Read Bawm Chin JEREMIA 36 Bible Online

JEREMIA 36 - Bawm Chin bible

JEREMIA 36

¹Juda lalchem Josiah fapa Jehoiakim a lal mi a kum linâk ah LALPA nih ka sinah thu a sim.

²“lasuibuzual lâk le, Israel leh Juda mi leh phun zawzawng thu ka nan simh mi zeizawng chu rîn rawh. A tîr ah, Josiah a lal liauah thil zeizawng ka nan simh mi thawk hen tu tiang mi thu ka nan simh mi chu rîn ver.

³Juda mi le tla nih an tlûnah siatnâk ka tlungtir ding mi thu zawzawng an theih chun, an thilsual ti an lêt kekkawk lai mawh. Chu hâwi asi chun an diklonâk leh an sualnâk chu ka ngaihdam lai,” a ti.

⁴Churawhchun, Neriah fapa Baruk chu ka kawh le, LALPA nih ka sinah thu a sim mi zawzawng chu a sinah ka ap rawh. Chun, Baruk nih lasuibuzual lakah a rîn hep.

⁵Churawhchun, hi bang sîntirnâk tla hi Baruk sinah ka pêk: “Kei lam chu Biakin ah kal ding hen siang ka si lo rawh.

⁶Sikhawmsele, mi le tla buh an ngeinâk ah tan nawlh ah an sinah chunah va kal ding hen ka nan duh. Nangnih lasuibuzual chu hâu fâk tak hen na rêl lai le, churawhchun, LALPA nih ka sinah thu zeizawng a sim mi na sinah kan ap mi kha an theih lai rawh. Juda mi an khua thawk hen hawngtu tla khawm nih an theih khonâk ah rêl rawh.

⁷LALPA nih a thinthawknâk leh a hehhârnâk ṭihnungkâi tak hen a ṭhih na mi asi ruangah an thilsual ti lakah mi chu LALPA lei anna her hen thla an cham lai mawh,” a ti.

⁸Churawhchun Baruk nih ka simh mi hâwitê hen LALPA thu chu Biakin ah a rêl rawh.

⁹Juda lalchem Jehoiakim a lal mi a kum nganâk thla kuanâk ah, LALPA sunhsaknâk tawng ding hen mi tla nih buh an ngei. Hi buh ngeinâk hi Jerusalem ah um mi zawzawng leh Juda khuapi thawk hen hawng kal mi tla nih an ngei mi asi.

¹⁰Mi zawzawng nih an ngâi liauah Baruk nih ka sim mi thu lasuibuzual lakah mi chu a rêl rawh. Lâirêlnâk ah lasuirîntu Saphan fapa Gemariah umnâk kardang thawk hen Biakin ah hi hi a ti mi asi. A umnâk kardang chu Biakin kulh Kawtkâ Thar tualmâi kiangah mi lâirêlnâk mun sâng dauh a mi asi.

¹¹Saphan tupa Gemariah fapa Mikaiah nih lasuibuzual lakah mi LALPA thusim Baruk nih a rêl mi chu a theih.

¹²Churawhchun anih chu lal in ah lâirêlnâk lasuirîntu umnâk kardang ah rianṭuantu tla zawzawng to hâwngnâk ah a va kal rawh. Lâirêlnâk ah lasuirîntu Elisama, Semaiah fapa Delaiah, Akbor fapa Elnathan, Saphan fapa Gemariah, Hananiah fapa Zedekiah leh rianṭuantu tla zawzawng chunah chun an um.

¹³Mikaiah nih chun zapi tla sinah Baruk nih lasui a rêl mi thu a theih mi zawzawng chu a simh na.

¹⁴Churawhchun, rianṭuantu tla nih Jehudi (Nethania fapa, Selemia tupa leh Kusi tupa rokual tak) chu Baruk sinah an fial, zapi sinah lasuibuzual a rêl mi hawng put ding hen an simhtir. Baruk nih chun lasuibuzual chu a hawng put rawh.

