Read Bawm Chin EZEKIEL 17 Bible Online

EZEKIEL 17 - Bawm Chin bible

EZEKIEL 17

¹LALPA nih ka sinah thu a sim.

²Thikho mi minung, Israel mi tla chu tahṭhimhnâk thu,

³kei LALPA Zahkâi nih ka simh na mi thu hi theih ding hen simh na: Mupi lian tak mul dawh tak a thlâ pharh dûr mi a um. Lebanon tlâng sâng tak leiah a zuang le, sidar thing zîk a khiak le,

⁴thil zuarnâk ram leiah a kalpi le, sawlehtu khuapi ah a siah.

⁵Churawhchun Israel ram ah mi thing keuh chu a lâk le, phâisen tual ṭhatnâk ah tî nih a ṭhangtirnâk mun ah a phun.

⁶Chu thing keuh chu a chawrh le, niam tek hen a um le, grep zûn zâm mi a hawng si. A ṭeng tla chu tlûnlei kângah mupi umnâk leiah a ṭhang le, a ram thûk tak a thlâk. A zûn chu a nah leh a ṭeng nih khuh dup hen a um.

⁷“Mupi dang thlâ lian tak leh mul sah tung mi a um. Chu leikângah chun grep ram chu a va lâwn le, a nah tla khawm chu leiah anna hawi, a khonâk dûm mi ngâk hen tî tam dauh pêk ding a lungum ruangah.

⁸Sikhawmsele grep zûn chu tual ṭhatnâk mun, tî umnâk phâisen ah a nah tla chawrh hen a rah tla suah hen zûn lian tak si ding hen phun asi ving rawh.

⁹“Churuangah kei LALPA Zahkâi nih ka deih le: Hi grep zûn hi a nung hen a ṭhang lai ma? Mupi a masa mi nih a zûn leh a ram phâwi hen a ṭeng tla khiak hen a uaitir awt lo ma? Phâwi zek ding hen tha chak tak leh phun chak tak a herh lêm lo.

¹⁰Asi, phun asi rawh le, sikhawmsele a nung hen a ṭhang lai ma? Saklei thli nih a sêm tikah a uai awt lo ma? A khonâk mun ah mi chu a uai awt lo ma?” ka ti.

¹¹LALPA nih ka sinah a sim le,

¹²“Mi hel tla chu hi tahṭhimhnâk thu umdân hi an theihfiang mi asi chun deih na. Babulon lalchem Jerusalem ah a hawng le, lalchem leh a rianṭuantu tla chu Babulon leiah a kîrpi na mi simh na.

¹³Lal dâwngsung lakah mi pakhat chu thutiamnâk a neipi le, zumhkâi tak a um ding hen thu a tiamhtir.

¹⁴Tâng vêngtu rangah mi pawiherh tla chu a lâk na le, an thutiam chu buar hen an hel lonâk ding hen phun vêngtu ah a siah na.

¹⁵Sikhawmsele, Juda lalchem chu a hel le, amah ṭangpitu Aigupta sinah chun rang tamtak leh kawrsen tamtak a deih ding hen a fial. Chu chu a tawng lai ma? Chu nih chun ruang a suah kho lai ma? thutiam chu a râwk kho lai lo le, rêp lo hen a um kho lai lo!

¹⁶LALPA Zahkâi nih, “Kei, Pathian nung ka si kar vial chu, lal ah siamtu Babulon lalchem sinah thu a tiam mi leh a siat tleih a buar ruangah hi lalchem hi Babulon ram ah a thi lai.

¹⁷Babulon mi tla nih mi tamtak thahnâk ding hen mual pâwng an siam le, tual khur an chawh mi chu Aigupta lalchem kawrsen thilti kho tak khawm nih do hen an ṭangpi kho ding asi lo.

¹⁸A thutiam leh siat tleih a buar rawh. Hi bang thil zawzawng hi a ti rawh le, tu chun a suak lai lo rawh,” a ti.

¹⁹LALPA Zahkâi nih, “Kei Pathian nung ka si kar vial chu ka min hen zûl ding hen thu a tiam mi a buar ruangah ka rêp awt.

²⁰Sa kahtu lên ka zâr lai le, chu hen ka tleih awt. Ka lakah zumh a kâi lo ruangah Babulon leiah ka put lai le, chunah ka rêp awt.

²¹A kawrsen ṭha chem chu râltuknâk ah an thi lai le, a thibang tla chu munkip ah anna rek lai. Churawhchun kei LALPA nih ka sim mi asi ti na theih lai,” a ti.

²²Hi hi LALPA Zahkâi nih a sim mi asi: “Sidar thing sâng tak zîk ka ṭei lai le, chawrhno ka khiak lai. Tlâng sâng tak tlûnah ka phun lai le, Israel tlâng sâng chem tlûnah

²³a ṭeng tla a ṭhang lai le, a chî tla a suah lai le, sidar thing lian tak a hawng si lai. Va chikip chunah chun an um lai le, a dâidul ah riaknâk an tawng lai.

²⁴Chu ram ah thing zawzawng nih kei LALPA ka si ti an theih lai. Thing sâng tla ka hâu le, thing niam tla sâng tak hen ka ṭhangtir. Thing ring tla ka uaitir le, thing châr tla ka ringtir. Kei LALPA nih ka sim asi. Ti ding hen ka sim rawh mi chu ka ti awt,” a ti.