Read Bawm Chin LUNGFÂKNÂK 5 Bible Online

LUNGFÂKNÂK 5 - Bawm Chin bible

LUNGFÂKNÂK 5

¹LALPA kan lakah thil a hawng tlung mi theihkumza. Hawng kan zauh le kan mualphonâk hi zauhnik.

²Kan thil-le-rî chu khual tla kut ah a um le; ramdang mi tla chu kan in tla ah an um.

³Kan pa tla chu mêlma tla nih an thah na le, tu chun kan nu tla chu numei an si rawh.

⁴Kan din ding tî tla chu a man pêk ding a suak rawh; tih ding mi thing tla khawm châwk a ngâi rawh.

⁵Sanatung leh sangâwngsâu tla khalh mi hâwi hen kan um. Kan dî thlo, sikhawmsele dîn ding siang asi lo.

⁶Buh paw khawp tawng ding leh nung ding hen Aigupta leh Asiria leiah deih ding hen kan kal.

⁷Hawng kan thlâktu tla nih thilsual an ti le, tu chun an kal ver rawh, anmah sualnâk ruangah kanmah nih kan tuar rawh.

⁸Sal khawm tluklo mi tla nih kan tlûnah lâi an rêl le, an thiltikhonâk lakah mi chu âukhawm nih hawng kan hum kho lo.

⁹Ram lakah mi thahtu tla anna sawk dut le; buh kan hâwl liauah thih ûilo hen kan hâwl.

¹⁰Kan sung a vâng tuk le, kan zâw phah rê, kan vun tla chu lungthukâ hawi hen a lîn rê.

¹¹Kan nupi tla chu Zion tlâng ah tleihrêm hen an um le, Juda khua kipah kan fanu tla chu an zângsual na.

¹²Hawng kan ruitu tla chu an tleih na le, an thlâi na; kan tarpa tla nih khawm zah an tawng lo.

¹³Kan tlangvâl tla chu sal hâwi hen zângran hen fâng an rial tir na le, mipa ngâksia tla khawm hâwr lemang hen thing rit tak an phurhtir na.

¹⁴Upa tla khawm khuapi kulh kawtkâ ah an to lo rawh, nungâk tlangvâl tla khawm nih tumphung an tum lo rawh.

¹⁵Kan lakah mi lâwmnâk a vei ving rawh; kan lâmnâk chu ngaihsiatnâk lam asi rawh.

¹⁶Kan umsan mi zawzawng chu zeikhawm an mâk mi a um lo. Thilsual kan ti le, tu chun kan vânduai rawh.

¹⁷Kan thinlung a ngawr le, kan mitthli tlâk ruangah fiang hen kan muh kho lo,

¹⁸Zion tlâng chu king dem hen a karo hen a um ruangah, â râwk mi lakah kâwlui tla râwl hâwl hen anna sawk.

¹⁹Sikhawmsele, LALPA nang chu Lal na si kumza le, hun dawngh tiang lâi na rêl lai.

²⁰Zeirangah chu tluk rak hen sâwt hen na kan kaltâk? Na kan theihkumza awt lo rawh na maw?

²¹LALPA, na sinah hawng kan kîrtir nawlh rawh! Hawng kan kîrtir nawlh râm rawh! A lânah mi kan rokualnâk hawng kan pêk nawlh.

²²Na kan nawng kumza awt na maw? Silo leh na thinthawknâk a dawng awt lo rêng na maw?