Read Bawm Chin EZEKIEL 10 Bible Online

EZEKIEL 10 - Bawm Chin bible

EZEKIEL 10

¹Chu thilnung thlâ nei tla lû tlûnlei mi lûm chu ka zauh le, an tlûnlei kângah thil zeimawh saphir hen siam mi laltophah hâwi mi a um.

²Pathian nih puannêm aihtu sinah, “Khi thilnung tangah mi kari kê karah kal le, meiṭil na kut khat phak hen rût. Churawhchun chu meiṭil chu khuapi tlûnah vawrh,” a ti. A kal mi chu ka zauh ko.

³A va lût liau chun thilnung thlâ nei tla chu Biakin simlei kângah an dîr le, Biakin kulh sung chu sûm hen a khat rawh.

⁴LALPA chêu mit ser rê mi chu thilnung tla lakah mi a thawk le, Biakin tualmâi leiah â ṭhial. Churawhchun, Biakin chu sûm hen a khat le, a kulh tla chu a chêu pup.

⁵Thilnung tla thlâ khâwng hâu chu kulh lênglei hen khawm theih kho asi. Pathian zeizawng tikhotu hâu hâwi a put.

⁶LALPA nih puannêm aihtu chu thilnung tangah mi kari kê karah mi mei chu lâk ding hen thu a pêk rawh chun chu minung chu a va lût le kari kê pakhat kiangah a va dîr rawh.

⁷Thilnung tla lakah pakhat nih chun anmah sinah mei a um mi lakah a kut a siah le, meiṭil chu a lâk le, puannêm aihtu kut ah a siah rawh. Chu minung nih chun meiṭil chu a lâk le, a kal rawh.

⁸Thilnung kip nih an thlâ tang chiauah minung kut hâwi an nei seng mi ka muh.

⁹Bang ver hen kari kê pali ka muh na le, thilnung pakhat sîr chiauah a um. Chu kari kê tla chu lungsung hâwi hen an chêu le, pakhat chiau nih kari kê dang a lâi ah an nei chiau.

¹¹Chu thilnung tla chu an kal khawmah her ngâilo hen duhnâk lei zawngah an kal kho. Kal ding an duhnâk zawngah munkhât hen an kal le, anna her lêm lo.

¹²An taksa tla, an dunglei tla, an kut tla, an thlâ tla leh kari kê tla chu mit nih a tuam zat.

¹³Hi kari kê tla hi a lânah muhnâk a tîr ah ka muh mi hen â bang cho.

¹⁴Thilnung kip nih mêl pali an nei. A pakhatnâk chawchal mêl, a panihnâk chu minung mêl, a pathumnâk chu chakeibaknei mêl, a palinâk chu mupi mêl an put.

¹⁵(Kebar Tiva kapah ka muh mi thilnung tla hen â bang cho.)

¹⁶Chu thilnung tla chu vân leiah an kâi hen an kal liauah kari kê tla khawm an sinah an kal bâk. Zuang ding hen an thlâ an pharh tik zawngah chu kari kê tla chu an kal vima bâk.

¹⁷Thilnung tla anna dîn chun kari kê tla khawm anna dîn bâk; thilnung tla an zuang chun chu kari kê tla khawm a kal vima bâk, kari kê tla chu thilnung tla thu thu hen an um ruangah.

¹⁸Churawhchun LALPA chêu mitser rê nih Biakin tualmâi chu a kaltâk le, thilnung tla tlûnlei mi mun ah a va kal.

¹⁹Ka zauh ko na liau chun an thlâ an pharh le, tual thawk hen tlûnlei ah an zuang, kari kê tla khawm an sinah an kal bâk. Biakin saklei kângah mi kulh kawtkâ ah anna dîn le, chêu khawm an tlûnlei ah a um.

²⁰Israel Pathian tangah Kebar tiva kapah ka muh mi thilnung hen â bang cho ti ka theih rawh.

²¹An ektê hen mêl pali, thlâ pali, an thlâ tangah minung kut hâwi an nei seng.

²²An mêl tla chu Kebar tiva kapah ka muh mêl hâwitê an si. Thilnung kip chu ding tar hen an kal.