bible

JEREMIA 35

¹Juda lalchem Josiah fapa Jehoiakim a lal liauah LALPA nih ka sinah,

²“Rekab phun tla sinah va kal le, thu va ruah na. Churawhchun Biakin kardang pakhat ah hawngpi na le, uain pêk na,” a ti.

³Churawhchun Rekab phun lakah mi Jaazaniah (Jeremia dang fapa Habaziniah fapa) leh a unau zawzawng leh a fapa tla chu;

⁴Biakin ah ka kalpi na. Khuavâng Hanan Igdaliah fapa ṭhiruai tla umnâk kardang sungah ka kalpi na. Chu kardang chu Salum fapa Maaseiah, Biakin ah rianṭuantu herh tak umnâk kardang tlûnah mi, rianṭuantu dang tla umnâk kardang tla kiangah mi asi.

⁵Churawhchun hâi leh khêng uain khat dil mi chu Rekab mi tla mâika ah ka siah le, “Uain din u” ka ti na.

⁶Sikhawmsele, annih nih an sâng le, “Uain kan din loh. Hawng kan thlâktu Rekab fapa Jonadab nih kanmah leh kan thlâk tla khawm nih zeiliau khawmah uain din lo ding hen hawng kan simh.

⁷In sak ding asi lo, phâisen tuah ding asi lo, grep phun ding asi lo, châwk ding asi lo ti hen hawng kan simh. Puanin tla ah um kumza ding hen thu hawng kan pêk, hi ram ah hin khual hâwi hen kan um khonâk ding hen.

⁸Jonadab nih hawng kan simh mi zawng tla chu kan zûl hep. Kanmah leh kan nupi tla, kan fapa leh kan fanu tla khawm nih uain kan din dah lo.

⁹Umnâk ding hen in tla khawm kan sak lo, puanin tla ah kan um le, grep dûm leh phâisen, fâng tla khawm kan nei lo. Hawng kan thlâktu Jonadab nih thu hawng kan pêk mi zawng chu kan zûl hep.

¹¹Sikhawmsele, lalchem Nebukadnezar nih ram a rûn liauah Babulon mi leh Siria kawrsen lakah mi suak hen Jerusalem ah hawng ding kan tum. Churuangah Jerusalem ah kan um mi asi,” an ti.

¹²Churawhchun, LALPA Zeizawng tikho, Israel Pathian nih Juda mi leh Jerusalem ah mi tla sinah va kal hen thu va simh na ding hen hawng ka simh, “Kei, LALPA nih, zeirangah ka thu ngâi hen nan duh lo hen kan sîntir na mi thu hi ngâi ding nan duh lo zia? ti kan deih na asi.

¹⁴Jonadab thlâk tla nih uain din ding asi lo ti hen thu a pêk na mi chu an zûl le, tusûn ni tiang hen âukhawm nih an din lo. Sikhawmsele kan simh kumza na mi, ka thu nan ngâi duh lo thlo.

¹⁵Ka to-aw khuavâng tla zawzawng ka hawng fial vima na le, annih nih chun nan umdân sual lêt hen thil dik ti ding hen an simh na. Nanmah leh nan thlâktu tla sinah ka nan pêk na mi ram ah nan um kumza khonâk ding hen pathian dang tla sawnh hen a rianṭuan lah u ti hen an simhkan na. Sikhawmsele ngaihlo lêm nan thlâk le nan ka ngâi piak duh lo.

¹⁶Jonadab thlâk tla nih an thlâktu nih thu a pêk na mi chu an ngâi le, sikhawmsele nannih lam nih chun ka thu nan zûl lo.

¹⁷Churuangah chun tuah kei, LALPA, Zeizawng tikho, Israel Pathian nih Juda mi tla leh Jerusalem mi tla tlûnah siatnâk hawng tlung ding hen ka tiamh mi zawzawng ka hawng tlungtir awt. Nan sinah thu ka sim khawmah nan ka ngâi piak duh lo le, ka nan auh na khawmah nan ka sâng lo ruangah hi hi ka ti awt asi,” a ti.

¹⁸Churawhchun, Rekab phun tla chu LALPA, Zeizawng tikho Israel Pathian nih a sim mi chu ka simh na, “An thlâk natu Jonadab nih thu an pêk na mi chu nan ngâi le; a nan sîntir na mi chu nan zûl hen thu a nan pêk na mi zawzawng chu nan ti.

¹⁹Churuang chun, kei, LALPA Zeizawng tikho, Israel Pathian nih Jonadab, Rekab fapa thlâk tla lakah mi nih chun ka rianṭuantu dingah mipa fa nei kumza ding hen thu ka tiamh,” a ti.