Read Bawm Chin JEREMIA 8 Bible Online

JEREMIA 8 - Bawm Chin bible

JEREMIA 8

¹“Chu tik chun, lalchem tla leh Juda ram ah rianṭuantu tla, bâwlpu tla, khuavâng tla, Jerusalem khua ah a um mi midang tla ruh zawzawng chu an thlân ah mi lâk asi lai.

²Pumh leh vûi ngangâk hen tual churtirnâk hâwi hen tual tlûnah an rîl lai. Nî, thlâ, ârfi, chubang minung tla nih an duh hen an rian an ṭuan hen thu an deih hen an sawnh mi mâika ah pharh zut hen an um lai.

³Chu phun lakah a thibang ka rek phin na mi mun ah um mi tla nih dam vima ding ngâk hen thih an duh dauh lai. Kei, LALPA Zeizawng tikho nih ka sim asi,” a ti.

⁴LALPA nih a mi le tla sinah thu sim ding hen hawng ka simh le, “Mi a tlû chun a thawk nawlh lo ma? Mi nih lam a vâi chun a kîr nawlh lo ma?

⁵Chu hâwi asi chun, ka mi le tla, zeirangah hawng kîr lo rawh ding hen ka sinah mi nanna her ving? Nan milem lakah nanna bek thlir le, ka sinah kîr nawlh ding nan duh lo.

⁶Thiamthih tak hen ka ngâi le, sikhawmsele thu dik rêng nan sim lo. Nan lakah âukhawm a sual ruangah pawi ti an um lo; ‘Zei thilsual me ka ti aw?’ ti hen ruattu pakhat khawm nan um lo. Râltuk ding hen rang a tek mi hâwi hen mah duhnâk chiauah nan kal kumza.

⁷Lili âr men nih kîr tik a theih; vaṭhu, thlâkâwi, thrush tla khawm nih ṭiau tik an theih. Sikhawmsele, ka mi tla, nannih nih lâi kan rêl piak na dân nan theih lo.

⁸Zeitin fing leh ka dân theih hen nanna ruat zia? Zauhnik u, dân chu lasuirîntu zumhkâilo tla nih an thleng hep.

⁹Nan mifing tla chu ningzak saih hen an um le, anna nawk le, anna awh pang. Ka thu an duh lo le; tuah zei finghnâk me anna ting?

¹⁰An phâisen chu midang a dâwngpu thar rangah ka pêk na lai le, an nupi tla midang sinah ka pêk na lai. A lian a mê hen tangka leikângah zumhkâilo hen an um. Khuavâng leh bâwlpu tla men nih mi an perpet.

¹¹Ka mi le tla liammâ chu kheuh mi hâwi cho hen an ti. Ṭhalo pet hen, A ṭha ver rawh,’ an ti.

¹²Ka mi tla, hi bang thil fihnungkâi nan ti ruangah nan ning a zak ma? Zak lo, na ning zak lo thlo; ningzak khawm nan theih lo! Churuangah midang an tlû mi hâwi hen nan tlû bâk lai, ka nan rêp na tikah nan dawnghnâk asi lai rawh. Kei, LALPA, nih ka sim asi.

¹³“Mi nih mîm-leh-fâng a pumh mi hâwi hen, ka mi le pumh na ding ka duh le; sikhawmsele, grep zûn rah lo leh theipi kûng rah lo hen a nah tiang uai ver mi hâwi an si. Churuang chun lênglei mi tla nih ram lâk hep ding hen ka siang,” a ti.

¹⁴Pathian mi tla nih, “Zeirangah kan to nget ko rih? Hawng u, kulhnei khuapi ah kan tek lai le, chunah kan thi ko lai. LALPA kan Pathian nih thi ding hen hawng kan mawhtir le; din ding hen tûr hawng kan pêk, a lakah kan sual ruangah.

¹⁵Thlangam ding leh dam ding tik kan lungum le, sikhawmsele zeikhawm asi lo rawh; chu ngâk hen ṭihnungkâi lehlam a tlung.

¹⁶Kan mêlma tla chu Dan khuapi ah an um ving rawh; an rang tla nâr tum hâu kan theih. An rang tla nih hâu an suah chun ram pumpi a thir. Kan mêlma tla chu kan ram râwk ding leh a sung ah um mi zawzawng râwk ding hen an hawng le, kan khuapi tla leh a mi tla zawzawng hen,” an ti.

¹⁷LALPA nih, “Vêng u, rûl tûrnei, dâwi kho lo mi nan lakah ka hawng fial, an chuk na lai,” a ti.

¹⁸Ka lungfâknâk chu damh kho asi lo; ka thinlung ah ka ngawr.

¹⁹Ngâinik u! Ram pumpi ah ka mi tla ṭap hâu ka theih, “Zion ah LALPA a um lo rawh na maw? Chunah chun Zion lalchem a um lo rawh na maw?” ti hen, LALPA, an lalchem nih a sâng le, “Zeirangah nan milem tla sawnh hen leh nan ramdang pathian tla zeikhawm silo mi sinah kûn hen ka thin nan ka thawktir?” a ti.

²⁰Zapi tla nih, “Ṭhâlpini khawm a lan rawh, fângzûn khawm â lîm rawh, sikhawmsele ruangsuah hen kan um lo,” ti hen an ṭap.

²¹Ka mi le tla râwk hen an um ruangah ka thinlung khawm â râwk rawh; ka lung a fâk le, ka thinlung a dawng thlo rawh.

²²Gilead ram ah turpang a um lo men maw? Chunah chun daktawr an um lo na maw? Chu hâwi asi chun, zeirangah ka mi tla an dam dah lo rih?