Read Bawm Chin EZEKIEL 12 Bible Online

EZEKIEL 12 - Bawm Chin bible

EZEKIEL 12

¹LALPA nih ka sinah thu a sim.

²“Thikho mi minung, mi hel nâwngah um mi na si. Mit an nei le, sikhawmsele zeikhawm an muh lo; nâ an nei le, sikhawmsele zeikhawm an theih lo, mi hel an si ruangah.

³“Thikho mi minung, ramdang leiah tek ding mi hâwi hen na thil-le-rî tuam le, a mûi lânah a thawh. Na suak mi leh mun dang leiah na kal mi chu mikip nih an muh seh. Chubang mi hel tla nih an theih kho lai mawh.

⁴Sûn nî chêu ah na thil-le-rî tla sal ah tek ding hâwi hen têl le, zânleibâi ah sal ah kal ding mi hâwi hen na thawh mi chu a nan muh kho ding hen a nan vêng seh.

⁵A nan muh liau chirah na in vâm pemh le, na pemh mi thawk hen na thil têl chu lâk.

⁶An mitmuh ah na thil têl chu na liangah thâng le, na mit tuam bû hen mûi lakah suak le, zei leikângah kal ding asi na muh kho lo ding hen. Chu na thilti chu Israel tla simhkannâk asi lai,” a ti.

⁷LALPA nih ti ding hen hawng ka simh mi hâwitê hen ka ti rawh, Ramdang lei tek mi hâwi hen chu ni ah chun ka thil chu ka têl le, zânleibâi mûi sulsal ah ka kut hen vâm chu ka pemh le, ka suak rawh. Mikip nih an hawng ka muh liau takah, ka thil têl chu ka liangah ka thâng le, ka kal rawh.

⁸A thâituan ah LALPA nih ka sinah thu a sim.

⁹“Thikho mi minung, tuah Israel mi hel tla nih zei me na ti ti hen a nan deih mi thu ah,

¹⁰kei, LALPA Zahkâi nih an sinah thu ka sim ding mi chu simh na. Hi thuchah hi Jerusalem ah lâirêltu lal leh a sungah um mi tla rang asi.

¹¹Thil na ti mi tla chu hi nûnah thil hawng tlung ding mi lakah ramdang ah tek hen sal an si ding mi zauhtirnâk asi ti simh na.

¹²An tlûnah lâirêltu lal chu mûi lakah a thil têl a liangah a thâng lai le, a rangah vâm âwng an siam mi lakah a suak lai. A mit a tuam pang lai le, zei leiah a kal awt ti khawm a muh lai lo.

¹³Sikhawmsele, ka lên ka zâr lai le, chu lakah ka tângtir awt. Churawhchun Babulon khuapi leiah ka put lai le, chunah chun khua muh lo hen a thi lai.

¹⁴A rianṭuantu tla zawzawng, thu simhtu tla leh amah vêngtu tla chu mun kipah ka rektir phin na lai le, mi tla nih thah ding hen an hâwl na lai.

¹⁵“Phundang tla nâwngah leh ramdang ah ka rekrâwitir ver na tikah kei, LALPA ka si mi an theih lai rawh.

¹⁶Tuknâk, pâmnâk leh râi lakah thibang tâwmtê ka zuah na lai le, phun tla nâwngah an thilti fihnung a kâi zia leh kei LALPA ka si zia an theih lai,” a ti.

¹⁷LALPA nih ka sinah thu a sim.

¹⁸“Thikho mi minung, tî-râwl na ei tik ah thir le, tî na din liauah lâu hen a nîn.

¹⁹LALPA Zahkâi nih an ram Jerusalem ah um rih mi tla rangah thu a chah mi hi phun pumpi rangah simh na: Tî-râwl an ei tikah an thir lai, tî an din tikah lâu hen anna nîn lai. An ram ah mikip dân neilo hen um mi an si ruangah an ram chu a karo hen a um lai.

²⁰Tuah khuapi minung hen a khat mi chu veih hen a um lai le, ram khawm ramkaro hâwi hen siam asi lai. Chu tikah kei LALPA ka si ti an theih lai,” a ti.

²¹LALPA nih ka sinah thu a sim.

²²“Thikho mi minung, zeirangah Israel mi tla nih hi thufing hi an ti nawlh lemang: ‘Tik a len vima le, simkannâk thu khawm zeikhawm asi lo,’ ti mi hi.

²³Kei LALPA Zahkâi nih, chu leikâng thu ka sim mi chu tuah simh na. Chu thufing chu ka dawngtir awt. Israel lakah chu thu chu an sim lai lo rawh. Chu hâwi ding ngangâk hen tik a hawng tlung, simkannâk tla khawm a dik vima ti simh na.

²⁴“Israel mi tla lakah muhnâk diklo mawh kal sualnâk thusim diklo khawm a um lai lo rawh.

²⁵Kei, LALPA Zahkâi nih an sinah thu ka sim lai rawh le, ka sim mi tla chu ti hen a um lai. Hun sâwt asi lai lo rawh. Nan dam sungah nan hel le, ti ding hen ka nan simhkan na mi chu ka ti awt. Keimah nih ka sim asi,” LALPA Zahkâi nih a ti.

²⁶LALPA nih ka sinah,

²⁷“Thikho mi minung, Israel mi tla nih na muhtirnâk leh thu simkan tla hi hi nûnthâi ving ding mi si hen an ruat.

²⁸Churuangah kei, LALPA Zahkâi nih ka sim mi thu hi simh na: Tam a tlâi lai lo rawh. Ka sim mi chu ti hen a um lai. Kei, LALPA Zahkâi nih ka sim asi!” a ti.