Read Bawm Chin EZEKIEL 11 Bible Online

EZEKIEL 11 - Bawm Chin bible

EZEKIEL 11

¹Pathian thlarau nih hawng ka châwi le, Biakin saklei mi kulh kawtkâ kiangah hawng ka put. Chu kulh kawtkâ kiangah chun minung kul leh panga Azur fapa Jaazaniah leh Benaiah fapa Pelatiah rêlsih hen phun ruitu panih ka muh na.

²Pathian nih ka sinah, “Thikho mi minung, hi minung tla nih khuapi mi tla rangah thilsual ti tum hen thu ṭhalo an simh na.

³‘Sâwtlotê ah in tla kan sak nawlh lai. Khuapi chu suangnâk bêl hâwi asi, kannih chu a sungah mi sa hâwi kan si le, sikhawmsele mei lakah mi chu hawng kan hum nget lai, an ti.

⁴Thikho minung, asi chun tuah anmah sâwinâk thu sim,” a ti.

⁵LALPA thlarau nih a hawng ka luah le, mi zapi sinah hi thuchah hi sim ding hen LALPA nih hawng ka simh rawh: “Israel mi tla, nan thusim leh nan thiltum chu ka theih asi.

⁶Hi khuapi ah mi cherkhet nan thah na le, zâwllâi chu mithi ruak hen a khat.

⁷“Churuangah, kei LALPA Zahkâi nih hi thu hi nan sinah ka sim asi. Hi khuapi hi suangnâk bêl chu asi tatak ngâk, sikhawmsele sa chu zei me si? Nanmah nih nan thah na mi ruak tla an si! Hinah nan um ding asi lo, khuapi lênglei ah ka nan lawnh ving na awt!

⁸Nâmsâu tla nan ṭih ma? Nanmah do ding hen nâmsâu puttu tla ka hawngpi na awt.

⁹Hi khuapi lakah mi ka nan suah na lai le, ramdang mi kut ah ka nan pêk na awt.

¹⁰Thi ding hen ka nan rêp na le, nanmah ram takah râltuknâk ah thah hen nan um lai. Chu tikah kei LALPA ka si ti mikip nih an theih lai.

¹¹Bêl sungah mi meh bêl nih a hum mi hâwi hen hi khuapi nih a nan hum na ding asi lo. Israel ram zei mun tal ah um khawm ule, ka nan rêp na awt nget.

¹²Kei LALPA ka si mi leh nan kiangkam mi phun tla dân nan zûl liauah, ka dân tla nan buar hen ka thupêk tla nan ngâi lo mi tla nan theih lai,” a ti.

¹³Thu ka sim liau chirah Pelatiah chu a tlâ le, a thi thlo. Kei khawm tual ah bawkbukhup hen ka bawk le, “LALPA Zahkâi, hi hâwi ding asi lo! Israel ram ah um lem mi tla chu na thah awt ver na maw?” ti hen ka âu.

¹⁴LALPA nih ka sinah thu a sim.

¹⁵“Thikho mi minung, Jerusalem ah um mi tla nih nang leh na hâwi Israel tla sal ah tâng mi tla thu an ruat. ‘LALPA sawnh ding hen sal tâng tla chu an lât tuktarâi rawh. Ram ting ding mi chu a hawng kan pêk rawh,’ an ti.

¹⁶“Tuah ka sim mi hi na hâwi sal tâng tla simh na. Phun lât tak tla sinah a nan umtir natu leh ram dangah a nan rekrâwitir natu chu keimah ka si. Sikhawmsele, an kalnâk mun kipah an um sung zawzawng an sinah ka um awt.

¹⁷“Churuangah, kei LALPA Zahkâi nih ka sim mi thu chu simh na. Ka rekrâwitir na mi ram ah mi chu ka pumh ver na lai le, Israel tla sinah ram chu ka pêk nawlh na lai.

¹⁸An hawng kîr tik chun thil nâwmtâm zawzawng leh mi lem fihnungkâi an tawng mi lakah mi chu anna lît lai rawh.

¹⁹Thinlung thar leh dawnruatnâk thar ka pêk na lai. An thinlung ê-aw ngâilonâk lung hâwi hen a chang mi chu ka lawnh piak na lai le, thinlung ê-aw ngâinâk ka pêk na lai.

²⁰Churawhchun ka dân tla an zûl lai le, zumhkâi tak hen ka thupêk tla an zûl lai rawh. Ka mi tla an silai le, kei an Pathian ka si lai.

²¹Sikhawmsele milem fihnungkâi leh nâwmtâm sawnhtu tla chu ka rêp na awt. An thilti ruangah ka rêp na awt,” a ti. LALPA Zahkâi nih a sim asi.

²²Thilnung tla chu an zuang le, kari kê tla khawm an sinah a kal bâk. Israel Pathian mitser rê chêu chu an tlûnah a um.

²³Mitser rê mi chêu nih khuapi chu a kaltâk le, saklei mi tlâng ah â ṭhial.

²⁴Muhnâk lakah chun Pathian thlarau nih hawng ka châwi le, Babulon sal tâng tla sinah hawng ka put. Churawhchun muhnâk chu a vei le,

²⁵LALPA nih thil zeizawng hawng ka muhtir mi chu sal tâng tla ka simh na.