Read Bawm Chin EZEKIEL 14 Bible Online

EZEKIEL 14 - Bawm Chin bible

EZEKIEL 14

¹Israel ruitu zeimaw mi tla LALPA duh dân leikâng thu ah thu deih ding hen ka sinah an hawng.

²Churawhchun LALPA nih ka sinah thu a sim.

³“Thikho mi minung, hi bang minung tla hi an thinlung milem leiah an pêk le, sual leikângah milem nih a tlûktir na. Anmah ka sâng na ding hen ma an ruat?

⁴“Tuah, kei LALPA Zahkâi nih ka sim mi thu hi simh na: Israel mi tla, a thinlung milem lakah pêktu tla leh sual leikângah kalpi hen um mi tla, khuavâng sinah thu deih ding hen hawngtu chu a milem tamtak hen â dêng mi sângnâk keimah thawk hen an tawng lai.

⁵Chu milem tla nih chun Israel tla chu ka lakah mi kâng dang leiah a pialpi na le, sikhawmsele ka sângnâk hen zumh an kâinâk chu neh ding ka lungum.

⁶“Tuah Israel mi tla chu kei, LALPA Zahkâi nih ka sim mi chu simh na: Na milem fihnungkâi chu mâk le, kîr.

⁷“Zeiliau zawngah Israel lakah mi minung pakhat mawh ramdang minung Israel lakah um mi pakhat mawh ka sinah mi milem leikângah a pial hen a sawnh hen khuavâng sinah thu deih ding hen a kal chun kei, LALPA nih a rangah sângnâk chu ka pêk lai!

⁸Amah chu ka do lai. Theihthiamnâk dingah ka siam awt. Ka mi tla lakah mi ka lawnh ving lai le, kei LALPA ka si ti nan theih lai.

⁹“Khuavâng chu sângnâk diklo hen perpet hen a um chun, kei LALPA nih ka perpet ruangah mi asi. Israel lakah mi ka lawnh awt.

¹⁰A khuavâng hen a thu deihtu hen bang cho hen rêp an tawng lai.

¹¹Hi hi Israel mi tla nih an ka kaltâk mi leh an sualnâk nih a nawmh na mi lakah anmah kilkâwinâk ding hen ka ti awt mi asi. Annih chu ka mi tla si hen, kei chu an Pathian ka si lai,” a ti. LALPA Zahkâi nih a sim asi.

¹²LALPA nih ka sinah thu a sim.

¹³“Thikho mi minung, ram nih sualnâk a ti hen ka lakah zumh a kâi lo chun ka kut ka zangh lai le, tî-râwl suaknâk ka râwk awt. Pâm ka tlungtir lai le, minung leh ran bang cho hen thah an si lai.

¹⁴Chubang mi pathum Noa, Danel[1] leh Job chu chunah um na khawmsele an ṭhatnâk ruangah an nungnâk cho hum asi lai,” a ti. LALPA Zahkâi nih a sim asi.

¹⁵“Chu hâwi asi lo khawmah minung thah ding hen ramsa fial hen mi velvâ um kholo rê ding hen ram lakah ṭihnungkâi ka siam kho,

¹⁶chunah chubang mi pathum tla chu um na khawmsele kei LALPA Zahkâi Pathian nung ka si sung chun anmah fa men an hum kho lai lo. Anmah nungnâk cho an hum lai le, ram chu a karo hen a um lai.

¹⁷“Chu hâwi asi lo khawmah chu ram ah chun râltuknâk ka tlungtir hen riamnâm hen minung leh ramsa veihnâk bang cho hen ka tlungtir kho,

¹⁸chunah chu bang mi pathum tla chu um na khawmsele kei LALPA Zahkâi Pathian nung ka si sung chun anmah nungnâk cho lo chu an fa le tla khawm an hum kho ding asi lo.

¹⁹“Chu ram ah râi ka tlungtir hen ka thinthawknâk hen mi tamtak nungnâk lâk hen mi zapi leh ramsa tla ka thah na chun,

²⁰Noa, Danel leh Job chunah um na khawmsele kei LALPA Zahkâi Pathian nung ka si sung chun anmah fa tla men an hum kho na lai lo. An ṭhatnâk nih anmah nungnâk cho a hum lai,” a ti.

²¹Hi hi LALPA Zahkâi nih a sim mi chu asi: “Jerusalem tlûnah rêpnâk ṭha lo chem pali, râltuknâk, pâmnâk, ramsa tla leh râi, ran leh minung bang cho veihtu ka tlungtir awt.

²²Âutal a thibang nih a fa tla a hum hen na sinah an hawng tikah zauh na. An sual zia tla zauh le, Jerusalem tlûnah rêpnâk ka tlungtir mi chu a dik ti theih rawh;

²³churawhchun thil zeizawng ka ti mi chu a san ṭha tak a um ti na theih lai,” a ti. LALPA Zahkâi nih a sim asi.