Read Bawm Chin JEREMIA 52 Bible Online

JEREMIA 52 - Bawm Chin bible

JEREMIA 52

¹Zedekiah chu Juda lalchem asi liauah kum kul leh kum khat mi asi le, Jerusalem ah kum leikhat lâi a rêl. A nu min chu Hamutal asi, Libnah khua mi Jeremia fanu asi.

²Jehoiakim thilti hâwi hen lalchem Zedekiah khawm nih LALPA lakah thilsual a ti.

³LALPA chu Jerusalem mi leh Juda tlûnah thungâi a thin a thawk, a mit muhnâk ah mi a nar ving na. Zedekiah chu Babulon lalchem Nebukadnezar lakah a hel le,

⁴Nebukadnezar chu a kawrsen zawzawng hen do ding hen Zedekiah lâirêlnâk a kum kuanâk a thla rânâk ni râ ni ah Jerusalem chu a do rawh. Khuapi lênglei ah mun an khuar le, a kiangkam zawzawng ah hualnâk kulh an siam le,

⁵Zedekiah a lalnâk kum leikhat a tling tiang an ngâk rêt.

⁶Chu chu kum a thla linâk a ni kua ni an pâm a fâk tuktarâi ruangah mi nih ei ding zeikhawm an nei lo rawh le, kulh chu an pemh rawh.

⁷Babulon mi tla nih khuapi chu hual dak na khawmsele kawrsen tla chu zân ah an suak hep. Lal dûm leikâng a mi lampi hen an kal le, kulh vâm panih a tawnhnâk ram kawtkâ lakah an suak le, Jordan vakuam leiah an tek.

⁸Sikhawmsele lalchem Zedekiah chu Babulon kawrsen tla nih an ṭhâwl le Jeriko kiangah mi phâi ah an tleih le, a kawrsen tla nih an tektâk.

⁹Zedekiah chu lalchem Nebukadnezar, Hamath ram ah Libnah khua ah a um mi sinah an kalpi, chunah chun Nebukadnezar nih a rêp

¹⁰Libnah khua ah Zedekiah fapa tla chu amah Zedekiah mitmuh ah a thah na le, Juda lakah rianṭuantu tla khawm a thah na.

¹¹Chu nûn chun Zedekiah mit chu a chawih piak zek le, rêng a khimh le, Babulon ah a kalpi. Zedekiah chu Babulon rêngin ah thi dak hen a um.

¹²A kum leikua a thla nganâk ni râ ni ah Babulon lalchem Nebukadnezar leh lalchem thu simhtu kawrsen hotu Nebuzaradan hen Jerusalem ah a lût rawh.

¹³Biakin leh lal in, Jerusalem ah mi pawiherh in zawzawng tla a duah phin le;

¹⁴kawrsen tla nih kulh an râwk.

¹⁵Churawhchun Nebuzaradan nih khuapi ah um rih mi tla nunau rianṭuan thiam mi tla leh Babulon leiah put lo hen khuapi ah um rih mi tla chu Babulon ah a kalpi na.

¹⁶Sikhawmsele Juda lakah mipâm chem tla, thil-le-rî zeikhawm neilo mi tla chu grep dûm leh phâisen ah rianṭuantu dingah a siah na.

¹⁷Babulon mi tla nih Biakin ah mi dâr tung leh kari tla chu an râwk dip le, dâr hûmpi tla khawm an râwk le, dâr zawzawng chu Babulon ah an put hep.

¹⁸Vachâm rûtnâk leh mâichâm a mi vachâm khawngnâk, khâwnvâr thuamthil, bâwlnâk thisen dawnhnâk khêng, rimthâw duahnâk khêng, leh Biakin rianṭuannâk ah mang mi dâr thildang zawzawng chu an lâk hep.

¹⁹Ngûn leh tangka hen siam mi thil zawzawng: Khêngkûmtê, meiṭil sâwknâk ah mang mi khêng, bâwlnâk thisen dawnhnâk khêng, vachâm khawngnâk, khâwnvâr tung, rimthâw duahnâk khêngkûm, uain ap mi thlêtnâk khêng tla an put hep.

²⁰Lalchem Solomon nih Biakin rangah a siam mi dâr thilthuam, dâr tung panih, kari tla, tî siahnâk hûmpi, chawchal leinih a phurhtu chu a rit tuk ruangah khingh kho asi lo.

²¹Chu tung panih chu anna bang cho; pakhat a sânglei feet 27, a lian lei feet 18 asi. A sung chu a kua vevê, thîr chu a sah lei inchi 3 asi. A tung pâr khuhnâk dâr chu a sânglei feet 7.5 asi le, hêl dak hen pomegranate lem hen ṭialh asi, chu chu dâr hen siam mi hep asi.

²³A tung kipah pomegranate lem zâ asi le, hi lakah sâwmkua leh paruk chu tual thawk hen a lang kho asi.

²⁴Chu lo khawmah Nebuzaradan hotu nih bâwlpu lian Seraiah leh amah ngâk a niam dauh mi Zephaniah leh Biakin ah rianṭuantu herh mi pathum dang tla sal ah a put hep na.

²⁵Khuapi mi kawrsen hotu, lal thu simhtu khuapi ah um rih mi pasarih tla, kawrsen leikângah singsiahnâk lasuibu kiltu leh mi pawiherh sâwmruk sal ah a put na.

²⁶Nebuzaradan nih Babulon lalchem,

²⁷Hamath ram ah Riblah khua ah um mi sinah a kalpi na. Chunah chun lalchem nih a rêp na le, a thah na. Churawhchun Juda mi tla chu sal ah put hen an um rawh.

²⁸Hi hi Nebukadnezar nih sal ah a put na mi rînnâk chu asi: A kum sarihnâk ah lalchem nih 3,023 a put na.

²⁹A kum leiriatnâk ah Jerusalem thawk hen 832 a put na.

³⁰A kum sâwmthum leh kum thumnâk ah Nebuzaradan nih 745 a put na. An ektê hen put hen um mi vial mi 4,600 an si.

³¹Evilmerodak Babulon lalchem asi kum ah Juda lalchem Jehoiakin lakah vêlneinâk langh hen rêng ah mi a suah. Chu chu Jehoiakin sal ah put a sinâk thawk hen kum sâwmthum leh kum sarih thla leinih ni kul leh ninga ni ah a hawng um mi asi.

³²Evilmerodak nih vêlnei tak hen a ti le, lalchem dang a sinah Babulon ah sal ah put mi tla ngâk hen chungnung hen mun lian dauh a pêk.

³³Churawhchun Jehoiakin chu a sal nipuan chu thleng hen a thih tiang hen lal sinah buh ei bâk ding hen siang asi rawh.

³⁴A damsung zawzawng nisiar hen a thil herh tla phânzên hen pêk hen a um.