Read Bawm Chin EZEKIEL 16 Bible Online

EZEKIEL 16 - Bawm Chin bible

EZEKIEL 16

²“Thikho mi minung, Jerusalem ah thil fihnungkâi ti hen a um mi theihtir rawh.

³LALPA Zahkâi thusim chu Jerusalem simh rawh. “Kanaan ram ah suak mi na si, na pa chu Amor mi asi, na nu chu Hit mi asi.

⁴Na suak liauah na lâirî ât asi lo, ṭâwl na si lo, chitê khawm an buaih lo, puan hen khawm âukhawm nih a nan tuam lo.

⁵Hi bang hâwi a nan ti piak ding hen âukhawm nih an lungkham lo. Na suak liauah âukhawm nih a nan dâwt lo. Phâisen ah a nan lawnh thlap.

⁶“Churawhchun ka nan pal le na thisen ah na kual ko mi ka nan muh. Thî nih an tuam pang, sikhawmsele ka nan thihtir lo.

⁷Thil keuh no lap mi hâwi hen kan ṭhangtir. Na hawng ṭhang le, na hawng sâng le, nungâk na hawng si. Na nûk a bawm le, na sam tla a sâu le, sikhawmsele takkaro hen na um.

⁸“Na kiangah ka nan pal nawlh liauah, duh ding hen na za rawh mi ka nan muh. Na zo langhnâk chu ka kawrdawh hen ka nan khuh le, a nan dâwt ding hen thu ka tiam. Asi, a nan umpi ding hen thudântuk ka siam le, ka tâ na si rawh,” a ti. Hi hi LALPA Zahkâi thusim asi.

⁹“Churawhchun tî ka lâk le, na tak ah mi thisen chu ka ṭâwl ver. Na vûn lakah oliv sariak ka nan chulh.

¹⁰Kawrfual dawh tak hen ka nan thuamh le, savun pheikawk ṭha chem mi ka nan pêk le, lû khuhnâk puannêm leh mâimaw kawrfual ka nan pêk.

¹¹Lungmantam zaksiar leh ṭhi hen ka nan thuamh.

¹²Nâr thlaih leh nabeh leh khuh ding lallukhuh dawh tak ka nan pêk.

¹³Ngûn leh tangkasa hen mi thuam na nei, thuamh mi puannêm leh mâimaw puan na aih kumza. Sangvut ṭha chem siam mi sang na ei le, oliv sariak leh khuaitizû khawm ei ding na nei. Na dawhnâk chu mit a ser le, lalnu na hawng si rawh.

¹⁴Duhkâi tak hen keimah nih ka nan siam mi na si ruangah na dawhnâk rangtling chu phun kip lakah a thang,” a ti. Hi hi LALPA Zahkâi nih a sim mi asi.

¹⁵“Sikhawmsele, na dawhnâk leh na min thangnâk chu mikip hen duhnâk ah na mang vima.

¹⁶Na nipuan zeimaw mi tla chu na pathian sawnhnâk mun thuamhnâk ah na mang le, mikip sinah nunau â zuar mi hâwi hen na pêk.

¹⁷Ngûn leh tangka leh lungmantam ka nan pêk mi chu na lâk le mipa lem ah na siam le, chu tla lakah chun ṭângdang na ka pawmtâk.

¹⁸Thuamh mi nipuan ka nan pêk mi chu na lâk le mi lem tla na aihtir le, oliv sariak leh rimthâw ka nan pêk mi khawm milem tla sinah na ap.

¹⁹Buh leh sang ṭha chem mi, oliv sariak leh khuaitizû ka nan pêk le, sikhawmsele milem lakah dâwt lawh ding hen bâwlnâk ah na ap,” a ti. Hi hi LALPA Zahkâi nih a sim mi asi.

²⁰“Churawhchun fapa leh fanu na ka ring piak mi khawm bâwlnâk ah milem sinah na ap na.

²¹Ka lakah chu tluk zumh na kâi lo rawh mi chu ka fa tla milem sinah bâwlnâk ah pêk lo khawm le a tâwk lo rawh ma?

²²Nunau â zuar mi umdân fihnungkâi tak hâwi hen na um kar zawngah na ngâksia liauah na thisen ah takkaro hen na kual liau tla veikhat khawm na theih dah lo.

