Read Bawm Chin JEREMIA 51 Bible Online

JEREMIA 51 - Bawm Chin bible

JEREMIA 51

¹LALPA nih, “Babulon leh a mi tla lakah siatnâk thli ka tlungtir.

²Thli nih fapawn a ranh phin mi hâwi hen ramdang minung Babulon veih ding hen ka fial awt. Siatnâk ni a hawng tlung tik chun a ker kip thawk hen an hawng do lai le, ram chu a karo hen mâk asi lai.

³A kawrsen tla chu an chanhtiang thalzum kah ding hen tik pêk lah na ule, an râlthuam hen thuamtir lah na u. Tlangvâl tla zuah lah na u! Kawrsen zawzawng khawm veih hep na u!

⁴An khuapi tla zâwllâi ah liam hen an thi lai.

⁵Kei, LALPA Pathian Zeizawng tikho nih Israel leh Juda chu kei, Israel Mi Thenhlimh tlûnah sual na menza khawmsele, ka kaltâk na lo.

⁶Babulon mi tla lakah mi chu tek u! Nan nungnâk hum ding hen tek u! Babulon mi tla sual ruangah a thahtir lah u. Tuah lehrûl ka sam lai le, amah hen dêng cho hen ka rêp awt.

⁷Babulon chu ka kut lakah ngûn hâi hâwi asi, laikulh pumpi rîttirtu asi. Phun tla nih uain chu an din le an thinlung a vei thlo.

⁸Babulon chu a tlû sâwm le, a vei rawh! Lungfâkpi u! Turpang hâwl piak u, a dam kekkawk lai mawh.

⁹Chunah ramdang minung um mi tla nih, ‘Babulon mi tla chu ṭangpi kan tum le, sikhawmsele a tlâi tuk rawh. Churuangah tuah kan mâk thlap lai le, in leiah kan kîr lai. Pathian nih Babulon mi tla chu a chaknâk zawzawng hen a rêp le a veih rawh,’” a ti.

¹⁰LALPA nih, “Ka mi tla chu, ‘LALPA nih kan dik zia a langhtir. Kan kal lai le, LALPA kan Pathian nih thil a ti mi chu Jerusalem mi tla kan simh na lai, ti hen âu u,” a ti.

¹¹LALPA nih Babulon mi tla chu veih a tum ruangah Media lalchem tla chu a thawktir na. Chu chu asi, a Biakin râwk ruangah lehrûl a sam mi chu.

¹²Dotu lakah hotu tla nih, “Nan chanhtiang thalzûm tla tât u! Nan phaw tla lâk zet u! Babulon kulh do ding hen theihtirnâk pêk u. Vêngtu chu chaktir u! Râlvêngtu tla siah u! Bawhtu tla siam u!” a ti. LALPA nih Babulon mi tla lakah ti ding a tum mi chu a ti rawh.

¹³Chu ram nih chun tiva tamtak leh neih leh siahnâk tla a nei, sikhawmsele a tik a dawng rawh le, a nukrî khawm sah asi rawh.

¹⁴LALPA Zeizawng tikho nih a nungnâk sâl hen Babulon chu khâubawk rual hâwi hen amah do ding hen mi tamtak a lakah ka tlungtir lai le, neh hen an âu lai, ti hen thu a tiamh.

¹⁵LALPA nih a thiltikhonâk hen tual a siam le; a finghnâk hen laikulh a siam, vân tla a pharh.

¹⁶A thupêk hen chung vân lei mi tî tla chu hâu a suaktir; tual dawnghnâk thawk hen sûm tla a pumh. Ruah lakah mîmthlâ a lektir le, siahnâk mun thawk hen thli tla a fial.

¹⁷Hi bang muhnâk lakah mi tla nih a ngaihtawnh dân an theih lo le, theihnâk an nei lo; Pathian diklo leh nungnâk neilo an siam ruangah milem siamtu tla chu nawng hen an um ver.

¹⁸Zeikhawm silo leh zauhnawmh ding mi an si; LALPA chu anmah do ding hen a hawng tikah an vei lai.

¹⁹Jakob Pathian chu annih hâwi asi lo; thil zeizawng siamtu asi le, Israel tla chu a mi tak si ding hen a thîm na. A min chu LALPA Zeizawng tikho asi.

²⁰LALPA nih, “Babulon mi tla, râltuknâk ah ka tukboh leh ka râlthuam nan si. Phun tla leh lalram tla râwktu ah ka nan mang.

²¹Rang leh a tlûnah mi tla veih na ding hen, kari leh a khalhtu tla veih na ding hen,

²²mipa leh nunau tla thah na ding hen, tar leh ngâksia tla thah na ding hen, mipa ngâksia leh nunau ngâksia thah na ding hen,

²³dawrâpu leh an dawrâ rual tla thah na ding hen, phâisen nâwntu leh an rang tla thah na ding hen, lâirêltu tla leh rianṭuantu lian tla veih na ding hen ka nan mang,” a ti.

