Read Bawm Chin JEREMIA 46 Bible Online

JEREMIA 46 - Bawm Chin bible

JEREMIA 46

¹Aigupta ah dawmh hen phun tla thu LALPA nih ka sinah a sim.

²Hi hi Juda lalchem Jehoiakim a lal mi kum linâk ah Eufretis tiva kiangah mi Karkemis ah Babulon lalchem Nebukadnezar nih Aigupta lal Nebo kawrsen tla a neh na mi thu a sim mi asi:

³“Aigupta mi hotu tla âu ule, ‘Nan phaw tla lâk ule, râltuknâk leiah kal u!

⁴Rang tla thuamh ule, an tlûnah a chuan u! A tlâr ule, nan lukhuh tla a khuh u! Nan fei tla tât ule! Nan râlthuam hen a thuam u!’ ti hen.

⁵Sikhawmsele LALPA nih, “Zei ka muh ne?” a ti. Ningṭih hen dunglei ah anna her rawh. An kawrsen tla kîrtir hen an um le; lâunâk hen neh hen an um, an chelh rî hen an tek, dunglei rêng an hawng a her lo.

⁶Chak kho rî hen tek mi tla chu an âwl lo le, kawrsen tla chu an suak kho lo. Marlei ah Eufretis tiva kiangah anna suih le an tlû.

⁷Nile tiva hâwi hen a hawng lian mi leh tiva a kâwr khat phak hen a lian mi hâwi chu âu me si?

⁸Nile tiva a lian mi hâwi leh, tiva a kâwr khat phak hen lian mi hâwi chu Aigupta asi. Aigupta nih, ‘Ka thawk lai le, laikulh ka khat lai; khuapi leh a sungah mi minung ka veih dep lai.

⁹Rang tla chu kal ding hen thu pêk na u, kari khawm kal ding hen! Kawrsen tla suaktir na u: Sudan leh Libia thawk hen hawng mi tla nih phaw tla an put le, Libia ram ah mi chanhtiang kah thiamtu tla khawm,’ a ti.

¹⁰Tusûn ni hi LALPA, Zeizawng tikho zahkâi tak ni chu asi: Tusûn ah phû a lam lai le, tusûn ah a mêlma tla a rêp na lai. A nâmsâu nih a khim pang tiang a ei na lai, an thî tla chu a khawp pang tiang hen a din lai. Tusûn hin zeizawng tikho nih a mi thah tla chu marlei kângah Eufretis kiangah bâwlnâk ah a mang lai.

¹¹Aigupta mi tla Gilead ah kal ule, turpâng va hâwl u! Nan turpâng tla chu zeikhawm asi lo ti a theih rawh; zeikhawm nih an damh kho na ding asi lo.

¹²Phun tla nih na mualphonâk an theih hen; mikip nih na ṭap hâu an theih rawh. Kawrsen pakhat nih pakhat rangah a nam le, an panih hen tual ah an tlû vevê.

¹³Aigupta do ding hen Babulon lalchem Nebukadnezar a hawng kal liauah LALPA nih hawng ka sawnh.

¹⁴“Aigupta khuapi tla, Migdol, Memphis, leh Tahpanhes ah thu phuang u: ‘A vêng ding hen a timhtuah u; nan neih zawzawng chu râltuknâk ah a vei hep lai!

¹⁵Zeirangah nan Pathian chak Apis chu a tlû êu? LALPA nih a thlûk mi asi!’ ti hen.

¹⁶Na kawrsen tla chu anna suih hen an tlû le; anmah leh anmah anna sâwn le, Hi kan mêlma riamnâm lakah âwl ding hen mawhsareh hen kan mi le sinah kan tlung lai!’ an ti.

¹⁷Aigupta lal chu a min thar ah ‘A tik tlawlhtu, Chaihtam, khâwngmang’ ti u.

¹⁸Kei, LALPA, Zeizawng tikho chu lalchem ka si. Pathian nung ka si. Tabor tlâng ah insâng tla nih tlâng sâng tla a lanh mi leh Karmel tlâng tla chu tipi ngâk hen a sâng mi hâwi hen a nan dotu chaknâk chu asi lai.

¹⁹Aigupta mi tla, sal ah kal ding hen a tîm u! Memphis chu a karo hen siah hen a um lai le, pakhat khawm um lo hen râwk dep mi asi lai.

²⁰Aigupta chu chawpinu ṭha tak hâwi asi, marlei thawk hen thovâi henh mang nih a do.

²¹A kawrsen a mang mi tla khawm chawlâ hâwi hen mang tlâk lo hen an um. An dîr hen an do lo le, an ektê hen anna her le, an tek hep. An vânduai ni leh an siatnâk tik a tlung rawh.

²²Aigupta chu a tek le, rûl hâwi hen a hâu a suah, a mêlma kawrsen tla nih an ṭhâwl. Mi nih thing an hâu le, tumun an râwk mi hâwi hen reitlung hen amah an do.

²³An minung tla chu rêl châwk lo an si, an kawrsen tla khawm khâubawk rêl châwk lo hâwi an si.

²⁴Aigupta mi tla chu ningzak saih hen an um rawh; marlei mi tla nih an neh na rawh. Kei, LALPA, nih ka sim asi,” a ti.

²⁵LALPA, Zeizawng tikho, Israel Pathian nih ka sim asi, “Amon leh Thebes tla pathian chu Aigupta leh a pathian leh lalchem tla hen ka rêp na awt. Aigupta lalchem leh anmah zumhtu tla chu,

²⁶anmah thah ding duhtu tla Babulon lalchem Nebukadnezar leh a kawrsen tla kut ah ka pêk na awt. Sikhawmsele chu nehnûn chun, mi tla chu Aigupta ram ah a lânah mi hâwi hen an um nawlh lai. Kei, LALPA nih ka sim asi,” a ti.

²⁷“Ka mi tla, ṭih lah u, Israel mi tla lâu lah u. Ram lât tak sal nan tângnâk ah mi thawk hen ruang ka nan suah na lai. In leiah nan hawng kîr lai le, thlangam tak hen nan um lai. Him tak hen nan um lai le, âukhawm nih a nan lâuh na lai lo.

²⁸Nan sinah ka hawng lai le, ruang ka nan suah na lai. Ka nan rekrâwi na nâk phun tla chu ka veih na lai le, nannih chu kan veih na lai loh. Rêp lo hen kan siah na awt lo; sikhawmsele, kan rêp na tikah chun ṭhat ka lawh lai. Kei, LALPA nih ka sim asi,” a ti.