²³LALPA Zahkâi nih, “Nang chu na vânduai! Na vân a duai rawh! Thilsual na ti le,

²⁴lam vâu kipah milem sawnhnâk mun na tuah le, nunau â zuar mi zia na châwng.

²⁵Na dawhnâk chu nêngthû lakah na nûk. A hawng mi tla sin kipah na pêk le, nisiar hen â zuar mi nunau ngâk hen na zual kâi.

²⁶Na duh mi na inpa Aigupta mi tla chu na sinah ihkhun ah na ittir, na zuar mi hen ka thin na thawktir.

²⁷“Tuah nangmah rêp ding hen leh na tingvo ka malsâwmnâk an lâk piak ving ding hen ka kut ka lirh rawh. Philistia mi a nan huatu leh na hurnâk fihtu sinah ka nan pêk rawh.

²⁸“Midang tla lakah na chim lo rih ruangah Asiria mi tla na ṭhâwl na. An lakah â zuar mi na si, sikhawmsele, nangmah lakah an chim lo nget rih.

²⁹Babulon mi tla sawlehtu phun lak khawmah na zuar ber, sikhawmsele nang lakah an lungâwi tâwk lo,” a ti.

³⁰Hi hi LALPA Zahkâi nih a sim mi chu asi: “Ningzak theih lo nunau hâwi hen hi bang zawzawng hi na ti.

³¹Zâwllâi kipah milem sawnhnâk na tuah le, nunau â zuar mi zia na châwng. Sikhawmsele nunau â zuar mi rarâu hâwi hen tangka duh ruangah mi khawm na si lêm lo.

³²Nunau, a pasal duh ngâk hen khual tla lakah ṭângdang pawmtâk duh dauh mi hâwi na si.

³³Nunau â zuar mi lam chu a man an pêk le, sikhawmsele nang lam chu a nan duhtu sin zawngah lâwmman na pêk le, mun kipah mi hawng hen a nan ihpi ding hen a man a thup hen na pêk na.

³⁴Nang chu nunau â zuar mi zât dang tak na si. Pumkhat si ding hen âukhawm nih a nan sâwm êu lo. A man khawm na tawng lo; nangmah lam nih na pêk na! Asi, nang chu zât dang tak na si,” a ti.

³⁵Churawhchun tuah, Jerusalem mi hur nu! LALPA thusim ngâi rawh.

³⁶Hi hi LALPA Zahkâi nih a sim mi chu asi: “Na nipuan tla chu na lît le, nunau â zuar mi hâwi hen a nan duhtu tla leh milem fihnungkâi zawzawng sinah na pêk le, milem tla sinah na fa tla bâwlnâk ah na thah na.

³⁷Hi ruang hin a lânah a nan duhtu tla zawzawng na duh mi leh na hua mi tla munkhat hen ka hawng tir na awt. Na kiangah hêl dak hen ka hawngpi na lai le, churawhchun na nipuan ka lît lai le, takkaro hen na um mi ka zauhtir na awt.

³⁸Ṭângdang pawmtâk hen mi na thah ruangah kan mawhtir awt, ka thinthawknâk leh ka thinrunhnâk hen thihnâk hen ka nan rêp awt.

³⁹An thu thu um ding hen ka nan siam lai le, na zuarnâk leh milem na sawnhnâk tla chu an siat hep lai. Na nipuan tla leh lungmantam an lâk hep lai le, takkaro hen a nan siah lai.

⁴⁰“Mi zapi tla chu lung hen a nan seh ding hen an fawrh na lai le, annih nih an nâmsâu hen a nan chan dip lai.

⁴¹Na in tla chu an duah lai le, rêp hen na um mi chu nunau rual nih a nan muh lai. A zuar mi nunau na sinâk kan bângtir lai le, na duh na mi tla sinah thilpêk khawm ka nan bângtir lai rawh.

⁴²Churawhchun ka thinthawknâk chu â lîm lai le, ka dâisip lai rawh. Ka thinthawk hen thîknâk ka nei lai lo rawh.

⁴³Na ngâksia liauah ka nan zulh mi tla na philh le, thil na ti mi zawzawng tla hen ka thin na thawktir. Chubang na ti mi zawzawng man tla ka nan pêk mi asi. Zeirangah na hurnâk thil chu thil fihnungkâi dang na ti mi zawzawng lakah na sap?” a ti. Chu chu LALPA Zahkâi nih a sim asi.