²⁴LALPA nih, “Babulon leh a mi tla chu Jerusalem ah an thilsual ti zawzawng ruangah lehrûl ka sam na mi nan ka muh lai.

²⁵Babulon mi tla, nang chu laikulh pumpi veihtu tlâng sâng tak hâwi na si le, sikhawmsele, kei, LALPA chu na mêlma ka si. Ka nan tleih lai le, tual hen rual zat hen ka nan siam lai le, vachâm lakah ka nan siah awt.

²⁶Siat leh râwk hen na umnâk lakah mi lung rerêng chu in saknâk dingah mang nawlh asi lai lo rawh. Ramkaro hâwi na si kumza lai. Kei, LALPA nih ka sim asi.

²⁷“Do ding hen singsiahnâk pêk u! Phun tla nih theih kho ding hen tâwtawrâwt tum u! Phun tla, Babulon do ding hen a tîm u! Ararat, Minni, Askenaz lalram tla chu râltuk ding hen simh na u. Tuknâk ah ruitu ding hen hotu ruat u. Khâubawk rual hâwi hen rang tla put na u.

²⁸Babulon do ding hen phun tla a timhtuah u. Media lalchem tla, an ruitu leh an rianṭuantu tla, an ram lakah an thuneihnâk tangah mi zawzawng sinah mi fial na u.

²⁹Babulon ram chu âukhawm umlo ding hen LALPA nih a karo hen siam a tum ruangah tual chu a nîn hen a thir rawh.

³⁰Babulon kawrsen tla chu râltuk bâng hen, an kulh ah an um ziar rawh. An râlṭhatnâk a tlâu le, nunau hâwi an si rawh. Khuapi kulh kawtkâ tla a chim le, in tla chu mei nih a khangh rawh.

³¹Mifial dang dang tla nih Babulon lalchem chu a ker kipah a khuapi tla chu a râwk rawh ti simh ding hen an tek.

³²Mêlma nih tiva tan dak hen an lâk rawh le, kulh tla an duah rawh. Babulon kawrsen tla chu an ningṭih rawh.

³³Sâwtlotê ah mêlma tla nih an thah na lai le, fâng chîlnâk mun ah fâng an chîl mi hâwi hen an lamhbêk na lai. Kei, LALPA Zeizawng tikho Israel Pathian nih ka sim asi,” a ti.

³⁴Babulon lal nih Jerusalem chu a tuk phak le, a ei hep. Khuapi chu bêl hâwi hen a lâwngtir; thilnung lian hâwi hen a dawlh dak. A duh mi zawng a lâk le, a dang chu a lawnh phin.

³⁵Zion mi tla nih chun, “Kan lakah siat leh râwknâk um mi ruangah hin Babulon chu mawhphurhtu si seh” ti na seh. Jerusalem mi tla nih, “Kan tuarnâk lakah hin Babulon chu mawhphurhtu si seh,” ti na seh.

³⁶Churawhchun LALPA nih Jerusalem mi tla sinah, “Na mêlma nih a nan ti ziatê hen keimah nih a lakah nangmah ruangrûl ah lehrûl ka sam awt. Babulon tî chu a nâ ka kangtir lai le, a tiva tla ka chârtir lai.

³⁷Chu ram chu thil sia nâwm pawngnâk leh ramsa umnâk mun asi lai. Zauh hen ṭihnungkâi tak asi lai le, chunah chun âukhawm an um lai lo le, a muhtu zawng chu an lâu lai.

³⁸Babulon mi tla chu chakeibaknei hâwi hen an rûm le, chakeibaknei fa hâwi hen an hûk.

³⁹An hamkah mi ma? Puai ka tuah piak na lai le, ka rîltir na lai le, lâwptlo tak hen ka tuah na lai. An it lai le, anna ṭhang lai lo rawh.

⁴⁰Dawrâ fa, kêl tla leh dawrâ chal tla thah ding mi hâwi hen ka put na lai. Kei, LALPA nih ka sim asi,” a ti.

⁴¹LALPA nih Babulon thu a sim le: “Laikulh pumpi nih an sim ên mi khuapi chu lâk asi rawh. Phun tla rangah Babulon chu muh ding ṭihnung a kâi chiam e!

⁴²Babulon chu tipi nih a luang nawh le, a lian mi nih hâu fâk tak hen a khuh dep.

⁴³Khuapi tla chu zauh hen ṭihnungkâi rê hen a um le, mi âukhawm umlonâk leh mi velvâ khawm umlonâk tî umlonâk ramkaro hâwi asi rawh.

