Read Bawm Chin LUNGFÂKNÂK 1 Bible Online

LUNGFÂKNÂK 1 - Bawm Chin bible

LUNGFÂKNÂK 1

¹Jerusalem, veikhat chu minung khat dul hen A um mi a king rawh chiam e! Veikhat chu laikulh pumpi nih zah hen a um mi Tu chun numei hâwi cho asi rawh. Khuapi lianchem chu sal asi ving rawh.

²Zân khuavâr hen a ṭap le; a mitthli chu a thinmakâ ah a luang. A lânah a hâwikawmh tla zawzawng anih rangah Thlangamhtu pakhat khawm an umlo. Amah lei ṭângṭawmtu nih an tleih le, amah dotu an si ver rawh.

³Juda mi tla chu bawmhtu neilo sal an si rawh. In a mi chu zângran hen an kalpi. Mah ram silo mi ramdang ah an um. Suaknâk umlo hen mêlma tla nih an kulh dak na.

⁴Tu chu ni thenhlimh tla khawmah âukhawm Pathian sawnh ding hen an hawng lo rawh. Nungâk lasaktu tla khawm nih an tuar le, Bâwlpu tla khawm an rûm mi ko rawh. Khuapi kulh kawtkâ tla chu a karo hen a um le, Zion chu ngaihsiatnâk ah a um rawh.

⁵A mêlma tla chu anna dingchang le, An thiltikhonâk hen an tleih thlir. LALPA nih a sual tamtak ruangah a tuartir le; A fa tla chu an tleih le, an kalpi ving na.

⁶A lânah a rokualnâk tla a theih vung rawh. Mêlma nih neh liauah, âukhawm ṭangpitu a um lo; A nehtu tla nih a tlû mi chu an nihsanh.

⁷Jerusalem chu tu chun thimpem hen a um rawh le, A lânah a rokualnâk tla a theih vung rawh. Mêlma nih a neh liauah âukhawm ṭangpitu a um lo, A nehtu tla nih a tlû mi chu an nihsanh.

⁸Zah a kâinâk chu a vei rawh. Takkaro leh mi zauhnawmh hen a um rawh. A rûm le, a ningzak tuk ah a mêl a thuh. Jerusalem chu sual ṭihnungkâi tak hen a nâwmtâmtir rawh.

⁹A nâwmtâmnâk chu awldek hen muh hen a um le, A vânduai ding mi khawm a ruat lo. Niamtir hen a um mi chu thungâi ṭihnung a kâi le; Pakhat khawm nih thla an ngamh kho lo. A mêlma tla nih an neh le, khuaruatnâk ngiar hen LALPA sinah a ṭap.

¹⁰A mêlma tla nih a neih zawzawng an râwk hep. LALPA nih phun dang tla lût ding hen a siang lo mi Biakin ah an lût mi tla khawm a muh ko.

¹¹A mi tla chu ei ding hâwl hen an rûm; Nung ding duh hen an thilneih hen buh an thleng. “LALPA, hawng ka zauhnik, ka hamh mi hi hawng ka muh rawh,” ti hen khuapi chu a ṭap.

¹²Amah paltu sin kipah, “Hawng ka zauhnik u!” ti hen a ṭap. Ka nganfâk LALPA nih a thinthawk liauah ka tlûnah A tlungtir mi hâwi hi âukhawm nih an tuar dah lo.

¹³“Vân thawk hen mei a hawng thlâk mi nih ka sungah hawng ka duah. Ka rangah thang a tunh le, tual ah hawng ka siah. Churawhchun nganfâknâk reh lo hen hawng ka kaltâk ving.

¹⁴“Ka sual singsiahnâk zawzawng chu a lâk le, a têl hep; Ka ngâwng ah hawng ka awih le, chu rit nih chun hawng ka uaitir dadauh. LALPA nih ka mêlma sinah hawng ka pêk le, An lakah mi ṭangpitu ding ka nei lo rawh.

¹⁵“LALPA nih ka kawrsen chak chem tla chu a nihsanh na le; Ka tlangvâl tla veih ding hen kawrsen tla a hawng fial na. Grep sûrnâk ah sûr mi hâwi hen ka mi tla chu a veih na.

¹⁶“Churuangah asi ka mit ah mitthli tla a luang mi chu. Âukhawm nih thla an hawng ka ngamh hen lungiam an ka sak kholo. Mêlma nih hawng ka neh le; ka mi tla nih zeikhawm an mâk lo.

¹⁷“Ka kut ka phar le, sikhawmsele âukhawm nih an hawng ka ṭangpi lo. LALPA nih mun kip thawk hen mêlma ka sinah a hawng tir; Thil nâwmtâm hâwi hen an ka ruat.

¹⁸“Sikhawmsele, a thu ka ngâi lo dangâiah LALPA chu a dik asi. Mun kip ah mi tla, ngâi ule; ka nganfâk tuar hi hawng ka zauh u. Ka tlangvâl leh nunau tla khawm sal ah an put hep na.

¹⁹“Keimah lei ṭângṭawmtu tla ka kawh le, Sikhawmsele ṭangpi ding an ka duh lo. Bâwlpu tla leh ruitu tla chu khuapi zâwllâi ah an thi le, Chu tla chu nung ding hen buh hâwltu tla an si.

²⁰“LALPA, ka lawksawngnâk leh ka thinlung fâk zia tla hi zauh! Ka sual ruangah ka thinlung a fâk rawh. Khua lâi tlâng ah thahnâk a um le; in sungah khawm thihnâk a um.

²¹“Âukhawm thlangamhtu umlo hen; ka rûm mi hi ngâi. Ka lakah siatnâk na hawng tlungtir mi ruangah Ka mêlma tla chu anna lâwm. Thu na tiam mi ni hawng tlungtir le; Ka tuar mi hâwi hen ka mêlma tla tuartir na.

²²“An thilsual ti ruangah mawhtir na le; Ka sual ruangah na ka rêp mi hâwi hen rêp na. Hamhtuar hen ka rûm le, ka thinlung a fâk,” a ti.