⁴⁴LALPA nih, “Jerusalem, nang lakah chun, mi nih hi thufing hi an mang lai: ‘Nu hâwi hen, fanu hâwi hen,’ ti hi.

⁴⁵Nang chu na nu fanu tak na si. A pasal leh a fa tla a hua na. Na unaunu tla, an pasal leh an fa tla huatu hâwi na si. Nang leh na unaunu khuapi tla nih chun, Hit mi nu leh Amor pa nan nei.

⁴⁶Na unu chu Samari, a khua tla hen marlei ah um mi asi. Na naunu chu Sodom, a khua tla hen simlei kângah um mi asi.

⁴⁷An umdân zûl hen thil fihnungkâi an ti mi châwng chu na duh zia asi mu? Silo, sâwtlotê ah thil zeizawng na ti mi lakah na umdân chu anmah umdân ngâk hen a ṭha lo dauh.

⁴⁸LALPA Zahkâi nih, “Kei Pathian nung ka si kar vial chu, nang leh na khua mi tla nih nan ti mi sual hi na unaunu Sodom leh a khua mi tla nih an ti dah lo.

⁴⁹Ei ding tamtak nei hen thlangam tak hen dâi riang an um ruangah amah leh a fanu tla chu anna zûm phah, sikhawmsele mipâm tla an zauhkhenh lo hen thawsuak hen an siam na lo.

⁵⁰Nan theih na rawh hâwi hen, anna zûm le thu an ngâi lo le, ka huat kâng thil an ti ruangah anmah tla ka veih na.

⁵¹“Samaria sualnâk chu nan sualnâk a khing khawm a tling lo. A ti tâwn mi ngâk hen nannih nih thil fihnungkâi nan ti mi a tam dauh. Na siatnâk chu tahkhiat hen na unaunu tla chu sual neilo mi hâwi an si.

⁵²Tuah nang chu ningzak kumza ding mi na si rawh. Na kiangah mi na unaunu tla an sual lo zia zauh hen nang sualnâk chu a ṭha lo khun. Tuah na unaunu tla chu thiang hen na langhtir na ruangah na mâiliap hen na ningzaknâk phurh rawh,” a ti.

⁵³LALPA nih Jerusalem sinah, “Sodom leh a khua tênâu tla leh Samaria leh a khua tênâu tla chu sul-le-lam tluang tak hen ka siam nawlh lai. Asi nang khawm sul-le-lam tluang hen ka nan siam lai.

⁵⁴Nangmah chu na ningzak lai le, na ningzaknâk nih na unaunu tla thang a ṭhattir lai.

⁵⁵Sul-le-lam tluang tak hen an um nawlh lai le, nang leh na khua tla khawm dirh nawlh an si bâk lai.

⁵⁶Na zûm liau ni tla ah leh na thilsual ti a langh lânah Sodom khua chu na siarlo thlo silo ma?

⁵⁷Tuah nang chu amah hâwi hen Edom mi, Philistia mi leh na kiangkam ah midang a nan huatu tla lakah tluktlak ding hen na um rawh.

⁵⁸Na kangal thusim leh thil fihnungkâi na ti mi ruangah na tuar ding asi,” a ti. LALPA Zahkâi nih a sim asi.

⁵⁹LALPA Zahkâi nih, “Na thutiam na zulh lo ruangah leh thudântuk na buar ruangah nangmah dêng hen ka nan ti awt.

⁶⁰Sikhawmsele, na ngâksia liauah na sinah thudântuk ka siam mi chu ka theihkumza lai le, thudântuk um kumza rawh ding mi na sinah ka siam awt.

⁶¹Chu lakah thil na ti mi leh ningzakkâi tak hen na um mi chu na unu leh na naunu na tawng nawlh na tik chun an theihkumza lai. Na fanu hâwi hen ka umtir na lai le, chu hâwi sikhawmsele hi hi na lakah thudântuk mi lam chu asi lo.

⁶²Na sinah thudân ka tuk mi chu ka tharh nawlh lai le, LALPA ka si mi na theih lai rawh.

⁶³Thilsual na ti mi zawzawng ka nan ngaihdam lai le, sikhawmsele nang khawm nih na theihkumza na lai le, na ningzak tuk ruangah hawlh khawm na hawlh lai lo,” a ti. LALPA Zahkâi nih a sim asi.