Read Bawm Chin LUNGFÂKNÂK 4 Bible Online

LUNGFÂKNÂK 4 - Bawm Chin bible

LUNGFÂKNÂK 4

¹Kan ngûn a tlêu mi tla khawm a nawh rawh; Biakin lung tla khawm zawllâi ah rek thu hen a um.

²Zion tlangvâl tla chu kan rangah ngûn hâwi an sung le sikhawmsele tu lam chun tual hel rarâu hâwi hen an ti na.

³Chingngia nunau men nih a fa a kuri le, sikhawmsele ka mi tla lam chu vachâ nih an fa tla an rem lo mi hâwi an si.

⁴An fa le tla chu sungvâng leh tîhâl hen an thihtir na le; ngâksia tla nih buh an deih mi chu âukhawm nih an pêk na lai lo.

⁵Buh-an thâw chem eitu tla chu khua lâi ah sungvâng hen an thi le; nuamchenhtu tla chu ei ding hâwl hen nâwmtâm an thâi.

⁶Ka mi tla nih Sodom khua mi tla ngâk hen rêp an tuar fâk dauh le, chu tla chu lâkkhatko ah Pathian kut hen niamh ving hen an um.

⁷Kan lal fa tla chu vûr hâwi hen nâwm lo leh thenhlimh an si, chak tak leh vak tak hen, dam leh sen ak hen an um.

⁸Tu lam chun khua lâi ah theih lo hen an mêl dum chik hen an rîl le, van vûn tla chu thing hâwi hen a châr le, an ruh lakah â bêk pang.

⁹Râltuknâk ah thi mi chu, a nehnûnah sungvâng hen âukhawm buh pêktu umlo hen tuar kholo rawh ruangah thi mi ngâk hen a ṭha dauh.

¹⁰Ka mi tla lakah siatnâk a hawng tlung mi nih lâunâk a tlungtir; dâwttu nu tla nih an fa tla chu ei ding ah an suang na.

¹¹LALPA nih a thinthawknâk zawzawng chu a thlah dul; Zion ah mei a tih le, chu nih chun a khangh hep.

¹²Zei ram mi minung khawm nih, ramdang phun tla lâirêltu tla khawm nih Jerusalem kulh chu rûntu âutal lût kho ding an ruat lo.

¹³Sikhawmsele a khuavâng tla leh a bâwlpu tla sual ruang chun sual neilo mi tla thihnâk a hawng tlungtir.

¹⁴A ruitu tla chu mitchâw hâwi hen khualâi ah an vâk le, âukhawm tawnghlo hen thi anna bawih hep.

¹⁵Mi tla nih, “Kal ving! Nan nâwm tuk! Hawng ka tawngh lah u!” an ti. Churuangah phun tla lakah sawk lemang hen an um le, âukhawm nih an lawmh na lo.

¹⁶LALPA nih anmah a âwva na lo rawh le; amah ngelchel nih a rektir ver na. Kan bâwlpu tla leh hawng kan ruitu tla chu a sunhsak na lo rawh.

¹⁷Chim leh neng rê hen ṭangpi kan hâwl khawmah a hawng tlung dah lo. Hawng kan pêk lo ding mi phun tla chu hawng kan ṭangpi ding hen kan ngâk.

¹⁸Kan mêlma tla nih hawng kan vêng rêt le, khua lâi khawmah kanna sawk kho lo. Kan ni tla khawm a lan rawh; a dawnghnâk a tlung rawh.

¹⁹Mupi vân thawk hen â thlûr mi ngâk chak dauh hen hawng kan ṭhâwl. Tlâng ah hawng kan ṭûmpi le; vramkaro ah chê tak hen hawng kan kalpi.

²⁰LALPA nih a thîm mi lalchem hawng kan rûntu lakah humtu ah kan rinhsanh mi kan nungnâk bulpi chu an tleih rawh.

²¹Sodom leh Uz mi tla, nan tikho liauah a lâwm ule, ni u. Na siatnâk a hawng tlung bâk rawh; nang khawm takkaro, ningzakkâi tak hen na hâwr bâk lai.

²²Zion chu a sual man pêk asi rawh; LALPA nih sal ah hawng kan tângtir lai lo rawh. Sikhawmsele Edom, LALPA nih a nan rêp lai le, na sualnâk chu a langh lai.