Read Bawm Chin EZEKIEL 1 Bible Online

EZEKIEL 1 - Bawm Chin bible

EZEKIEL 1

¹Kum sâwmthumnâk a thla linâk ninga ni ah kei, bâwlpu Ezekiel, Buzi fapa leh Juda sal tâng tla hen Babulon ah Kebar tiva kiangah kan um. Vân â awng le, Pathian muhtirnâk ka muh.

²(Chu chu lalchem Jehoiakin sal ah a tâng mi a kum nganâk asi.)

³Babulon ram ah mi Kebar tiva kapah chun LALPA nih ka sinah thu a sim mi ka theih le, a thiltikhonâk chu ka theih rawh.

⁴Tlûnlei ka zauh le, marlei thawk hen thlipi a hawng mi ka muh. Vândâwm sah tak lakah mîmthlâ a hawng lek le, a kiangkam vân chu a chêu pup. Mîmthlâ a lek mi lakah chun zeimawh dâr hâwi hen a tlêu mi a um.

⁵Chu thli lâi ah chun, minung mêl put hen thilnung siam mi pali ka muh le,

⁶chu tla nih mêl pali ah thlâ pali an nei chiau.

⁷An kê tla chu ding ziar hen a um le, chawchal hâwi hen tin an nei. Dâr rawng bawih mi hâwi hen an tlêu.

⁸An thlâ pali leh an mêl pali lâwng silo hen an thlâ tang kipah minung kut pali thlâ pakhat tang kipah pakhat an nei seng.

⁹An thlâ panih chiau chu an pharh le, kil li si ding hen an thlâ pâr an tawnh hep. An kal khawmah an taksa her lo hen a murui hen an kal.

¹⁰Thilnung kip nih mêl dang zât li an nei chiau: mâilei kângah chun minung mêl, vawrhlei kângah chun chakeibaknei mêl, kehlei kâng chu chawchal mêl, dunglei kângah mi chu mupi mêl an put.

¹¹An thlâ panih chu an zangh le, an thla pâr leh an thla pâr chu â tâwng hep, an thlâ panih chiau hen an tak an tuam.

¹²Mêl kip nih anmah zâwn chiau kâng li anna hawi le, churuangah an murui hen her lo hen an duhnâk leikâng zawngah an kal.

¹³Chu thilnung tla lakah chun meifâr alh a zî lemang mi hâwi a um. Chu mei chu a hawng alh le, mîmthlalek a hawng suak.

¹⁴Chu thilnung tla chu mîmthlalek lakah chun khatlei khatlei ah an per.

¹⁵Chu thilnung pali chu ka zauh na liauah tual tawngh hen kari kê pali ka muh le, an sîr kipah pakhat chiau hen.

¹⁶Kari kê pali chu anna bang hep; lungsung hâwi hen an chêu ver, pakhat chiau nih kari kê dang a lâi ah an nei chiau le,

¹⁷chu kari kê tla chu kâng li ah duh duh hen kal kho ding hen.

¹⁸Chu kari tlâng chu mit nih a tuam zat.

¹⁹Zeiliau zawngah chu thilnung an kal chun kari kê tla khawm an kal bâk, chu thilnung tla chu tual ah mi an zuang khawmsele kari kê tla khawm an zuang bâk.

²⁰Chu thilnung tla chu an duh duhnâk leiah an kal le, chu hâwi hen kari kê tla khawm an um bâk, thilnung tla nih an duh duh hen an ti mi asi ruangah.

²¹Chu thilnung tla chu an kal khawmah, anna dîn khawmah, tlûnlei an zuang khawmah, chu hâwitê hen kari kê khawm a um bâk.

²²Chu thilnung lû tlûnlei chun thil lûm zeimawh krustal mitser rê hen siam mi hâwi a um.

²³Chu lûm tangah chun thilnung pali an dîr le, an thlâ panih chiau chu an hâwi le leiah an hawng pharh le, an thlâ dang panih hen an taksa an khuh.

²⁴An zuang liauah an zuang hâu ka theih le; tipi hâu hâwi mawh, kawrsen murui hâu hâwi mawh, Pathian Zeizawng tikho hâu hâwi a put. An zuang mi anna dîn chun an thlâ an tawm le,

²⁵sikhawmsele an tlûnlei mi lûm thawk hen rihâu chu a um nget rih.

²⁶Chu lûm tlûnlei chun saphir lung hen siam mi laltophah hâwi a um le, a tlûnah chun minung hâwi hen mi a to.

²⁷Chu minung chu mei lâi ah dâr a tlêu mi hâwi hen a lang. Chumchâ lakah a zât zât a um mi hâwi hen a chêu pup.

²⁸Chu chêu mitser rê mi nih chun LALPA a um mi a zauhtir.