Read Bawm Chin EZEKIEL 20 Bible Online

EZEKIEL 20 - Bawm Chin bible

EZEKIEL 20

¹Kan sal tângnâk chu kum sarih, thla nga ni rânâk asi rawh. Israel mi tla lakah ruitu a zeimaw mi tla, Pathian duhzia thu ah thu deih ding hen ka sinah an hawng le, ka mâika ah an to.

²Churawhchun LALPA nih ka sinah thu a sim.

³“Thikho mi minung, hi bang minung tla hi LALPA Zahkâi nih a sim mi thu simh na: Ka duhzia thu deih ding hen nan hawng le, nan duh tak awt ma? Kei Pathian nung ka si kar vial chu thil zeikhawm hawng ka deih lah u. Kei, LALPA Zahkâi nih ka sim asi.

⁴“Thikho mi minung, anmah tla rêp ding hen na tîm ma? Na râlring chun ti ko. An pa tla nih thil fihnungkâi an ti mi tla simh nawlh na.

⁵Thu ka sim mi simh na. Israel ka thîm liauah thu ka tiamh na. Aigupta ah keimah ngelchel an sinah ka langh le, kei, LALPA nan Pathian ka si ti hen ka simh na.

⁶Churawhchun Aigupta ram ah mi suah na hen neihnâk ram leh ram ningno, ram zawzawng ah ram ṭha chem anmah rangah ka thîm piak na mi leiah kalpi na ding hen thu ka tiamh na.

⁷Kei, LALPA an Pathian ka si ruangah an duh tak mi milem fihnungkâi lawnh ding leh Aigupta ram ah pathian diklo lakah a nâwmtir lo ding hen ka simh na.

⁸Sikhawmsele an ka siarlo le, ngâi ding an duh lo. An milem fihnungkâi khawm an lawnh duh lo, Aigupta pathian khawm an nawng lo. Aigupta ah ka thinthawknâk fâk tak theihtir na ding hen ka tîm rawh.

⁹Sikhawmsele, chu hâwi hen ka ti lo, Israel zapi minung tla mâika ah Aigupta ram ah mi suakpi na ding hen thu ka sim rawh ruangah ka min a sia lai ti ka ruat.

¹⁰“Churawhchun Aigupta ram ah mi chu ka suakpi na le ramkaro ah ka kalpi na.

¹¹Ka thupêk tla ka pêk na le, ka dân tla ka sîntir na, a zûltu tla rangah nungnâk ding hen.

¹²Anmah leh keimah karah remnâk singsiahnâk Dinhni ulh ding hen kei, LALPA nih thenhlimh tak hen ka siam ti theihtir na ding hen.

¹³Sikhawmsele ramkaro ah an ka siarlo. A zûltu âuzawng rangah nungnâk ding mi dân leh thupêk tla chu an buar le an duh lo. Dinhni tla an nawmh dep. Ramkaro ah anmah tla chu ka thinthawknâk fâk tak theihtir leh veih dep na ding hen ka tîm rawh.

¹⁴Sikhawmsele Aigupta ram ah mi Israel tla ka suakpi na mi muhtu phun tla lakah ka thang a duai lai ka ti ruangah ka ti ding mi ka lêt.

¹⁵Churawhchun, anmah rangah ka pêk na mi neihnâk leh ram ṭha, ram zawzawng ah ram ṭha chem leiah kalpi na lo ding hen ramkaro ah thu ka tiam.

¹⁶Thu ka tiamh na mi a san chu ka thupêk tla an duh lo le, ka dân tla an buar hen Dinhni tla an nawmh le, an milem tla sawnh ding an tum ruangah asi.

¹⁷“Sikhawmsele an lakah khua ka ruat. Ramkaro ah thah na lo ding hen thu ka thlûk.

¹⁸Chu ngâk hen anmah lakah seino tla rangah nun ka simh dauh na: An thlâk natu tla nih dân an siam mi zûl lah u; an dân zûl hen an milem lakah a nâwmtir lah u.

¹⁹Kei, LALPA, nan Pathian ka si. Ka dân tla leh ka thupêk tla zûl u.

²⁰Dinhni tla thenhlimh tak hen ulh ule, thudântuk kan siam mi singsiahnâk leh kei, LALPA nan Pathian ka si theihnâk asi lai.

²¹“Sikhawmsele, chu thlâk tla khawm nih an ka siarlo. Ka dân tla an buar le, ka thupêk âuzawng a zûltu rangah nungnâk ding mi chu an zûl duh lo. Dinhni tla an nawmh. Anmah tla ramkaro ah thah hep na ding hen ka thinthawknâk fâk tak theihtir na ding ka tum.

²²Sikhawmsele, ka ti lo, Israel tla Aigupta ram thawk hen ka suakpi na mi muhtu phun tla lakah ka min a sia awt ruangah.

²³Churawhchun ramkaro ah thutiamnâk dang ka siam. Laikulh pumpi ah rekrâwitir na ding hen thu ka tiamh.

²⁴Hi ka tinâk san chu, ka thupêk tla an duh lo le, ka dân tla an buar, Dinhni tla an nawmh le, an thlâktu tla nih a rian an ṭuan mi milem tla an sawnh ruangah asi.

²⁵“Churawhchun, dân ṭha lo leh nungnâk tlungtir lo ding mi thupêk tla ka pêk na.

²⁶An thil ap lakah anmah ka nawmhtir na le, an fapa tîr tla bâwlnâk ah ka mangtir na. Chu chu anmah rêpnâk leh LALPA ka si ti theihtirnâk ding asi.