¹⁵Annih nih chun, “To le, lasuibuzual hawng kan rêl piak,” an ti. Churawhchun Baruk nih a rêl piak na rawh.

¹⁶A rêl thluh rawh chun khatlei khatlei lâu bû hen anna zauh le, Baruk sinah, “Hi thu hi lalchem sinah kan sim lai,” an ti.

¹⁷“Hi zawzawng thu tla hi zeitin na rîn tuah hawng kan simh? Jeremia nih ti ding hen thu an pêk mu?” ti hen an deih.

¹⁸Baruk nih a sâng le, “Jeremia nih thu zawzawng hawng ka ap le, kei nih lasui rînnâk hâng hen lasuibuzual lakah ka rîn asi,” a ti.

¹⁹Churawhchun a sinah, “Nang leh Jeremia chu nan kal hen nan va a thup ding asi. Nan umnâk mun âukhawm nih theih lo ding hen,” an ti.

²⁰Rianṭuantu tla nih lasuibuzual chu lâirêlnâk ah lasuirîntu Elisama umnâk kardang sungah an siah le, lalchem lâirêlnâk mun thil zeizawng simnâk mun ah an va kal rawh.

²¹Churawhchun lasuibuzual lâk ding hen Jehudi chu lal nih a fial le, Elisama in kardang a mi chu a va lâk le, lalchem leh rianṭuantu tla zawzawng a kiangah dîr mi tla sinah a rêl.

²²Busik liau asi le, lalchem chu busik ah a umnâk mun mei kiangah a to.

²³Jehudi nih tlar thum mawh tlar li mawh a rêl thluh rawh chun lalchem nih nâmtê hen a tan le, mei ah a paih hep. A dih hep lân lo chu a duah.

²⁴Sikhawmsele, lalchem mawh rianṭuantu tla mawh âutal nih chu thu theihtu zawzawng chu lâu hen zûrnâk mêl rerêng an put lo.

²⁵Sikhawmsele, Elnathan, Delaiah leh Gemariah nih lasuibuzual chu duah lo ding hen lalchem chu an ngiar le, an thu a ngâi piak na lo.

²⁶Churawhchun, lal nih, lal fapa tla Jerahmeel, Azriel fapa Seraiah hen, Abdeel fapa Selemiah tla chu ka lasuirîntu Baruk leh kei chu tleih ding hen thu a pêk na rawh. Sikhawmsele, LALPA nih hawng kan thuh.

²⁷Lalchem Jehoiakim nih Baruk rangah ka ap mi lasuibuzual a duah nûn chun,

²⁸LALPA nih, a masa mi lasuibuzual lakah mi hâwitê hen a dang lakah rîn nawlh ding hen hawng ka simh.

²⁹LALPA nih lalchem sinah, “Lasuibuzual chu na duah le, Jeremia rangah, zeirangah Babulon lalchem a hawng lai le, hi ram hi a râwk lai le, a mi tla leh ran tla a thah hep lai ti hen na rîn, ti thu sim ding hen a hawng ka simh.

³⁰Churuangah tuah kei LALPA nih na sinah ka sim asi, lalchem Jehoiakim na thlâk tla âukhawm nih hi David lalram ah lâi an rêl rêng lai lo rawh. Na ruak chu sûn nî sa, nî nih a sat ten nâk mun ah lawnh hen a um lai le, zân ah vûr nih a tlâk lai.

³¹Thilsual nan ti mi zawzawng ruangah nang leh na thlâk tla leh na rianṭuantu tla ka nan rêp na awt. Jerusalem mi tla leh Juda ram mi tla âukhawm nih thu kan simh kan na mi nan ngâi duh lo, churuangah ka nan lâuh na mi siat leh râwknâk nan ektê tlûnah ka tlungtir awt,” a ti.

³²Churawhchun, lasuibuzual dang chu ka lâk le, ka lasuirîntu Baruk rangah ka pêk le, anih nih thil ka ap mi chu a rîn hep. A lânah mi lasuibuzual lakah a um mi zawzawng leh a sinah ka ap mi hâwitê hen a rîn.