Read Bawm Chin JEREMIA 48 Bible Online

JEREMIA 48 - Bawm Chin bible

JEREMIA 48

¹Hi hi LALPA, Zeizawng tikho nih Moab thu a sim mi chu asi: “Nebo mi tla chu pawi tipi na u, an khuapi tla a râwk rawh! Kiriathaim lâk hen a um le, a khua kulh bir tla khawm siat hen a um le, a mi tla khawm ningzak saih hen an um; Moab rokualnâk chu a vei rawh.

²Mêlma nih Hesbon chu a lâk le, Moab phun chu râwk ding a tum. Madmen khuapi chu a reh dep lai le; kawrsen tla nih an kal nawh lai.

³Horonaim khua mi tla chu, ‘Siatnâk! Râwknâk!’ ti hen an âu.

⁴“Moab chu â râwk rawh; ngâksia ṭap hâu chu ngâinik.

⁵Luhith lei kalnâk lampi ah an phu-ûk mi hâu leh Horonaim lei kalnâk lampi ah an tuarnâk ruangah an ṭap mi hâu ngâi.

⁶‘Na nungnâk hum ding hen tek rereh! ‘Mâng sanatung hâwi hen tek!’ an ti.

⁷“Moab, na neih leh na chaknâk na sirhsanh, sikhawmsele, tu lam chun nangmah khawm neh hen na um lai le; na pathian Kemos chu a lal leh a bâwlpu tla hen sal ah put hen an um lai.

⁸Khuapi chu râwk lo hen a âwl lai lo le, tivakuam leh phâi tla râwk hen a um lai. Kei, LALPA nih ka sim asi.

⁹Moab rangah thlânlung siam zet u; sâwtlotê ah râwk hen a um lai. A khuapi chu râwk dep hen mâk asi lai le, âukhawm an um nawlh lai lo rawh,” a ti.

¹⁰(A thinlung zawzawng hen LALPA rianṭuan lotu chu siatbarh hen um seh! Riamnâm vei hen thah lotu chu siatbarh hen um seh!)

¹¹LALPA nih, “Moab chu him tak hen a um kumza le, zeiliau khawmah sal ah put hen a um dah lo. Moab chu uain a dûr ah mi a dang ah tleng lo hen siah ziar mi hâwi asi. A rim khawm â râwk dah lo, a thâwtnâk khawm a mahmun kumza.

¹²“Churuangah tuah, Moab chu uain hâwi hen a bunghtu ding hen mi ka fial ding mi tik chu a tlung rawh. Uain dûr chu a karo hen an siah lai le, an khuai dip lai.

¹³Churawhchun Moab mi tla chu Israel mi tla nih Bethel a mi pathian an rinhsanh mi hen anna ṭângziak lo hâwi hen an pathian Kemos hen anna ṭângziak lai lo rawh.

¹⁴“Moab mi tla, râltuknâk ah a nik rawh mi kawrsen râlṭha hâwi hen zeitin mi râlṭha ah na ruat?

¹⁵Moab leh a khuapi tla chu râwk hen a um rawh; a tlangvâl ṭha chem tla khawm thah hen an um rawh. Kei, lalchem, LALPA Zeizawng tikho nih ka sim asi.

¹⁶Moab vânduainâk a hawng tlung rawh; a siatnâk chu a hawng tlung tuan lai.

¹⁷A kiangkam ah umtu, a minthangnâk theihtu tla, chu phun tla chu lungfâkpi na u. A lâirêlnâk thiltikhonâk chu â râwk rawh; a rokualnâk leh a chaknâk khawm a um lo rawh,’ ti u.

¹⁸Nannih Dibon ah um mi tla, nan mun zahkâi tak a mi hawng ṭum ule, tual ah mi valeidip ah to u. Moab râwktu tla chu hinah a um le, a kulh tla chu râwk dep hen mâk asi rawh.

¹⁹Nannih Aroer a um mi tla, lampi kiangah dîr hen ngâk ule; a tek mi tla rangah deih na ule, thil a hawng um mi theih ding tum u.

²⁰Annih nih chun ‘Moab chu a tlû rawh, ṭappi u, mualpho hen a um rawh. Moab a râwk rawh ti hen Arnon tiva dung tluan hen sim u! ti hen a sâng na lai.

²¹Mun râwn a mi khuapi tla lakah lâirêlnâk a hawng tlung: Holon, Jahzah, Mephat,

²²Dibon, Nebo, Beth Diblathaim,

²³Kiriathaim, Bethgamul, Bethmeon,

²⁴Kerioth leh Bozrah khuapi tla tlûnah. Moab khuapi mun lât ah mi leh mun nâi ah mi zawzawng tlûnah lâirêlnâk a hawng tlung.

