Read Bawm Chin EZEKIEL 2 Bible Online

EZEKIEL 2 - Bawm Chin bible

EZEKIEL 2

¹Chu chu ka muh rawh chun tual ah ka bawk. Churawhchun thusim hâu ka theih le, “Thikho mi minung, dîr rawh, sawnh ding ka nan duh,” ti hen.

²Thu a sim liau chir chun Pathian thlarau chu ka lakah a hawng lût le, ka kê hen a hawng ka dîrtir le, thusim hâu chu ka theih vima,

³“Thikho mi minung, Israel tla sinah ka nan fial asi. Ka lakah an hel le, an hawng ka hawitâk le, an thlâktu tla hâwi hen an hel nget rih.

⁴An lungkhung le, an hawng ka zah lo, churuang chun, kei LALPA Zahkâi nih thu ka sim mi anmah va simh na ding hen ka nan fial asi.

⁵Chubang hel mi tla nih chun ngâi duh na seh duh lah na seh an lakah khuavâng a um ti an theih lai.

⁶“Sikhawmsele, nang thikho mi minung, anmah leh an thusim chu na ṭih ding asi lo. An zauhnawmh hen an siar lai lo; tlâng cha-âi nâwngah um mi hâwi na si lai. Chubang an hel mi leh an thusim tla chu zeiliau khawmah ṭih lah.

⁷Ngâi seh ngâi lah na seh sim ding hen ka nan simh mi thu chu simh na ko. Mi hel an si mi theihkumza na.

⁸“Thikho mi minung, thu ka nan simh mi ngâi. Anmah hâwi hen hel bâk lah. Na kâ âng le, ka nan pêk ding mi hi ei,” a ti.

⁹Keimah leiah kut a hawng lang mi ka muh le, lasuibuzual a put.

¹⁰Chu lalsuibu zual chu kut nih a samh le, pat nih hen rîn mi ka muh, chunah chun ngaihsiatnâk ruangah ṭapnâk, lungfâknâk leh rûmnâk ti hen â rîn.