Read Bawm Chin JEREMIA 43 Bible Online

JEREMIA 43 - Bawm Chin bible

JEREMIA 43

¹LALPA, an Pathian nih anmah simh na ding hen a hawng ka fial mi thil zeizawng chu ka simh ver na rawh.

²Churawhchun Hosaiah fapa Azariah leh Kareah fapa Johanan leh mi zûm tla zawzawng nih ka sinah, “Âwkrâwl thu na sim mi asi. LALPA kan Pathian nih Aigupta va kal hen um lo ding hen hawng kan simhtu ah an fial mi na si lo.

³Neriah fapa Baruk nih Babulon mi tla nih kan lakah thu an nei khonâk ding hen leh hawng kan thah ding hen mawh Babulon leiah hawng kan kalpi kho ding hen a nan fawrh mi asi,” an ti.

⁴Juda ram ah um ko ding hen Johanan leh kawrsen hotu tla, zapi minung tla lakah âukhawm nih LALPA thupêk an ngâi lo.

⁵Churawhchun Johanan leh kawrsen hotu tla nih chun Juda ram ah um mi tla an va a rekrâwinâk phun tla lakah mi:

⁶mipa tla, nunau tla, fa tla, lal fanu tla zawzawng hen Aigupta ram ah an kalpi na. Hotu Nebuzaradan nih Gedaliah zauhkhenhnâk tangah a siah na mi leh Baruk leh kei khawm hawng kan kalpi rawh.

⁷LALPA thupêk chu an ngâi lo le, Aigupta ram ah mi Tahpanhes khuapi tiang an kal.

⁸Churawhchun, LALPA nih ka sinah,

⁹“Lung a lianpi mi tla lâk le, hi khuapi ah lâirêlnâk in tualmâi ah mi lungphah sungah phun, chu chu Israel mi tla mitmuh ah ti rawh.

¹⁰Churawhchun, kei, LALPA Zeizawng tikho Israel Pathian nih ka to-aw Babulon lalchem Nebukadnezar chu hi mun ah hin ka hawngpi lai le, hi nan phun mi lung tlûnah hin a laltophah a toh lai le, a tlûnah lal puanin a zâr lai.

¹¹Nebukadnezar a hawng lai le, Aigupta chu a neh lai. Râi lakah thi ding mi chu râi lakah an thi lai le, sal ah put ding mi chu sal ah put hen an um lai, râltuknâk ah thah ding mi chu râltuknâk ah thah hen an um lai.

¹²Aigupta pathian tla biakin chu mei hen ka duah lai le, Babulon lalchem nih duah lo hen an pathian tla chu a put ving na lai. Dawrâpu nih a nipuan rik umlo mi a lâk hâwi hen Babulon lalchem nih Aigupta chu thiang tak hen a lâk lai le, neh dep hen a siah lai.

¹³Aigupta ram ah Heliopolis ah theihkumzanâk lungphûm thenhlimh a râwk lai le, Aigupta mi pathian tla biakin tla a duah lai, ti hen simh na,” a ti.