²⁵Moab chaknâk chu â râwk rawh; a thiltikhonâk khawm a vei rawh. Kei, LALPA nih ka sim asi,” a ti.

²⁶LALPA nih, “Moab chu ka lakah a hel ruangah zû dinh u. Moab chu a luak lakah a rîl lai le, mi nih an nihsanh lai.

²⁷Moab, Israel tla rangah zeitin na nihsanh na zia theih rawh? Rawkmang rual tla nih an tleih na mi hâwi hen na ti na.

²⁸“Moab ram ah um mi tla, nan khuapi tla mâk u! Kal ule, kham tlûnah va um u! Vaṭhu nih tiva hawr thûk kiak kiangah bû a khuar mi hâwi si u.

²⁹Moab chu mi zûm tak asi! A zumh dân tla, mi zauhnawmh a mang dân tla leh mi rangah a siarlo zia tla, anmah chu zei tipi anna ruat mi tla ka theih.

³⁰Kei, LALPA nih anna zûm dân ka theih. Anna zumhnâk nih zeikhawm a chawhchântir lo, an thilti khawm a sâwt lai lo.

³¹Moab ram ah mi tla leh Kir Heres mi tla ruangah ka ṭap lai.

³²Jazer a mi tla rang ngâk hen Sibmah rangah ka ṭap khun awt. Sibmah khuapi, nang chu grep zûn a ṭeng nih Tipi Thi a tan bawk le Jazer tiang a zâm mi hâwi na si. Sikhawmsele tuah na ṭhalpini rah leh na grep rah tla chu a vei rawh.

³³Moab ram ningno mi lawmhnâk leh lâwptlonâk chu lâk ving hen a um rawh. Uain sûrnâk ah mi a hâng a luang mi khawm ka bângtir le; uain siamtu leh lâwm ruangah âutu khawm a um lo.

³⁴“Hesbon a mi leh Elealeh a mi tla an ṭap le, an ṭap hâu chu Jahaz tiang hen theih asi; Zoar a mi tla khawm nih an theih, Horonaim leh Eglath Selisiah a mi tiang khawm nih an theih. Nimrim tivatê khawm a kang hep.

³⁵Moab tla nih an pathian sawnhnâk mun ah duahphung thil ap an siam mi leh an pathian tla sinah bâwlnâk an ap mi chu ka bângtir awt. Kei, LALPA nih ka sim asi.

³⁶“Thil zeizawng an neih tla a vei hep ruangah âu nih mawh ruak vûinâk la, theikhang hen an sak mi hâwi hen Moab leh Kir Heres mi tla ruangah ka thinlung a fâk.

³⁷An ektê hen an lû leh an khamul an mêt hep. An kut tla an ât le, mikip nih salâpuan anna aih.

³⁸Moab in tlûn leh zapi minung pumhnâk ah chun lungfâknâk lo chu zeikhawm a um lo, Moab chu âukhawm duhlo mi bêl hâwi hen ka khuai rawh ruangah.

³⁹Moab chu râwk hen a um rawh! ṭap u! Moab chu a mualpho rawh. A râwk rawh, a kiangkam mi phun tla nih an nihsanh rawh. Kei, LALPA nih ka sim asi,” a ti.

⁴⁰LALPA nih chun Moab tlûnah, mû a thla pharh hen â thlûr mi hâwi hen hawng a thlûr ding phun chu a tiamh le,

⁴¹khuapi tla leh kulh tla chu lâk hen a um lai. Chu ni chun Moab kawrsen tla chu nunau nganfâk mi hâwi hen an lâu lai.

⁴²Moab chu ka tlûnah a hel ruangah râwk asi lai le, phun ah siam asi lai lo rawh.

⁴³Ningṭihnâk, khur tla leh thang tla nih Moab mi tla chu an bawh ko. LALPA nih a sim asi.

⁴⁴Ningṭihnâk thawk hen suak tumtu tla chu khur lakah an tlâ lai le, âuzawng khur lakah mi suak tum hen kâitu tla chu thang nih a awh lai, Moab râwknâk tik LALPA nih a ruat rawh mi asi ruangah.

⁴⁵An tek mi tla nih Hesbon Sihon lal nih lâi a rêlnâk khuapi ah humtu ding an hâwl le, sikhawmsele meialh lakah a um. Mei nih ramri ah um mi tla leh Moab râltuk duhtu umnâk tlâng sâng tla chu a kâng.

⁴⁶Moab mi tla, pawi tipi na u! Kemos sawnhtu tla chu an vei rawh le, an fapa leh an fanu tla khawm sal ah an put na rawh.

⁴⁷Sikhawmsele, tik a hawng ding mi lakah, Moab chu LALPA nih sul-le-lam tluang hen a siam nawlh lai. Hi bang zawzawng LALPA nih a sim rawh mi tla chu Moab tlûnah a hawng tlung lai.