Read Bawm Chin EZEKIEL 18 Bible Online

EZEKIEL 18 - Bawm Chin bible

EZEKIEL 18

¹LALPA nih ka sinah thu a sim le,

²“Israel ram ah hi thufing an sim lemang mi hi zei tinâk me si? ‘Nu leh pa nih grep thur an ei le, sikhawmsele fa tla nih a thur mi an theih,’ ti hi.

³LALPA Zahkâi nih chun, “Kei Pathian nung ka si sung chun hi thufing hi Israel ram ah nan sim lai lo rawh.

⁴Mikip nungnâk chu ka tâ asi le, nu leh pa leh fa tla nungnâk khawm keimah kut ah a um. Thilsual titu chu a thi lai.

⁵“Hawlhnâk ah, mi ṭha tatak, mirep leh zumhkâi khawm a um kho.

⁶Israel tla milem khawm sawnh lo hen mi thenhlimh thlân ah khap mi bâwlnâk ap mi khawm a ei lo. Midang nupi khawm a lêm lo, nunau râitâ neih liau khawm a pung lo.

⁷Âukhawm a perpet hen a râwk na lo. Him ziar hen amah rangah thil lanhtu chu a pêk nawlh le; mi sungvâng rangah buh a pêk le, takkaro hen um mi rangah nipuan a pêk na.

⁸A pung ding duh hen tangka a lângtir lo. Sualnâk ti a duh lo le, thunawk khawmah zumhkâi tak hen thu thlûknâk a siam.

⁹Chu hâwi minung nih chun ka thupêk tla a zûl hen ka dân tla thiamthih tak hen a kil. Mirep asi ruangah a nung lai,” LALPA Zahkâi nih a ti.

¹⁰“Churawhchun chu minung nih chun fapa, râwktu leh thahtu, a pa nih a ti dah lo mi thil titu a nei kho.

¹¹Mi thenhlimh thlân ah bâwlnâk ap khap mi tla ei hen midang nupi tla a lêm.

¹²Mipâm tla perpet hen, rawk hen, lângtirtu nih a lângtir mi chu a kil ving. Lunglo mi mi thenhlimh thlân ah a va kal le, milem fihnungkâi sawnh hen

¹³a pung ding duh hen tangka tla a lângtir. Chu minung chu a nung lai ma? Nung lo e, a nung rîlmâl lai lo. Hi bang thil ṭihnungkâi zawzawng a ti ruangah a thi lai. A thihnâk chu amah mawh asi lai.

¹⁴“Tuah hawlhnâkah, chu minung nih chun fapa a nei. A pa thilsual ti zawzawng a muh le, sikhawmsele a châwng loh.

¹⁵Israel milem khawm a sawnh lo mi thenhlimh thlân ah bâwlnâk ap khap mi khawm a ei lo.

¹⁶Âukhawm a nehsawh hen a rawk na lo. Pûktirtu nih a pûktir mi khawm amah tê hen a rulh nawlh. Mi sungvâng rangah ei ding a pêk na le, takkaro um mi rangah nipuan a pêk na.

¹⁷Sual thilti a duh lo le, a pung ding duh hen tangka a lângtir na lo. Ka dân tla a zûl le, ka thupêk tla a pawm. A pa sual ruangah chu minung chu a thi lai lo le, sikhawmsele a nung ngelchel lai.

¹⁸A pa nih mi a perpet hen râwk na hen mikip sinah thilsual a ti kumza. Churuangah amah ngelchel nih thilsual a ti mi ruangah a thi.

¹⁹“Sikhawmsele nangnih: Zeirangah a pa sual ruangah a fa nih a tuar lo zia na ti dahmawh? A sângnâk lam chu chu fapa nih thil dik leh ṭha a ti ruangah asi. Ka dân tla a pawm le, thiamthih tak hen a zûl le, churuangah a nung ngelchel lai.

²⁰Thilsual titu chu a thi ding asi. A pa sual ruangah a fa nih a tuar ding asi lo, a fapa sual ruangah a pa khawm nih a tuar ding asi lo. Mi ṭha nih thil ṭha ti lâwmman a tawng lai le, misual nih a thilsual ti mi ruangah a tuar lai.

²¹“Misual nih a thilsual ti a bâng hen, ka dân a zûl hen thil ṭha a ti chun a thi lai lo le; a nung ngelchel lai.

²²Thil dik a ti ruangah a sualnâk zawzawng tla ngaihdam si hen a nung lai.

²³Misual a thi mi muh hen a lâwm ding hen ma nan ka ruat?” LALPA Zahkâi nih a ti. Ka lâwm rîlmâl lo, rim hen a nung mi muh ka duh dauh.

²⁴“Sikhawmsele, mirep nih thil ṭha ti a bâng hen, thilsual ti a dawmh sele, misual nih an ti mi thil fihnungkâi ti sele, a nung lai ma? Nung lai lo! A thil ṭha ti tla zeikhawm theih piak asi lai lo. Zumh a kâilonâk leh a sualnâk ruangah a thi lai.

²⁵“Sikhawmsele, nannih nih, ‘LALPA thilti a dik lo,’ nan ti. Nannih Israel mi tla ka thu ngâi u. Kei nih thil ka ti mi chu diklo hen nan ruat mu? A diklo mi chu nanmah umdân kha asi.

²⁶Mirep nih thil ṭha ti a mâk hen thilsual a ti hen a thi mi asi chun a thilsual ti ruangah a thi mi asi.

²⁷Misual nih a thilsual ti a bâng hen thil dik leh thil ṭha a ti chun a nungnâk a hum mi asi.

²⁸A theihthiam ruangah thilsual a ti mi chu a bâng le, churuangah a thi lai lo le, a nung lai.

²⁹Nannih Israel mi tla nih, ‘LALPA thilti a dik lo,’ nan ti. Ka umdân hi diklo hen nan ruat mu? Nanmah umdân asi, a dik lo mi chu.

³⁰“Tuah, kei LALPA Zahkâi nih Israel mi tla mikip nan thilti zia zia hen nan lâi kan rêl piak chiau na awt ti kan simh na. Thilsual nan tinâk ah mi kîr u, nan thilsual ti nih an veih lah na seh.

³¹Thilsual nan ti mi zawzawng lêt hep ule, dawnnâk leh thinlung thar a neih u. Israel mi tla, zeirangah thi ding nan duh êu?

³²Pakhat khawm thi ding hen kan siang na lo,” LALPA Zahkâi nih a ti, “Nan sualnâk hertâk ule, nung u,” a ti.