Read Bawm Chin JEREMIA 49 Bible Online

JEREMIA 49 - Bawm Chin bible

JEREMIA 49

¹Hi hi Amon thu LALPA nih a sim mi chu asi: “Israel mi tla zeiah an um? An ram vêngtu ding pakhat khawm an um lo na maw? Zeirangah Milkom sawnhtu tla chu Gad phun ram an lâktir na hen chunah an umnâk ah an umtir na êu?

²Sikhawmsele Rabah khuapi mi tla chu râltuknâk hâu ka theihtir na lai le, râwk dep hen mâk hen a um lai le a khua tla duah hen a um ding mi tik chu a tlung rawh. Israel tla nih an ram lâktu lakah mi chu an suh nawlh na lai.

³Hesbon mi tla, ṭap u! Ai khua chu râwk hen a um rawh! Rabah ah mi nunau tla, lungfâk tak hen um u! Salâpuan a aih ule, ulh u. Nawk ruangah tek u. Nan pathian Milkom chu a lal leh a bâwlpu tla hen sal ah kalpi hen an um lai.

⁴Nannih mi zumhkâilo tla, zeirangah nanna khâwng? Nan chaknâk khawm a thawt hen a um rawh. Zeirangah âukhawm nih an hawng ka do ngam lai lo ti hen nangmah thiltikhonâk na rinhsanh?

⁵Mun kip thawk hen na tlûnah ningṭihkâi ka hawng tlungtir awt. Nan tek hep lai. Mikip nung ding duh hen nan tek lai le, nan kawrsen tla pumh nawlhtu ding âukhawm an um lai lo.

⁶“Sikhawmsele, hi nûn chun, Amon chu sul-le-lam tluang tak hen ka siam nawlh lai. Kei, LALPA nih ka sim asi,” a ti.

⁷Hi hi LALPA Zeizawng tikho nih Edom thu a sim mi chu asi: “Edom mi tla nih an lâirêlnâk ṭha an thlâu rawh na maw? Simhtu nih ti ding mi chu an simh kho na lo rawh ma? An finghnâk zawzawng a vei rawh na maw?

⁸Dedan mi tla, a her ule, tek u! A thup u! Anmah rêpnâk ding tik a tlung rawh ruangah Esau thlâk tla chu ka veih na awt.

⁹Mi nih grep an kawih chun, a zûn lakah tâwm an mâk, zân ah mifîr a hawng khawmah an duh mi cho an lâk.

¹⁰Sikhawmsele, Esau thlâk tla chu anna thup lo rawhnâk ding hen anna thupnâk ah mi chu ka langh lai le, ka vuak hep na awt. Edom mi tla chu an vei ver rawh. Pakhat khawm an um lo.

¹¹Na mi ngâkṭah tla chu ka sinah mâk na le, keimah nih ka zauhkhenh na lai. Na numei tla khawm nih an ka ngauhsan kho lai.

¹²“Rêp ding hen a dêng lo mi khawm nih rêpnâk hâi a din bâk lai, rêp lo hen um ding ma na ruat? Si rîlmâl lo, hâi lakah mi chu na din ding asi!

¹³Keimah nih Bozra khuapi chu zauhnâk ah lâu kâi rê leh a karo hen a um lai ti ka sim asi; mi nih an zauhnawmh lai le, a min ah siatbarh an ti lai. A kiangkam khua zawzawng khawm a râwk pawt lai. Kei, LALPA nih ka sim asi,” a ti.

¹⁴Kei nih, “Edom, LALPA thawk hen thuchah ka tawng. Anih nih chun phun tla sinah nangmah do ding hen an kawrsen tla pumh ding hen simhtu dingah mi a fial.

¹⁵LALPA nih chaklo leh âukhawm nih a nan zah lo ding hen a nan siam awt.

¹⁶Na zumhnâk nih a nan âttir mi asi. Na ruat na hâwi hen âukhawm nih a nan ṭih ding asi lo. Tlâng sâng tlûnah leh lung kham tlûnah nan um; mupi hâwi hen sâng takah um menza khawm le, LALPA nih a nan niamh awt,” LALPA nih a sim asi,” ka ti.

¹⁷LALPA nih, “Edom tlûnah siatnâk a hawng tlung ding mi chu thungâi a fâk awt ruangah âuzawng a paltu chu an thinlung a purh hen an lâu khit lai.

¹⁸Sodom leh Gomorah kiangkam a mi khuapi a râwk liauah thil an lakah a hawng tlung mi hâwi hen Edom tlûnah a hawng tlung lai. Chunah chun âukhawm an um lai lo rawh. Kei, LALPA nih ka sim asi.

