Read Bawm Chin EZEKIEL 13 Bible Online

EZEKIEL 13 - Bawm Chin bible

EZEKIEL 13

¹LALPA nih ka sinah thu a sim.

²“Thikho mi minung, Israel lakah khuavâng mah thu ko hen thusimtu chu sâwi. LALPA thu ngâi ding hen simh na,” a ti.

³Hi hi LALPA Zahkâi thusim asi: “Hi bang khuavâng tla hi mi vânduai tak an si! Anmah thinlung thawk leh anmah phuah sawm mi muhnâk an simh na.

⁴Israel mi tla, nan khuavâng tla chu khuapi a râwk mi lakah kâwlui zeikhawm mang tlâk lo mi hâwi an si.

⁵Kulh a râwknâk tla khawm an zauhkhenh hen an remh lo, churuangah LALPA ni ah râltuknâk a hawng um khawmah Israel chu anna vêng kho ding asi lo rawh.

⁶An muhnâk tla khawm a dik lo, an simkan mi tla khawm âwkrâwl hep asi. Keimah nih fial na lo pet hen keimah thuchah simtu ah anna ruat. An thu tla chu dik tak hawng tlung ding hen an lungum nget rih!

⁷Chubang muhnâk nan muh mi tla chu a dik lo le, thu nan simkan mi khawm âwkrâwl asi. Keimah thusim hen nan sim le, sikhawmsele nan sinah thu ka sim lo!” ti ka nan simh na.

⁸Churuangah LALPA Zahkâi nih an sinah, “Nan thusim tla a diklo, nan muhnâk tla khawm âwkrâwl asi. Ka nan do na asi,

⁹nannih muhnâk diklo muhtu leh kal sual ding hen simkannâk diklo mangtu khuavâng tla, ka nan rêp na awt. Thu thlûk ding hen ka mi tla ka pumh na nâkah nanna tel lai lo; Israel mi rînnâk lakah nan min khawm telh asi lai lo; nan ram ah khawm nan kîr nawlh lai lo. Chu tikah kei, LALPA Zahkâi ka si ti nan theih lai.

¹⁰“Khuavâng tla nih, ka mi tla chu zeizawng a dik ver ti hen mahlo leikângah an pialpi ver na. A ektê hen a dik ver lo thlo! Ka mi tla nih lung kulh bir lo hen an siam le, churawhchun khuavâng tla an hawng le, hawl an buaih.

¹¹Khuavâng tla chu an kulh a tlû ding mi simh na. Tî a tlê mi hâwi hen ruah ka sûrtir awt. Rial tla a tlûnah a tlâ lai le, thli chawp tak a lakah a râng lai.

¹²Chu kulh chu a chim lai le, mikip nih hawl hen buaih mi chu zeikhawm a ṭhatnâk a um lo ne an ti lai,” a ti.

¹³Tuah hi hi LALPA Zahkâi nih a sim mi asi: “Ka thinthawk ruangah thli chawp tak, ruah tukpi leh rial tla kulh râwktu ding hen ka hawng fial awt.

¹⁴Kulh hawl hen an buaih mi chu râwk ding leh veih ding leh a lungphûm tla a karo hen siah ding ka tum asi. A chim lai le, an thah ver na lai. Chu tikah kei LALPA ka si ti mikip nih an theih lai.

¹⁵“Kulh leh hawl buaihtu tla nih ka thinthawknâk an theih lai. Churawhchun kulh chu a vei rawh le, churuangah hawl buaihtu

¹⁶khuavâng tla, Jerusalem ṭha lo pet hen ṭha ziar hen ruattu tla chu ka simh na lai!” a ti. LALPA Zahkâi nih a sim asi.

¹⁷LALPA nih, “Thikho mi minung, tuah nan mi tla lakah nunau thu simkantu chu zauhnik. Anmah sâwi na le,

¹⁸LALPA Zahkâi nih an sinah thu a sim mi simh na: “Nannih nunau tla nan vân a duai! Dâwi nan ṭhit mi mikip bân ah nan khimhtir na le, dâwi upâwng mikip lû ah pawnh ding hen nan siam, midang nungnâk lakah thiltikhonâk an nei kho ding hen. Nanmah ṭhatvaknâk ah mang ding hen ka mi le tla an ṭhih leh an nungnâk thu ah an tlûnah thiltikhonâk nei ding nan duh.

¹⁹Sang tâwmtê leh barley zapai khat tawng ding duh ruangah, ka mi le mâika ah nan ka siarlo. Thi lo ding mi tla nan thah na le, thi ding mi chu nan nunh na. Churuangah ka mi le sinah âwkrâwl thu nan sim le, annih nih chun an lung na,” a ti.

²⁰Tuah hi hi LALPA Zahkâi thusim asi: “Thihnâk leh nungnâk ah thunei ding tum hen kut rêngkhimh nan mang mi chu ka hua asi. Nan bân tla chu ka dawh rel lai le, nan thu thu hen nan siah na mi tla chu ka suah phin na lai.

²¹Nan upâwng tla chu ka phawih rel lai le, nan thiltikhonâk lakah mi ka mi tla chu ruang ka suah pawt na awt. Chu tikah kei, LALPA ka si ti nan theih lai.

²²“Nan âwkrâwl thusim hen mi ṭha nganfâk pêk ding ka duh na lo mi tla, nan zerhtir ver na. Misual tla chu thilsual ti bâng ding mi leh an nungnâk hum hen um ding mi nan kham na.

²³Tu lam chun, nan muhnâk diklo leh mahlo leikângah pial ding hen nan simkannâk chu a lîm rawh. Nan thiltikhonâk lakah mi ka mi tla chu ruang ka suah na rawh, churuangah kei LALPA ka si ti nan theih lai rawh,” a ti.