Read Bawm Chin EZEKIEL 19 Bible Online

EZEKIEL 19 - Bawm Chin bible

EZEKIEL 19

¹Pathian nih Israel lal panih tla rangah hi ngaihsiatnâk la hi sak ding hen hawng ka simh:

²Na nu chu chakeibaknei nunau asi! Chakeibaknei mipa râng tak nâwngah a fa tla a châwm.

³A fa chu a châwm le, seh ding dân a sîntir le; minung eitu ah â chang.

⁴Phun tla nih a thâwng an theih le, khur sungah mi an tângtir. Siau hen Aigupta leiah an nûk ving.

⁵A nu nih a lungdawng ver lân lo a ngâk ko. Churawhchun a fa dang a châwm nawlh le, chakeibaknei râng tak a hawng si fâwn.

⁶A ṭhang a zawh rawh chun, chakeibaknei dang tla hen anna sawk. Seh ding â sîn bâk le, minung eitu ah a hawng si.

⁷Kulh tla a siat le, khuapi tla a râwk. A hûk kipah ram lakah mi an lâu.

⁸Amah do ding hen phun tla anna pûm le; munkip thawk hen mi tla an hawng. An mi thahnâk lên tla an zâr le, chu hen chun an tleih rawh.

⁹Bâwm sungah an siah le, Babulon lalchem sinah an kalpi. Chunah chun Israel tlâng ah a hûk hâu theihlo rawh ding hen an vêng ret.

¹⁰Na nu chu tiva kapah grep zûn phun mi hâwi asi. Tî a tam tâwk ruangah grep zûn chu a nah leh a rah nih a khuh zat.

¹¹A ṭeng tla chu a khauh le, lal ṭhianṭhunh si ding hen a ṭhang. Vândâwm tleng khet ding hen grep zûn chu a ṭhang le; a nah tam zia leh a sâng zia chu mikip nih an muh.

¹²Sikhawmsele, thinthawknâk kut nih a ram hen a phâwi zek le, tual ah a puak thlo. Saklei thli nih a rah chu a chârtir fêk. A ṭeng tla a kiak hep le; an châr hiam le, an duah hep.

¹³Tu chun ramkaro ah tî umlonâk a châr fêknâk ah an phun rawh.

¹⁴Grep zûnpi chu mei nih a khangh le, a ṭeng leh a rah tla a kâng hep. A ṭeng chu a khauh lai lo rawh le, lal ṭhianṭhunh khawm asi lai lo rawh. Hi hi ngaihsiatnâk la; sak lemang mi chu asi.