¹⁹Chakeibaknei tumun thawk hen a hawng suak le, Jordan Va dung zawh hen ram ningno leiah a kal mi hâwi hen ka hawng kal lai le, Edom mi tla chu an ram thawk hen mawhsareh hen ka tektir phin na awt. Churawhchun ruitu ka thîm mi nih phun lakah lâi a rêl lai. Âu hen nan hawng ka tahkhiat kho awt? Âu nih hawng ka zuam ngam awt? Zei lâirêltu nih hawng ka do kho awt?

²⁰Churuangah Edom mi tla tlûnah thil ka tum mi leh Temon khuapi a mi minung sinah ti ding ka tum mi chu ngâinik u. An fa tla tiang kalpi hep hen a um lai le, mikip an lâu lai.

²¹Edom a tlûk tik chun chubang hâu chu a um lai le, tual pumpi â nîn lai, ṭap hâu chu Agaba likâwlneng ah mi tiang nih an theih lai.

²²Mêlma tla nih Bozra chu mupi nih a thla a pharh hen a thlûr le, a nam mi hâwi hen a do lai. Chu ni ah chun Edom kawrsen tla chu nunau nganfâk mi hâwi hen a lâu lai,” a ti.

²³Hi hi LALPA nih Damaska thu a sim mi chu asi: “Thâwng ṭhalo tak an theih ruangah, Hamath leh Arpad khuapi ah um mi tla chu an lawksawng le an uai thlo. Lawksawngnâk nih tipi hâwi hen a luang nawh na le, anna dîn kho lo.

²⁴Damaska khua mi tla chu an dî le, ningṭih ruangah an tek hep. Nunau a nganfâk mi hâwi hen nganfâk tuar leh hamh tak hen an um.

²⁵Khuapi minthang tak lawmhnâk dingah an mang mi chu a râwk dep rawh.

²⁶Chu ni ah chun tlangvâl tla chu khuapi zâwllâi ah thah hen an um lai le, a kawrsen tla khawm an vei lai.

²⁷Damaska kulh chu ka duah lai le, lalchem Benhadad in chu a kâng lai. Kei, LALPA Zeizawng tikho nih ka sim asi,” a ti.

²⁸Hi hi LALPA nih Kedar phun leh Hazor thu tangah um mi ram Babulon lalchem Nebukadnezar nih a lâk mi thu a sim mi chu asi: “Kedar mi tla chu do ule, saklei mi phun tla chu veih na u!

²⁹An puanin tla, an ranrual tla, an puanzâr tla leh an puanin sungah mi thil zawzawng deih piak hep na u. An sangâwngsâu tla lâk piak na ule, “Nan kiangkam zawzawng ṭihnungkâi hen a khat!” ti hen simh na u.

³⁰“Hazor mi tla, lât takah tek hen va a thup ding hen kei, LALPA nih ka nan simhkan asi. Babulon lalchem Nebukadnezar nih nangmah a nan phiarnâk thu chu hi hi asi,

³¹‘Hawng! Ruangsuak leh him rawh hen a ruat mi tla chu kan do na lai! An khuapi chu kulh kawtkâ khawm a nei lo, renh khawm a renh lo, zauhkhenhtu khawm a um lo.’

³²“An sangâwngsâu leh an ranrual tla lâk piak na u! An sam tantu minung tla chu mun kipah ka rekrâwitir na lai le, mun dang dang thawk hen siatnâk an tlûnah ka tlungtir lai.

³³Hazor chu kâwlui umnâk mun cho si ding hen râwk dep hen ka siam pawt lai rawh. Chunah chun âukhawm an um lai lo rawh. Kei, LALPA nih ka sim asi,” a ti.

³⁴Zedekiah Juda lalchem asi nehnûntê ah LALPA, Zeizawng tikho nih Elam ram thu ka sinah a sim.

³⁵“Elam thiltikho tak hen umtirtu chanhtiang mangtu zawzawng chu ka thah na lai.

³⁶Munkip thawk hen Elam tlûnah thli ka rângtir lai le, an tek mi minung tla ram kipah an kal lonâk ram umlo rê hen ka rekrâwitir na lai.

³⁷Elam mi tla chu an mêlma tla, anmah thah duhtu tla ka ṭihtir na lai; Ka thinthawknâk fâk tak hen Elam mi tla chu ka veih na lai le, an lakah kawrsen tla ka fial na lai le, ka mih dep na lai.

³⁸An lalchem tla leh an ruitu tla ka veih na lai le, chunah chun ka laltophah ka toh lai.

³⁹Sikhawmsele, chu nûn chun Elam mi tla chu sul-le-lam tluang tak hen ka siam nawlh na lai. Kei, LALPA nih ka sim asi,” a ti.