²⁷“Churuangah thikho mi minung, kei, LALPA Zahkâi nih ka sim mi thu hi tuah Israel tla simh na. Hi hi an pa tla nih zumh an kâi lonâk hen an hawng ka siarlonâk kâng dang chu asi.

²⁸Pêk ding hen ka tiamh na mi ram ah ka kalpi na. Tlâng sâng tla leh thing ring tla an muh rawh chun chu lakah bâwlnâk an ap. Bâwlnâk an duah mi leh uain an ap mi hen ka thin an ka thawktir.

²⁹Kei nih an sinah: Mun sâng nan va kalnâk hi zei me si? ti hen ka deih na. Zeiliau zawngah ‘Mun Sâng’ nan ti kumza mi chu.

³⁰Tuah Israel mi tla chu, kei LALPA Zahkâi nih ka sim mi hi simh na: Nan pa tla nih thilsual an ti mi hâwi chu ti hen zeirangah an milem tla chu nan zûl awt êu?

³¹Tusûn ni tiang khawmah chu hâwi thilpêk tla chu nan ap hen nan fa tla mei lakah bâwlnâk ah mang hen chu milem tla lakah chun nanna nâwmtir. Nannih Israel mi tla nih hawng hen ka duhzia nan hawng ka deih nget rih! Kei LALPA Zahkâi, Pathian nung ka si sung zawng chu zei thil khawm hawng ka deih lah u.

³²Phundang tla hâwi hen leh ram dang ah um mi tla hâwi hen nan thinlung ah thing leh lung tla sawnh ding nan tum. Sikhawmsele chu chu asi dah lai lo.

³³“Kei, LALPA Zahkâi ka si kar vial chu, ka thinthawknâk leh ka kut chak leh ka thiltikhonâk hen nan tlûnah lâi ka rêl awt.

³⁴Ka nan rekrâwitir na nâk ram kip thawk hen ka nan pumh na tikah ka thiltikhonâk leh ka thinthawknâk ka nan zauhtir na lai.

³⁵‘Ramkaro ah phun um tla sinah ka nan kalpi na lai le, chunah chun nan mâi mûi dep hen ka nan mawhtir na lai.

³⁶Sinai Ramkaro ah nan pa tla ka mawhtir na mi hâwi hen tuah nannih khawm kan mawhtir na awt,” LALPA Zahkâi nih a ti.

³⁷“Ka thu thu hen kan siam na lai le, ka thudântuk ka nan zûltir na awt.

³⁸Nan lakah mi hel mang leh misual zawzawng chu ka lâk peng na awt. Tuah an umnâk ram ah mi ka lâk na lai le, sikhawmsele Israel ram leiah lam chun ka kîrtir na awt lo. Chu tikah kei, LALPA ka si ti nan theih lai,” a ti.

³⁹LALPA Zahkâi nih, “Israel mi zawzawng tla, tuah a lâwm u! Nan milem rian kha ṭuan vima ko u! Sikhawmsele ka nan simh na, hi nûn chun nan milem lakah thil nan ap mi nih ka min thenhlimh nan zah lonâk chu an bângtir na lai le, ka thu nan ngâi lai rawh.

⁴⁰Chu ram ah mi ka tlâng thenhlimh ah, Israel tlâng sâng ah, nannih Israel mi zawzawng nih nan hawng ka sawnh lai rawh. Nan lakah ka lâwm lai le, bâwlnâk tla, nan thil ap ṭha chem tla, nan thilpêk thenhlimh tla, nan ka pêk ding mi lakah lungumnâk ka nei lai rawh.

⁴¹Nanna rekrâwinâk ram ah mi ka nan suah na hen munkhat hen ka nan pumh na tikah chun, bâwlnâk nan duah mi tla chu ka pawm lai le, phun tla nih mi thenhlimh ka si zia an muh lai rawh.

⁴²Israel ram, a nan thlâktu tla sinah pêk ding hen ka tiamh na mi mun ah ka nan kîrpi na tikah chun, kei, LALPA ka si ti nan theih lai.

⁴³Churawhchun thil ningzakkâi tak nan ti mi tla leh nanmah nanna nawmh mi tla nan theihkumza lai rawh. Thilsual zawzawng nan ti mi ruangah mah leh mah nanna fih lai.

⁴⁴Keimah zah ka kâinâk dingah thil ka ti tik chun, thilsual nan ti mi hâwi hen leh nan ṭhatlo zia hâwi hen kan ti na lo ruangah, nannih Israel mi tla nih kei, LALPA ka si zia nan theih lai rawh,” a ti. LALPA Zahkâi nih a sim asi.

⁴⁵LALPA nih ka sinah thu a sim.

⁴⁶“Thikho mi minung, sim leikâng zauhnik. Sim leikâng do hen thu sim le, sim leikâng a mi tumun do hen thu simkan rawh.

⁴⁷LALPA Zahkâi nih thu a sim mi chu ngâi ding hen simlei mi tumun simh: Zauhnik! Mei duah ka dawmh rawh, nan lakah mi thing zawzawng a châr mi leh a ring mi a kâng lai. Zeikhawm nih a mih kho lai lo. Simlei thawk hen marlei tiang a tlân lai le, mikip nih meialh linh zia an theih lai.

⁴⁸An ektê hen kei LALPA nih ka duah mi an muh lai le, âukhawm nih an mih kho lai lo,” a ti.

⁴⁹Sikhawmsele, kei nih ka êl le, “LALPA Zahkâi, chu chu hawng ka titir lah! Thu har tak ka sim mi lakah mikip an chipchiar kumza,” ka ti.