⁴⁴Babulon mi tla pathian Bel an ti mi chu ka rêp lai le, a thil fîr tla chu ka mâktir rel lai le; phun tla nih amah an sawnh lai lo rawh. “Babulon khua kulh chu a chim rawh.

⁴⁵Israel mi tla, chunah mi chu tek u! Ka thinthawknâk fâk tak lakah mi him ding hen tek u.

⁴⁶Thâwng ṭihnungkâi nan theih ruangah dâwk hen lâu lah u. Kum siar hen thâwng ṭha lo dang dang a hawng um lai le, ram lakah siatnâk thâwngthâng tla, lal leh lal anna do mi thu tla.

⁴⁷Churuang chun Babulon milem ka do ding tik chu a tlung rawh. Ram pumpi chu ningzakkâi tak hen siah asi lai le, a mi tla zawzawng thah an si lai.

⁴⁸Mârlei thawk hen amah veihtu ding mi kut ah Babulon chu a tlû tikah tual tlûnah thil zawzawng leh vân ah mi tla lâwm hen an âu lai.

⁴⁹Babulon nih laikulh pumpi thihnâk a tlungtir le, tu lam chun Israel mi tamtak a thihtir na ruangah Babulon chu a tlû lai rawh. Kei, LALPA nih ka sim asi,” a ti.

⁵⁰LALPA nih Babulon ram ah mi a mi tla sinah thu a sim le: “Thihnâk ah mi nan suak rawh! Tuah kal u! Ngâk lah u! Nan in thawk hen lât takah um menza khawm ule, kei, nan LALPA hi hawng ka dawn thlir ule, Jerusalem khawm theihkumza u.

⁵¹‘Ramdang mi tla nih Biakin ah mi mun thenhlimh chu an lâk rawh ruangah ningzak saih leh mualpho tak hen kan um le, kan kawng a dawng thlo rawh,’ nan ti.

⁵²Churuang chun, Babulon mi lem tla chu ka do ding mi tik a tlung rawh, anna liam mi tla rûm hâu chu ram pumpi ah a um lai ti ka sim asi.

⁵³Babulon chu vân ah kâi hen chunah kulh bir tak tuah khawmsele amah veih ding hen mi ka fial awt nget. Kei, LALPA nih ka sim asi,” a ti.

⁵⁴LALPA nih, “Ram lakah râwk leh siat ruangah Babulon a mi ṭap hâu chu ngâi u.

⁵⁵Babulon chu a râwk le, dâidep hen ka siah. Kawrsen tla nih tîlian hâwi hen an nam le, âu bû hen an do.

⁵⁶Babulon râwk ding hen an hawng le, a kawrsen tla chu neh hen an um le; an chanhtiang kûk tla chu a kiak rawh. Kei chu misual rêptu Pathian ka si. Babulon chu amah hen dêng ding hen ka rêp awt.

⁵⁷Lâirêltu tla, mifing tla, ruitu tla leh kawrsen tla chu rî nek hen ka siam na lai. An it lai le, anna ṭhang lai lo rawh. Kei, lalchem nih ka sim le, kei chu LALPA Zeizawng tikho ka si.

⁵⁸Babulon kulh bir tak tla chu tual ah lawnh hen a um lai le, a insâng kawtkâ tla chu duah hen a um lai. Phun tla rianṭuan zawzawng chu a thâwttham asi lai le, anna ṭangnâk chu meialh ah a vei rawh. Kei, LALPA Zeizawng tikho nih ka sim asi,” a ti.

⁵⁹Lalchem Zedekiah vêngtu chu Seraiah, Neriah fapa, Mahseiah tupa asi. Juda lalchem Zedekiah a lal mi a kum linâk ah, Seraiah chu Babulon ah a sinah a kal le, sîntirnâk zeimawh tla ka pêk.

⁶⁰Babulon râwknâk a hawng tlung ding mi thu tla leh Babulon thu ah thil dang zawzawng tla khawm lasuibu ah ka rîn.

⁶¹Seraiah sinah, “Babulon na tlung chun hinah rîn mi tla hi mi zapi tla sinah hâu fâk tak hen na rêl ngelchel ding asi ti hen ka simh.

⁶²Churawhchun, ‘LALPA, hi mun hi, minung leh ran khawm umlo rawh hen ramkaro hen ka umtir lai le, chunah chun thilnung rerêng a um lai lo, ti hen na sim,’ ti hen thlacham rawh.

⁶³Seraiah, hi lasuibu hi zapi sinah na rêl thluh rawh chun, lung hen ṭêm bawh le Eufretis tiva ah lawnh le,

⁶⁴‘Hi hi Babulon mi tla tlûnah a hawng tlung ding mi chu asi, LALPA nih a tlûnah siatnâk a hawng tlungtir ding mi ruangah a pil lai le, a thawk nawlh lai lo rawh ti,’ ti hen ka simh. Jeremia thu chu hi rî hen a dawng rawh.